Read Wancho Naga 2 Samuel 11 Bible Online

2 Samuel 11 - Wancho Naga bible

2 Samuel 11

¹Ifüi angkya tso-hi-wa zit ma, wanlom ningle wanghompa zan to kakya zanglao, Dawid-e, chix nguakax-wangkhobu hia süpahibu füi Joap a zan to akat. Hwome Amon nok zan to lüt ilaxle Rabbah tingnu hwople kop. Ikoxle Dawid chix tomtata a Jerusalem ma nui.

²Nyixta tsomfüie, Dawid jiple ngokya zolaxle chix wanghom homlo homkho to dong. Chix homkho to dongle ngopongma, sheko tuitae ti ajole ngokya chixe ngünle lax. She osün huanuma müile tüikya.

³Ikhoma chixe ija mixcha a owa changkya hex awan ang khünak apao, ilaxle she a Bathsheba, Eliam sasün, Hit nok Uriah kakonu changle le awan ang kop.

⁴Dawid-e she chix hato apüi angkya khünak tomle apao; hwome she chix hato apüi ilaxle she füi chix mongkün dong. (She a athax ile tutsyen paokya atsao laxle ngotan changkya.) Ifüima she a hom to chat.

⁵Ofüima she ma nao nguidongle chang ilaxle ija kax wanghompa Dawid hato kox.

⁶Ifüima Dawid-e Joap hato kaxho akat: “Hit nok Uriah ku hato awünhüi.” Ikhoma Joap-e Uriah a Dawid hato awün.

⁷Chemtue Uriah nguile hom aloppuix, Dawid-e Joap hia chix süpahibu othom müimüi tüilaxma tamchu azankya chempangole changle ngopuix le atüi.

⁸Ifüima chixe Uriah ang thüi: “Nang hom to chatlax ilaxle tam nazak laxlax.” Uriah chat, ilaxle Dawid-e chix hom to hingho akat.

⁹Ikoxle Uriah hom to chichat homtoxle chongwanghom zünkai ma wanghom nyetmixbu füi tomle pomtox.

¹⁰Chemtue Dawid-e Uriah a hom to chichatle pomkya kaxho koppuix, chixe Uriah ma atüi: “Nang hom to chinguile müimamale ngo füima athaxtix chatpu, büthüikoxle hom to chingui?”

¹¹Uriah-e lan: “Israel hia Judah khünakbu a zan to kale tsailo towüi, ilaxle Tsaotsüt Suak a hwom füi tomle wüi; ku lompa Joap hia chix okax-okhobu kothofa to pom zailaxle ngole homtüi. Ku a hom to chatlaxle saxlingle tamchu kako füi jip-pomle chemle changthoüi? Huxsa ma kue ija ningkya mwot otuechu münmokle kue tsaosaxpu!”

¹²Ikhoma Dawid-e thüi: “Jangchang thüiningle anyix ima ngole toxdao. Kue nang ngainyix wüi chatle zantam to chat ang koxüi.” Ikhoma Uriah a ija nyix hia ofüinyix Jerusalem ma nuile tox.

¹³Dawid-e chix a fongsax ang se ilaxle ju ang atok. Ikoxle ija ja chuwüi Uriah hom to chichat; itülüi toxnyinu nom laxle wanghompa nyetmixbu nui ma wüi jip.

¹⁴Ofüinop Dawid-e Joap hato laiza tuita za ilaxle ija chixe Uriah chak makhange koxle akat.

¹⁵Chixe za: “Uriah a zan to tunpa ma sütle akatkox. Zan sümakya khama chix dankox ilaxle hünzom anongle chatkox, ile chix zan to max ang tomkox.”

¹⁶Ikhoma Joap-e tingnu hwople kople changpongma, ijongkha ma zan shix lünyi le thütkya khama chixe Uriah akat.

¹⁷Zanbu tingnu angkya lailaxle Joap süpahibu füi azan; züizüi Dawid okax-okhobu lang, iningle Uriah chuwüi lang.

¹⁸Ifüima Joap-e Dawid hato hwom achax-azanle ngokya kaxho awün,

¹⁹ilaxle chixe kaxho mix ang adangle fa: “Nange wanghompa hama zanhok bama pangwüi wünle tsuakkya füima,

²⁰chix mongtsik laxle nang ma atüiüi changtüi angpu, ‘Hünzom hwom füi azan ang tingnu hato soxle omalax ang hüi? Hwome pankho tokhange hünzom to san füi hap angkya changle le hünzome münthüt hia?

²¹Gideon sasün Abimelek chemle langpuix ija hünzome texle münatak hia? Ija a Thebez ma, pankho tokhange shekobue longnubu adütle thuple langpu. Büthüikoxle hünzom pan zuito nam lejao hüipu?’ Wanghompa-e nang ma ija atüile jangchang, chix kax to lankox, ‘Nang okax-okho Uriah chuwüi langdaoa.’”

²²Idaile ija kaxhomix Dawid hato chat ilaxle Joap-e chemle akaxlax-o thüipuix ile akax.

²³Chixe thüi: “Kwom füi a zan wüi sütsakle tüikya ilaxle hwom a kwom füi azan ang tingnu angkya kotho to laile hüipu, ikoxlechu kwome hwom a tingnu zünkai kople jwonle achatpu.

²⁴Ipongma hwome kwom to pankho tokhange sanhap füi happu, ilaxle nang okax-okhobu züizüi haple langpu; nang alixachong tuita Uriah chuwüi langdaoa.”

²⁵Dawid-e ija kaxhomix ang thüi: “Joap mong achenkox ilaxle chix ang mong taxma ta thüikox, chemthüikoxle zantam ma owapang mik max angkya hex nang chiawan. Chix ang anaolechu ifüi süzongle singlaxle ija tingnu kople tsuak angkya akaxkox.”

²⁶Chemtue Bathsheba-e she kakopa a langdaoata le atatpuix, she-e chix mangsop.

²⁷Chemtue ija mangsop din kaile changpuix, Dawid-e she a wanghom homlo to apüi; she a chix kakonu ang achang ilaxle chix ang sasün tuita puxle kox. Ikoxle Dawid-e mokkya ija mwot bama JOWANPA ang chix füi mong chimüi.