Read Wancho Naga Pongwang Laipex 50 Bible Online

Pongwang Laipex 50 - Wancho Naga bible

Pongwang Laipex 50

¹Ifüima Jusep-e hopa hato hüi üntoxle chix füi tun apongle chix mangsop.

²Jusep-e hing twonkyabu ang hopa mang to chwonle chishan angkya hanpakma hing füi pa ang tom. Idaile hingtwonpabue Israel mang to hing füi pa.

³Itukux lax angkya olom daile hwome ija hingzuk mwot tsuak ang nyix 40 lax. Ifüima chix hanpakma Ijip nokbue nyix 70 mangtsale sop.

⁴Chemtue sopkya hia mangtsakya hanpak ashukle hüipuix, Jusep-e Farao homkha angkya nguakhobu ang thüi: “Chingchalaxle hünzome pi wanghompa hato ija kaxho apüikox:

⁵Apa zitu nguile hüikya zuma, kue chix mang, Kanan haxtok to chixe achwonle toxkya zukting ma akhün ang pao angkya changle le ku ang tsaotsüt ang tomle changdaoa, idaile ku apa mang zule toxlaxle chat ang pao ang tomhüi.”

⁶Wanghompa-e lan: “Nange tsaotsüt daokya ningle paolax ilaxle hünpa mang zule toxlax.”

⁷Ikhoma Jusep a hopa mangzu ang pao. Wanghom khwa angkya nguakhobu, chix wangshembu tamchu Ijip haxtok angkya lompabu Jusep füi tomle pao.

⁸Chix kako-homkha, hotüi-honao hwom tamchu hopa homkha mamix pangwüi chix füito pao. Naosombu, chun hia zwon ilaxle maihubu, hwom tata Goshen haxsha ma ngole nui.

⁹Man-kanlin kho ma ngakya hia mankho ma ngakya khünakbu chu chix füito hüi. Hwom a chongkya jenthom tuita ang achangle tüikya.

¹⁰Chemtue hwom Jordan zongma tachi, handünchi ma Atad kux tsaxnak nui alople changpuix, hwom tüle akhongle sople mangtsa, ilaxle Jusep ikhama hopa mangtsale nyix anüt zomzingle nui.

¹¹Atad haxtok ma ibu khünakbu sople mangtsa ngokya nguikya zuma Kanan noke thüi: “Ijip nokbu huanuma mangtsale sopkya changa.” Ikhoma ijongkha ang Abel Mizraim le nyak.

¹²Ile sasün hwome hopa hanpakma, chixe hwom füi akaxle toxdaokya ningle mok.

¹³Hwome chix Kanan chaxwan to pao ilaxle Makpelah haxtok ma akhün. Ija haxtok Mamre zui ma tüikya a zukting ang lax ang Abraham-e Hit nok Efron ma shakkya kha changkya.

¹⁴Hopa mangzu le toxlaxle Jusep, hotüi-honao hwom hia chix füito azuile hopa mangzuk ma wom ang hüikya khünakbu füi tomle chix a Ijip to chat.

¹⁵Hopa zikya füima, Jusep hotüi-honao hwome, amipongma hwome chix to chichang-chizangle hwon daokya mongma Jusep-e hwom to olüix khomle jangchangba le hwom abüt-abanle ngo.

¹⁶Idaile hwom Jusep hato ngui ilaxle thüi: “Hünpae chix zile paoüima, kwome nang to chichang-chizangle hwondaokya bama thailak tüikox-ole thüitoxkya ningle,

¹⁷athax kwome nang ma thaidaokya ija alak-hüile thüi ang nguipu. Chingcha üntoxle hünpa dapa hwom kwom to thailakkya tüihüi.” Hwome ija akax pongma Jusep sop.

¹⁸Hotüi-honao hwom chuwüi soplaxle chix chitong ma akhuxlaxle thüi: “Ikhato kwom a nang dapabu ningle changpu.”

¹⁹Ikoxle Jusep-e hwom ang thüi: “Hünzom taxza! Ku a Zang changkya hia?

²⁰Hünzome ku to oma hwonkya ningle sütdaokoxle chu, Zang ija omüi lom to laxpu ilaxle athax tüikya ningle khünaknu a e-ang chithole pu-tsa ang tompu.

²¹Idaile hünzom ojao taxza. Hünzom tamchu hünzom su-sa hwom pangwüi kue tuxüi.” Ile chixe kaxmüi zangwün makhange hwom ang mong azang ang tom.

²²Jusep a chix hopa homkha, ma haxnu-homsa pangwüi füi Ijip nok to ngole hüi; ile chix 110 zanglao tsünlo-khothole ngo.

²³Jusep-e Efraim hosu, chix zongto sutai kople ngünle tox. Manasseh sasün Makir naosom hwom ngaxchu Jusep chitong ma wüi pux-pai.

²⁴Ifüima Jusep-e hotüi-honao hwom ang thüi: “Athaxpi ku a ziüikhakha; Zang chixjao hünzom waile nguiüi ilaxle ija haxtok angkya hünzom chixe zunle paoüi.”

²⁵Ija ma Jusep-e Israel khünaknu ang tsao-atsütle akax: “Otsingtsingma thüipu, hünzom khui-waile Zang chix tomtata nguiüi, ilaxle hünzome ikhatokya ku za-tua hünzom füi tomle paokox.”

²⁶Ile Jusep zanglao 110 tsünlo-khothole ngolaxle zi. Hwome chix mang to shanle chipao angkya ongan müikya hinghai füi pa ilaxle chix a Ijip chaxwan ma zuk khato shole thom.