Read Wancho Naga 2 Samuel 1 Bible Online

2 Samuel 1 - Wancho Naga bible

2 Samuel 1

¹Sol zikya füima Amalek nok to lütlaxle Dawid chat ilaxle Ziklag ma nyix-anyi nuile tox.

²Ofüinyix Sol pom tokhange naosün tuita ngui. Chix mongma aho ang chixe ma nyi akyet ilaxle khangto haxbu füi fu. Chixe Dawid hato hüilaxle chathua zakya ahole hax to akhux.

³Dawid-e chix ma atüi: “Nang ojong tokya nguipu?” Chixe lan: “Ku a Israel nok pom tokya paole azangkya mix changpu.”

⁴Dawid-e thüi: “Chempangle changpuix ku hama wünhu.” Chixe lan: “Kem süpahibu a zantam angkya zikle paole ilaxle kem khünakbu a huanuma langdaoa. Sol hia sasün Jonathan nyi chuwüi langdaoa.”

⁵Dawid-e chix ma atüi: “Sol hia Jonathan nyi zidaoale nange chem ma awan?”

⁶Ija mixsüne lan: “Ku a Gilbua haxnu ma asukya. Sol a chix pax ma sha laxle ngo ikoxle chix zanpabu mankho ma hia man-kanlin kho ma chix hato namle jao hüikya kue ngünle toxle.

⁷Ijama chix akhople hu, ku ngünle lax, ilaxle chixe ku nyak. ‘Ui, alixachong’ le ku tsa.

⁸Chixe ku owahexle atüi, ilaxle kue ku a Amalek nok changpule lan.

⁹Ijama chixe ku ang thüi: ‘Ikhato hüilaxle ku langtox fa! Ku a chisumüile maklax laxle ziüikhakha tüile.’

¹⁰Ikhoma ku chix hato hüilaxle langle toxdaoa, chemthüikoxle chix nguakkya füi tomle chix a zi angkya jaole kue ngünle toxle. Ifüima kue chix khang angkya khohom hia chix tsangtsa angkya khaxtok-khyep jule laxpu ilaxle ibu kue nang hato apüipu.”

¹¹Dawid ang mongma ilaxle chixe ma nyi akyet, ilaxle chix khünakbu noke manyinyi akyet.

¹²JOWANPA khünakbu Sol hia Jonathan tamchu Israel nokbu hanpakma hwom mang sople hansong kople süt saxling chitüile atsao, chemthüikoxle ija zanhok ma khünak müimamale lang.

¹³Dawid-e ija naosün, chix hato kaxho koplaxle nguikya mix ma atüi: “Nang ojong tokya hex?” Chixe lan: “Ku a Amalek nok changle, ikoxlechu ku a hünzom haxtok ma ngopu.”

¹⁴Dawid-e chix ma atüi: “Nange JOWANPAe zünle kopkya wanghompa chem mongchong laxle lang?”

¹⁵Ifüima Dawid-e chix khünak tuita sele lax ilaxle kaxtom koxle thüi: “Ija khünak langdao!” Ija mixsüne Amalek sün to chakmokle mak-kha,

¹⁶ilaxle Dawid-e ija Amalek sün ang thüi: “Nange alüile ija thama lomle laxlaxpu. Nange JOWANPAe kamle laxkya wanghompa ma chak füi langpule thüipongma wüi nange nang tha ajaodaoa.”

¹⁷Dawid-e Sol hia Jonathan hokhi mangtsale ija tsai ngao,

¹⁸ilaxle ija a Judah angkya khünakbu hama anwot-anole kox angkya kaxtom kox: (Ija a Jashar Laipex ma zale tüile)

¹⁹“Israel haxhuabu ma kem lompabu zile kox! Kem süpahi khama naomüi mong füikyabu nguakdaoa!

²⁰Ija kax Gath nok ma taxapuk chichangba Ashkelon tingjang lomnu to apukle taxchang. Filistia nok shekobu pwonla dong ang taxtom; songsari sacha hwom ang mongmüile chang ang taxtom.

²¹“Gilbua Haxnubu to watshoja jukya taxtüi; ija haxtokbu a haxza ang achangle naxngo! Chemthüikoxle naomüi hwom dibu jajapale ima anguak thomle; athaxpi Sol nyadi to ngaxchu münga füi fwotle atsaokya nox chitüi.

²²Jonathan hapnu a huanuma atsingkya, Sol changlo ma chingcha chitüile tüikya, mixtsak naomüibu dingsom, zanpabu mik amüt.

²³“Sol hia Jonathan nyi, mongkün chingchae awangkya nyi; ozün ma tüipongma chu tomtomle, zik machu tomtomle; ola pik to kai, chax tsak-zongto kaile.

²⁴“Israel shekobu, Sol mang soplax! Chixe hünzom to baxnat nyinu füi awunle thom ilaxle likwün hia hun füi aza-apuale thompu.

²⁵“Naomüi süpahibu nguakdaoa, hwom a zanhok ma langdaoa. Haxnukho to Jonathan mang ma tinle dantox.

²⁶“Ku nang mang soppu, ku tüita-naopa Jonathan; nang ku zongto chemtukux müikya dai! Ku tokya nang mongkün ohünotün, sheko tuita mongkün füi ngaxchu sümüile.

²⁷“Naomüi süpahibu nguakdaoa, hwom chang-paxbu dantoxdaoa laxli chitüile.”