Read Wancho Naga 2 Samuel 22 Bible Online

2 Samuel 22 - Wancho Naga bible

2 Samuel 22

¹Chemtue JOWANPAe chix zanpabu hia Sol chak tokya Dawid khosünle changpuix, Dawid-e Zang achuakle ija tsai ngao:

²JOWANPA a khowapa changpu; chix a shingmongkya ku zanhunui.

³Ku Zang a ku khowapa, ilaxle chix ma ku azangle ngopu. Chixe di lailaile ku to tukle thom; chixe ku khose ilaxle ozün ma thom. Chix a ku khosünpa; chixe ku kho awale tamchu chakmok-janlang chak tokya khosünle thom.

⁴Kue JOWANPA to nyak, ilaxle chixe ku zanpabu chak tokya khosün. JOWANPA achuak kox!

⁵Zikmüt-mangkho tichap ku akhople tüikya, thama tichape ku to ule hüi.

⁶Mikmüt thama ku akhople tüikya, ilaxle zuk-khae ku aman ang tsün.

⁷Ku sikngün pongma kue JOWANPA to nyak; Ku to fong ang kue ku Zang nyak. Chix zangshwom-hom ma chixe ku kaxzing atat; fonghüile ku akhongkya to chixe apa.

⁸Ipongma chaxwan to si ilaxle achen; zangdingkho chifünbu si ilaxle pope adün chemthüikoxle Zang ang mongtsik!

⁹Chix nakuabu makhange wünkhut thokle alai, chix wikha makhange zokle ashun wünchua hia longkhikbu fatle alai.

¹⁰Chixe zangdingkho akyet ilaxle hax to thai, chix cha fang ma nakkya zangfwom koplaxle.

¹¹Ozang füikya zünmok khoma chix pile; chix a zangwin ozang ma aham.

¹²Chixe chix to zangnak füi alumle kop; zangfwom tütkya, awangle ti, chix akhople;

¹³chix thüntho ma zangchangjep tokhange longkhikbu chuale lai.

¹⁴Ifüima JOWANPAe zangkho tokhange zangtsak-zangdungle chang ang tom, ifüi Khüthak Zang kaxzing atat ang kop.

¹⁵Chixe sanbu füi hap ilaxle chix zanpabu anyaple apao; chix zangchangjep thoto hwom zikle pao ang tom.

¹⁶Tinu jithong a zuazoxle dantox, ilaxle chaxwannu chifün a kotho-ngaizale dantox JOWANPAe chix zanpabu to sapongma ilaxle mongtsik füi hwom to awukle changpongma.

¹⁷JOWANPAe thakchi tokhange ku to chux ilaxle künle kop; chixe ku tinu kha tokya bele alai.

¹⁸Chixe a tsak-zongle tüikya ku zanpabu chak tokya azün ilaxle ku to miktsakle tüikyabu chak tokya— hwom a ku zongto huanuma tsak-zongle tüikya.

¹⁹Ku sikngün ma tüipongma, hwome ku to sing, ikoxlechu JOWANPAe ku khosünle kop.

²⁰Thomzün chak tokya chixe ku azün; chix ku füi mongmüile tüikya khoma chixe ku khosünle kop.

²¹JOWANPAe ku ang hingho kox chemthüikoxle kue chem supuix ijaja mok; ku ma oma chemchu chitüikya khoma chixe ku to mohiman.

²²Kue JOWANPA wanlom kax ma lax; kue ku Zang hato tok chiaho.

²³Kue chix wanlombu pangwüi tole hüi; kue chix kaxtombu kax ma chilaxle chitüitox.

²⁴Ku ma thaikya chemchu müntüi chixe awan, chemthüikoxle kue chisule moklaxle ku thai ang chitom.

²⁵Ilaxle kue supupu mokle changkya khoma chixe ku to mohiman, chemthüikoxle ku ma oma chemchu müntüile chixe awan.

²⁶O JOWANPA, nang to mongong thomle tüikya zongto nang mongong ma münthai, ilaxle komkaile sule tüikyabu komkaile müile.

²⁷Tsaothale tüikyabu zongto nang tsaothale le tüi, ikoxlechu chichang-chizangle tüikyabu zongto nang a zanpa tuita.

²⁸Puinaile tüikyabu nange sünle kop, ikoxle mongngam ma tüikyabu nang puinai ang tom.

²⁹JOWANPA, nang a ku zongto zangngai; nange ku zangnak paole sam ang tom.

³⁰Nange ku ang ku zanpabu to sing angkya janzüi kox ilaxle hwom zanhunuibu to ziakople lüt angkya tsak-zong kox.

³¹Ija Zang—chix mwot ma chemtukux thaikya chitüile supuix, chix kaxbu to chemtukux mongong tüikya li hex! Chix a di tuita thatha chix ma khangkhomnui lomkyabu pangwüi zongto a.

³²JOWANPA chix tata wüi Zang a; Kem ziakop pan long katuk a chix tata wüi.

³³Ija Zang a shingmongkya ku khangkhomnui changpu; chixe ku lomtang zazyen angkya chemchu chitüile zing.

³⁴Chixe ku cha a müikhisa sok ningle ozik tsuakle zing; haxhuabu to chixe ku khosünle thom.

³⁵Chixe ku ang zankat anole kox, ile kue atsakkya hapnu twon ang tsuak angkya hanpakma.

³⁶O JOWANPA, nange ku kho-awa ilaxle ku khosün; nange fongkya tokhange tix ku chongkya ang changle.

³⁷Nange ku kople pao ang chitomle sünthom, ilaxle ku tamchu chinguak.

³⁸Kue ku zanbu to achua laxle hwom to anao; kue hwom amütle machangba kue hwom twotle chitox.

³⁹Kue hwom to hongle anguak, ilaxle hwom tamchatle chizo; ku tunthoma hwom a lütdaokya ang achangle nguakle ngo.

⁴⁰Azan angkya tsak-zong nange ku ang koxpu ilaxle zanpabu to lüt ang tompu.

⁴¹Nange ku zanpabu ku tuntho angkya zikle pao ang tom; ku thua anule ngokyabu kue amüt.

⁴²Hwome fong angkya khünak lomle hu, ikoxle owae hwom khosünle chichang; hwome JOWANPA to nyak, ikoxle hwome nyakkya to chix chitsa.

⁴³Kue hwom zutle akhix, ilaxle hwom a haxbu ningle achang; lomnu-tang tokya haxthom to tingpupule kue hwom to ting.

⁴⁴Ku zongto tüile ngokya khünaknu chak tokya nange ku sün ilaxle kue jat-libu thakma apün-awangle chang ang tom; kue chitikkya khünakbu athax ku pünnusa ang achang.

⁴⁵Mixnokbue ku tunthoma akhux; ku zing atatkya zuma hwome ku kax ma lax.

⁴⁶Hwom mongchongkya samle pao ilaxle hwom zanhunuibu tokya abünle hüi.

⁴⁷JOWANPA ozün ma tüile! Ku khowapa achuak kox! Ku khosünle changkya tsak-zong füikya Zang chuak-chongkya apuk-kox!

⁴⁸Chixe ku ang zanpabu to lütkya kox; jat-libu chixe ku chitong to pui ang tom

⁴⁹ilaxle ku zanpabu chak tokya ku khosün. O JOWANPA, nange ku ang zanpabu to lütkya kox ilaxle chakmok-janlangle tüikya khünakbu chak tokya ku sünle thom.

⁵⁰Ikhoma kue jat-libu khama nang mün achuakpu; kue nang achuakle tsai ngaopu.

⁵¹Zang-e chix wanghompa ang zan to lütkya chongkya kox; chixe zünle kopkya mix to chixe chizakkya mongkün aho, othuithuima Dawid hia chix sixli hwom to a.