Read Wancho Naga 2 Samuel 13 Bible Online

2 Samuel 13 - Wancho Naga bible

2 Samuel 13

¹Dawid sasün Absalom ang sün jo müikya sacha naocha ma tuita tüikya. Amnon, manunu sa, Dawid sasün she füi mong akün.

²She tokya mongkün mongzalokyae chix a kak ang achang, chemthüikoxle ija naosa a chixe laxtsuak angkya olom ma chitüi; she a naochasa tuita daile owawa naosün füi apong-asaole chang ang chitomle thom.

³Ikoxlechu Amnon ang tüle huxtsing-loptsang zuikhui tuita Jonadab le tüikya. Chix a Dawid hotüi Shammah sasün changkya.

⁴Jonadab-e Amnon ang thüi: “Nang a wanghom sasün tuita, ikoxle nyixfokya to mongmalanle ngole ngünle. Chemtsai-chemkax tüipu?” Chixe lan: “Kue ku tuita-naopa Absalom honao naocha Tamar to tüle mongzalole.”

⁵Jonadab-e Amnon ang thüi: “Nang a kakle le atsing laxle lyading ma shuile ngolax. Chemtue hünpa nang to hu ang nguiüihex, chix hama thüilax, ‘Ku nao Tamar ku hato nguilaxle ku mike ngünle ku ang suisong saxkhale asüt angkya akaxkox. Kue she chak makhange song-khale changkya sui-sax saxsele sungle.’”

⁶Ikhoma Amnon a kakle le atsing laxle lyakho to jiple ngo. Wanghompa Dawid chix to hu ang ngui. Ipongma Amnon-e chix ang thüi: “Ikhato nguilaxle ku mike ngünle ku ang an zingle asüt angkya Tamar füi akaxkox.”

⁷Ikhoma Dawid-e chix homlo to Tamar hato kaxho koxle thüi: “Amnon hom to paolaxle chixe sax ang hidaole fongmok suisongle toxlaxkox.”

⁸She nguikya thoma Amnon a lyakho to shuile bang. She-e chix mike ngünle hidaole an zinglaxle ija atsan

⁹ilaxle jantik angkya an ibu chixe sax ang dokle kox, ikoxlechu chixe chisax. Chixe thüi: “Khünakbu pangwüi alaidao”, ilaxle hwom pangwüi laile pao.

¹⁰Ifüima chixe she ang thüi: “An ibu ikhato ku lya hato jenhüi ilaxle nange shole asüt-hüi.” An khua koplaxle she a chix hato hüi.

¹¹She-e ibu chix ang asütle ngopongma chixe she to künle kop ilaxle thüi: “Lyading to oman!”

¹²She-e lan: “Ile münchangüi. Iningkya zakkop mwot mok angkya ku taxatsang! Iningkya a khomtsikya mwot changpu!

¹³Kue tuto ku thün chemle ahoüi? Ilaxle nang chuwüi Israel tukha angkya jaojao pan thaile chang ang tomüi. Wanghompa füi zangwünle koplax, ifüima chixe ku nang ang koxüi jaojao.”

¹⁴Ikoxlechu chixe she zangwün to ojao chiapa, ilaxle she füi chix wüi tsak-zongle tüikoxle, chixe she towüi lüt ilaxle atsangle shing.

¹⁵Ifüima Amnon-e she thua tüle anule thüt; chixe she to mongkünle changkya to kaile she thua anu ang süt. Chixe she ang thüi: “Paoün!”

¹⁶She-e lan: “Münpao. Nange ku ile jwonle apaokya a athax mokdaokya to kaikya tsangmüt changpu!” Ikoxlechu Amnon-e she zangwün to ojao chiapa;

¹⁷Chixe chix huak dapa sele anop ilaxle thüi: “Ku miksho angkya ija mixcha shong-apaodao! She thwomle awütdao ilaxle ka hakdao!”

¹⁸Ija dapae she thwomle alai ilaxle ka hak. Tamar a alingkya nyilo tholaxle tüikya. Ija ningkya nyi-za a tui to majukya wangchasabue laxzaikya nyi-za changkya.

¹⁹She-e ma khang to haxbu füi fu, she nyi akyet, ilaxle she thün to chak füi khung laxle sopngale laile pao.

²⁰Chemtue hotüi Absalom-e she ngünle laxpuix, chixe atüi: “Amnon-e nang ang thünzak kop ang tompia? Ku nao, nang ang alüile mong taxma. Chix chuwüi nang zongto tuita-naopa changle, idaile ija bama owa hamachu taxwün!” Ikhoma Tamar a hotüi Absalom hom ma she tata mongtsik ashukle ngole hüi.

²¹Chemtue wanghompa Dawid-e ibu kaxzing atatle changpuix, chix ang huanuma mongtsik.

²²Honao Tamar to atsangle shingnünle thaikya khoma Absalom-e Amnon thua huanuma anu ilaxle zang ngaxchu chiwünle atsai.

²³Zanglao anyi füima, Efraim tinglong zui ma, Bal Hazor ma, Absalom-e chix chunbu omun zütle ngokya, ilaxle chixe wanghom naosom pangwüi ikhato ahyen.

²⁴Chixe wanghompa Dawid hato nguilaxle thüi: “Wanghompa! Kue ku chunbu mun zütle ngole. Nang ilaxle nang nguakax-wangkhobu ija pangpwon ma womkoxle huanuma müise!”

²⁵Wanghompa-e lan: “Ku sasün! Ile münchangüi. Kwom pangwüi jangngui thüiningle nang zongto huanu tingtui ang changüi.” Absalom-e atsang, ikoxlechu wanghompa mong chitsu ilaxle chixe Absalom ang chatlaxle akax.

²⁶Ikoxlechu Absalom-e Dawid atsangle thüi: “Müiüi, ikoxle ku nao Amnon thüingaxchu pao ang dan ang chami?” Wanghompa-e lan: “Chix chix pi büthüikoxle paoüi?”

²⁷Ikoxlechu Absalom-e chizakle atsang ngokya khoma Dawid-e Amnon hia chix sasün mamabu pangwüi Absalom füito pao ang dan. Absalom-e wanghom tuita hanpakma asukya fongsüt tuita achwon

²⁸ilaxle chix dabu ang adangle fa: “Amnon-e ju okhonguile lingkya to hule ngohüi, ilaxle chemtue kue kaxkoxle changpuix, chix lang kox. Ojao taxza. Ija bama hünlit kue laxlax angpu. Mongchong kox ilaxle cha-ao-mongsao taxtüi!”

²⁹Ikhoma dabue Absalom-e adangle fakya kax ma lax ilaxle Amnon lang. Ikhama tüikya Dawid sasün hwom mamabu a mankho ma nga ilaxle paole azang.

³⁰Hwom hom to chatle lomba to tüipongma Dawid hama hwome wün: “Absalom-e hünsa hwom pangwüi langdaoa: hwom owachu müntox!”

³¹Wanghom a ajong, mongma laxle chix nyix akyet, ilaxle chix alüile haxkha to tswonle awüt. Chix füi tomle ikhama tüile asukya chix dabue chuwüi ma nyi-za akyet.

³²Ikoxle Jonadab, Dawid hotüi Shammah sasüne thüi: “Wanghompa, hwome nang sasün hwom pangwüi münlang, Amnon tata langwüi. Amnon-e honao naochasa Tamar to chake twonle changkya füi makhange Absalom-e chix mik amüt angkya oshua-olom to hule ngokya nange chix mik chix thün ma wüi alangle changse.

³³Idaile hünsa hwom pangwüi langdaoale thüikya kax to taxong; Amnon tata zi wüi.”

³⁴Ipongma Absalom a paole azang. Ipongkhae zanhu mix ang ngokya süpahi süne haxnu chitokhange Horonaim tokya khünaknu othom chongkya tuita jule ngokya ngün. Chixe ngünkya bama chix paolaxle wanghompa hato kaxwünwang.

³⁵Jonadab-e Dawid ang thüi: “Kue akax daokya ningle, chubu a hünsa hwom nguile ngole.”

³⁶Chixe ija akaxkya kax ashukkya füi tomle Dawid sasün hwom nople hüi; hwom sop ang süt, ilaxle Dawid hia chix nguak-wangkho hwom chuwüi mongmaxle sop.

³⁷Absalom a paole, Geshur nok wanghompa Talmai, Amihud sasün hato ngui, ilaxle ikhato zanglao azom nui. Chix sasün Amnon hanpakma Dawid-e okuilole mangsop;

³⁹ikoxlechu chemtue chixe Amnon zikya alakle changpuix, chixe Absalom ngünsele mong makhange tüle sung.