Read Wancho Naga Pongwang Laipex 47 Bible Online

Pongwang Laipex 47 - Wancho Naga bible

Pongwang Laipex 47

¹Jusep-e hotüi-honao hwom mixsün aga laxlaxle wanghompa hato ngui. Chixe thüi: “Ku apa, kutüi-kunao hwom pangwüi, Kanan chaxwan tokya, hwom tsom-pom hia tuina pangnusa koplaxle nguile tüile. Athax hwom Goshen haxsha ma tüile.”

²Ifüima chixe hotüi-honao hwom pangwüi wanghompa hato aho.

³Wanghompa-e hwom ang thüi: “Hünzom manzai ang chemlaxpu?” Hwome lan: “Apu-apa hwom ningle kwom chuwüi müitsommixbu changle.

⁴Tüle tuinu-nuaknu lelaxle kwom Kanan haxtok ma müise fumtsüt angkya onuijao chitüile chaxwan zankya khoma kwom ikhato ating-anokle ngo ang nguipu. Chingchalaxle kwom Goshen haxsha ma ngo ang tomhüi.”

⁵Wanghompa-e Jusep ang thüi: “Hünpa hia hüntüi-hünnao hwom ikha alopkya müidaoa.

⁶Ijip haxtok a hwom haxtok changle. Hwom Goshen haxsha ma ngo ang laxkox. Eja kha a kem chaxwan ma sümüikya chaxwankho changle. Ilaxle hwom khama owawae tho koxle asule jangtüi thüiningle ija khünak ku tsom-pom to hukya mix ang achang ang tomkox.”

⁷Ifüima Jusep-e hopa a wanghompa hato apüile aho. Jakop-e wanghompa ang chix mohiman kox.

⁸Wanghompa-e chix ma atüi: “Nang zangpua obi sütüi?”

⁹Jakop-e lan: “Hamham le ngokya ku tsün a 130 zanglao nguidaoa. Ku apu-apa hwom tsün-tsün to hamhamle ngole hüikya ningle münchang, ikoxle zanglao müimamale machang koxlechu kue sikngün a huanuma apongle hüidaoa.”

¹⁰Jakop-e wanghompa ang oshuk-okia mohiman kox ilaxle chat.

¹¹Jusep-e hopa hia hotüi-honao hwom, Ijip nok ma ngo ang kox, ilaxle wanghompa kaxtom ningle Rameses tingnu zui ma, Ijip chaxwan ma sünmüikya kha haxtok ma hwom ngo ang tom.

¹²Jusep-e hopa ang, hotüi honao hwom ang, ilaxle ibibi hopa homkha pangwüi ang, naoshuk-naoli to lünle sütling koxle hume.

¹³Tuinu-nuaknu tüle ziamale jao lekya tokhange ojong khatochu süt chitüile zan. Kanan nok hia Ijip nok angkya khünakbu woknuak ma max.

¹⁴Hwome tsax shakkya ma kopkya ngun athünlaxle Jusep-e wanghom hato apüile kox.

¹⁵Chemtue Ijip hia Kanan chaxwan angkya ngun-syen komle hüipuix; Ijip khünakbue Jusep hato nguilaxle thüi: “Kwom ang süt laxhüi! Kwom woknuake zi ang taxtom. Tütali le thüichu changhüi! Kwom ngunsyen a komdaoa.”

¹⁶Jusep-e lan: “Hünzom ang ngunsyen komle jangchangdaoba hünzome hünzom tsom-pombu ku hato apüihüi; kue ibu süt füi alüixle koxfang.”

¹⁷Idaile ibue hwom tsom-pombu Jusep hato apüi ilaxle hwom man, chun, zwon maihu hia mantsak, ibu lüix to Jusep-e hwom ang süt kox.

¹⁸Ofüi zang hwom chix hato hüilaxle thüi: “Kwome nang hama otsingtsing wüi ngaiüi; kwom ang ngunsyen nang komdao, tsom-pom nang nange kux ang achangdao. Athax kwome nang ang kox angkya kwom tsangtsa hia haxtok boma mama chemchu müntüi.

¹⁹Kwom zi ang taxtom, tütali le thüichu hwonhüi! Kwom haxtokbu münlaxle dan taxtox. Kwom khünak tamchu kwom haxtokbu shaklax ilaxle kwom ang süt wüi fahüi. Kwom wanghom da ang achangüi ilaxle kwom haxtok a chix kux angwüi naxngo. Kwom ozün ma ngo ang tsax wüi laxhüi üntoxle kwom haxtok ma sai ang tsaxli wüi laxhüi.”

²⁰Jusep-e wanghom hanpak ang Ijip haxtok komkaile shak. Ijip nok pangwüi hato ma haxtoktok hang angkya otsang tuita ningle hüi; chemthüikoxle ija kaikuak-saonu a ziamale wüi hüi. Ofüima chaxwan pangwüi wanghom haxtok ang achangle pao.

²¹Ijip nok kaochi makhange kaochi kople Jusep da ang achangle pao.

²²Chixe zompu-zangpabu haxtok tata chishak le dantox. Ibu ang hwom haxtok hangle chang angkya olom hato chihüi, chemthüikoxle hwom chizitangle sütling koxle wanghompa-e hwom to humele hüi.

²³Jusep-e khünaknu ang thüi: “Hulax, athax kue hünzom tamchu hünzom haxtokbu wanghom kux ang shakdaoa. Ibu tsaxli koplax ilaxle ibu ma manzaile changlax.

²⁴Athax puamünle changkya zuma hünzome aga kha angkya othom tuita wanghom ang kox angkya changle. Othom ali a hünzome ma hanpak ang, tsaxli ang lax tamchu saxchusax le changüi.”

²⁵Hwome lan: “Nange kwom azündaoa; alixachong, nang kwom zongto tüle müidaoa ilaxle kwom a wanghom da ang achang angkya jao changle.”

²⁶Idaile Ijip haxtok ma manzai ma kopkya othom aga kha angkya othom tuita a wanghom tsyen ang chang angkya le Jusep-e tuita wanlom zing. Ija wanlom anyix kople otya ma wüi tüile. Zompu-zangpabu haxtok tata wanghom haxtok ang chichang.

²⁷Israel khünaknu a Goshen haxsha ma tingtok zingle ngo. Ikhato hwom tüle saxpu-luawang ang achang tamchu su-sabu huanuma pu-tsale hüi.

²⁸Jakop Ijip nok ma zanglao 17 ngo, ija athüt koxle chix 147 zanglao tsünlole ngo.

²⁹Chemtue chix zitu nguile hüipuix, Chixe sasün Jusep-e nyaklaxle thüi: “Nang chak a ku chungba ma sholax, ilaxle nange ku mang Ijip haxtok to münzule tsaohüi.

³⁰Ku apa hwom zukya khato wüi zubae le texpu; idaile ku apa hwom zukya khato wüi zu ang paile kat-hüi.” Jusep-e lan: “Kue, nange chemle akaxpuix ija ningle moküi.”

³¹Jakop-e thüi: “Nange ile wüi changüi le tsaodao.” Jusep-e tsao. Jakop-e chix lyading makhange Zang achuak.