Read Wancho Naga 2 Samuel 12 Bible Online

2 Samuel 12 - Wancho Naga bible

2 Samuel 12

¹JOWANPAe Dawid hato ajepa Nathan apao. Nathan chix hato nguilaxle Dawid ang thüi: “Tinglong tuita ma tomwüi ngokya mixsün anyi tüikya; tuita a saxpu-luawang ikoxle tuita a tüimix nuakmix.

²Saxpu-luawang homkha ma maihu hia chunbu tüle tüikya,

³ikoxle tuimix-nuakmix hom ma a chixe shakkya chun hosa tuita wüi tüikya. Chixe ija to tüle atu-alitle hu ilaxle ija müi a chix homkha ma naosom füi tomwüile tsong. Chixe ija müi ang ma sütkhua ang süt hia ma wansa angkya ti ngaxchu kox ilaxle chix weho ma paile humele tuxle atsün. Chixe ija chun hosa to chix sacha tuita thama laxle jao kak-kün.

⁴Nyixta ija saxpu-luawang hwom hom to wünpa tuita ngui. Chix ang asüt angkya hanpakma ija hakpa süne ma müi langlaxle koxsele chitsu. Ikoxle ija nuakmix hom ma tüikya chun hosa langlaxle ma wünpa ang asüt ang fong achwon.”

⁵Dawid ang ija hakpa sün füi huanuma mongtsik ilaxle thüi: “Kue ozün ma tüikya JOWANPA mün ma tsaopu, khünak owae iningle mokdao laxpuix chix a mik max ang tom angkya changle!

⁶Iningkya mongtsik fang mwot mokkya mün to, chixe amütdaokya to othom alie nüile tsangthom angkya olom.”

⁷Nathan-e lan: “Ija khünak a nang changle. JOWANPA Israel nok Zang-e akaxkya kax a ija changle: ‘Kue nang Israel nok wanghom ang zingpu ilaxle Sol chak tokya khosünle thompu.

⁸Kue nang ang chix wangting hia chix kakonubu koxle changpu; kue nang a Judah hia Israel pangnyi to ole wanghom ang achangpu. Ibibi chuwüi nang zongto chingui thüiningle kue anaole chuwüi othom anyie nüile jao koxse.

⁹Jangchangthüiba nange ku kaxtom kax ma büthüikoxle chilax? Nange ija ochax büthüikoxle mok? Nange Uriah a Amon nok zan ma max ang tsanpu ilaxle nange chix kakonu nang kako ang laxpu!

¹⁰Athax, nangsu-nangsa hwom tsünthom to, tata zan to kale alang-ahuakle changüi, chemthüikoxle nang ku kaxtom kax ma chilax homtoxle Uriah kakonu a nang kako ang laxdaoa.

¹¹Kue tsaosaxpu, nang homkha angkya tütapue nang hato tingtui apüi angkya changle. Kue nang kakobu nang chak angkya pale paolaxle mix ang koxle changkya zuma nange ija nang mik füi ngün ang kopüi; ilaxle khünak ibue zangngai zezele hwom füi chinunchakkaile changüi.

¹²Nange huxsa ma zuile achaxpu, ikoxle kue Israel khünak noknue ngünle naxchang ang nang to kue ija zangngai mik ma ile chang ang tomüi.’”

¹³Dawid-e thüi: “Kue JOWANPA zongto ochax lyendaoa.” Nathan-e lan: “JOWANPAe nang to thailak tüidaoa; nang a münzipu.

¹⁴Ikoxlechu iningle chang üntoxle nange JOWANPA hato iningkya chinunchakkai mwot mokle ahokya khoma, nang naosa a ziüi.”

¹⁵Ifüima Nathan a hom to chat. Dawid-e Uriah mixnu laxkya mixchae ngünkya nao a tüle kakle max.

¹⁶Nao kakmüi angkya hanpakmale Dawid-e JOWANPA to jop. Chixe süt ngaxchu münsaxpule chisax-chiling ilaxle jafole chix nui to nguilaxle haxkha ma shuile zang angai.

¹⁷Chix khwa angkya nguakax-wangkhobu chix hato ngui ilaxle chix mong asom ang azong, ikoxlechu chixe hwom füi tomle chemchu chisax-chiling.

¹⁸Hatdang tuita füima ija nao zile pao. Dawid nguakax-wangkhobue chix hato ija kax kox ang tüle za. Hwome thüi: “Naosa ozün ma tüipongma ngaxchu chixe kem zangwün to ojao chiapa, keme nao a zidaoale chix hama chemle wünthoüi? Chixe ma to alüile tütalile nakchang!”

¹⁹Chemtue Dawid-e hwom tata füi huxsa ma zangwünle ngokya ngünpuix, chixe nao a zidaokya changale ajangle lax. Ikhoma chixe hwom ma atüi: “Nao zidaopia?” Hwome lan: “Zidaoa.”

²⁰Dawid haxkha ang ajong, tijo-chaktsux, khoshit-nasai, chix nyi-za lüile chang. Ifüima chix JOWANPA hom to paolaxle zangshwom. Chemtue chix hom to chatpuix, chixe süt-ju ilaxle alaikoxkya thüile süt sax.

²¹Chix nguakax-wangkhobue chix ang thüi: “Kwome ija tsing ang müntsuak. Nao ozün ma tüipongma nange sütngaxchu chisaxle soplanle ngopu, ikoxle chixchu zipule nang zolaxle sütling saxle changtüi!”

²²Dawid-e lan: “Changle. Chix ozün ma tüipongma ku soppu ilaxle chisax-chilingle atsaole ngopu. JOWANPAe ku to chingchalaxle nao zi tomtata ang müntomüi changtüi angpule thüt.

²³Ikoxlechu chix a zile paoün, ifüima kue chem hanpak ang chisax-chilingle atsao ngoüi. Kue nao chatle achat ang thoüile hia? Nyixta ku chix ngwotnui to nguiüi ikoxlechu chix a ku hato tam münchat.”

²⁴Ifüima Dawid-e hosheko Bathsheba jox ang süt. Chix she füi jip-pomle chang ilaxle she-e chix ang sasün tuita puxle kox. Dawid-e chix ang Solomon le mün kox. JOWANPAe naosa to tüle mongkün

²⁵ilaxle Nathan makhange ija nao ang Jedidiah, le mün kox angkya JOWANPAe kaxtom kox, chemthüikoxle JOWANPAe chix to tüle mongkün.

²⁶Ipongma Joap a chizakle Amon nok pongwün tingnu Rabbah füi azanle ngo, ilaxle ija hwople kop-hax khakha.

²⁷Chixe ija kaxho wün ang Dawid hato kaxhomix tuita awünle thüi: “Kue Rabbah to single hwom tilaxnui koptsuakdaoa.

²⁸Athaxpi nang süpahibu mama asoxlaxle ija tingnu to singlax ilaxle nang jaojaoe ija hwople koplax. Kue ija tingnu kopkya bama tütali münchong laxse müntsu.”

²⁹Ikhoma Dawid-e chix süpahibu afox, Rabbah to ka, ija to sing ilaxle ija hwople kop.

³⁰Amon nok baozang Molek chapa khang ma tüikya hun khohom, tuak 35 tukux lixkya, iboma mama-mama likwünbu Dawid-e kop. Ibu likwünbu Dawid-e chix khohom ma apüt. Tingnu angkya tuina chixe huanuma tsui lax,

³¹ilaxle pünzüt-bit, kho hia jan wafax, ibu füi hwom nok ang mwot amok, ilaxle hwom ang haxhuak long zing angkya mwot atsangle amok. Mama mama Amon nok tingnubu tokya khünakbu ang chuwüi chixe ile mwot-tsang amok. Ifüima chix tamchu chix khünakbu Jerusalem to chat.