Read Wancho Naga Pongwang Laipex 9 Bible Online

Pongwang Laipex 9 - Wancho Naga bible

Pongwang Laipex 9

¹Zang-e Noa hia su-sa hwom to mohimanle thüi: “Simüi-limüi hüi tamchu chaxwannu awangle pu-tsa hüi.

²Chaxwannu angkya müinüjen pangnu tamchu alyangle ahamkya Zünmok pangnu, ilaxlechu tinu mong tokya nyax pangnu ma wüi hünzom thua zakya tüiüi. Ibu pangwüi kue hünzom kax ma laxle tüi tompu.

³Athax hünzome ibu sax ang tsuak, tamchu fumhing-laihing pangwüi sax ang tsuak; kue ibu pangwüi hünzom süt hanpak ang koxpu.

⁴Ikoxle oli tuita hünzome chisax angkya a: ija angkya aji mapao tanto müi chisaxüi; aji ma khüzün tüikya khoma kue ija taxsaxle abaxpu.

⁵Owawa khünak tsün laxle jangchang, kue chix ang sikngün fa angkya changpu. Ilaxle müi ojae khünak khüzün laxle changüihex, kue ija to mik max ang tomle jao sikngün faüi.

⁶Khünaknüsa a Zang lailaile zingkya changpu, idaile hwomkha angkya owawae mixhuak tuita mik amütle jangchangba mama mixe chix lang angkya changpu.

⁷“Hünzom ang, hwom su-sabue chaxwan thün awang angle ngo angkya hanpakma hwom sixlibu huanuma tüi angkya changle.”

⁸Zang-e Noa hia sasün hwom ang thüi:

⁹“Athax kue hünzom tamchu hünzom su-sa hwom füi ku Tsaotsüt thompu.

¹⁰O nüjen hia müinüjen: chempangsa khua angkya laile changpuix, ibu pangwüi füi chuwüi fünpu.

¹¹Ibu kaxhuak füi kue hünzom füi ku Tsaotsüt thompu: Kue tsaosaxpu, tinu-mualyem thama makhange tamchatle kue zünmok max ang müntomüi; chaxwannu tamchatle tichen-mualyem ma max ang müntomüi.

¹²Zünmok hia hünzom füikya ija oshuk chitüikya ku Tsaotsüt hanpak münwan ang,

¹³kue ku hapnu zangfwom ma danpu. Ija a chaxwannu füikya ku Tsaotsüt ang changüi.

¹⁴Chemtue kue zangding to zangfwom füi awang ang tom ilaxle ija ma nomlong laile changüihex,

¹⁵zünmok otuechu tinu-mualyemle max ang müntompu lükya hünzom füikya ku kaxtsao kue texle atatüi.

¹⁶Chemtue zangfwom ma nomlong laiüihex, kue ija ngünüi ilaxle chaxwannu angkya zünmok füikya oshuk chitüikya Tsaotsüt texle ataküi.

¹⁷Ija a zünmok pangnusa füikya ku tsaosüt münwan ang changüi.”

¹⁸Khua angkya thaikya Noa sasün hwom a Shem, Ham hia Jafet hwom bibi changkya. (Ham a Kanan hopa changkya.)

¹⁹Noa sasün hwom azom a chaxwannu angkya khünaknüsa putong hwom changkya.

²⁰Hwom hopa Noa a pongwang lükya grep manzaikya mix changkya.

²¹Chixe grepti-ju lingkya füima chix to grepti-jue tok, chix nyi-za sik, ilaxle nyihom ma chix nyi chilax homtoxle nguakle ngo.

²²Chemtue Kanan hopa Ham-e ija ngünle lax, chix laile pao ilaxle hotüi hia honao nyi hama wünle kox.

²³Ifüima Shem hia Jafet nyie nyi tuita lax ilaxle ija hwom suakto ma awexlaxle, ohua ma ngokya hopa to awunle kox ang nuakfüichi atsutle hüi ilaxle hopa to ija nyi füi chwople tox. Ija ngünüi daile aküile chihule hokhi laile pao.

²⁴Noa khangkho ngaile changkya zuma sasün naoshukpae chix to nyifüi chwople toxkya awanle lax.

²⁵Ikhoma chixe thüi: “Kanan to thuakzomkya naxtüi! Chix a hotüi hia honao nyi da ang ngoüi.

²⁶JOWANPA, Shem Zang achuak kox! Kanan a Shem zanpa ang ngoüi.

²⁷Zang-e Jafet pu-tsa ang tomhüi! Chix su-sa hwom a, Shem hwom füi tomle naxngokox! Kanan a Jafet da ang ngoüi.”

²⁸Tinu-mualyemle changkya füima Noa a zanglao 350 tsünlole ngo

²⁹ilaxle 950 zanglao nguikya ma chix zile pao.