Read Wancho Naga 2 Samuel 3 Bible Online

2 Samuel 3 - Wancho Naga bible

2 Samuel 3

¹Sol to fongle hüikya hia Dawid to fongle hüikya khünakbu bama achax-azankya okuilole ngo. Dawid a sütsaktsak süzongzongle hüi ikoxle chix tsempabu a sünainai süshoshole hüi.

²Ibibi naosom hwom azok Dawid ang Hebron ma pux, tüichong naoli achwotle hwom a: Jezril cha Ahinoam makhange Amon pux;

³Karmel angkya Nabal-e dantoxkya thanucha Abigail makhange Kileab pux; Geshur wanghom Talmai sacha Makah makhange Absalom pux;

⁴Haggith makhange Adonijah pux; Abital makhange Shefatiah pux;

⁵Eglah makhange Ithream pux. Naosom hwom ibibi pangwüi a Hebron ma pux.

⁶Dawid süpahibu hia Sol to e-sele tüikya süpahibu bama chizakle zan laile ngopongma, Sol füito azüikyabu khama Abnar a süchongchongle janzüi tüikya mix tuita ang changle hüi.

⁷Nyixta a Sol sasün Ishbosheth-e Abnar ma honuchong Rizpah (Sol wangnucha), Aiah sacha füi jip-pomle changkya kaxhux fele kox.

⁸Ija zangwüne Abnar mong huanuma ama. Mongtsik laxle chixe thüi: “Kue Sol khohangle changfangfangle nange thütpia? Kue Judah hwom mwot mokle ngopule otsing tomtata ma nang mongto aopia? Hünpa Sol hanpakma kue e-sele ngokya pongwang nyix makhange, chix hotüi honao hwom, chix zuikhui ilaxle ku, kwome Dawid-e nang to lüt ang chitomle kho-awa thompu; ikoxlechu anyix nange ku ang mixnu tuita füi thaile changdaoale kaxhux fele changpuix nyi?

⁹Dawid-e Sol hia chixsu chixsa hwom chak tokya wangting pale paoüi ilaxle chix a Israel hia Judah pangnyi wanghompa ang changüi, ilaxle chixe kaochi haxsüt makhange kaochi haxsüt alople bakle apün angkya JOWANPAe Dawid füi tsaosaxdaoa. Athaxpi ija kax otsingtsing ang chiachang thüiningle JOWANPAe ku naxlang kox!”

¹¹Ishbosheth a Abnar thua huanuma za ilaxle anaole kaxfa tuita akax ang chitho.

¹²Abnar-e Hebron to ngokya Dawid hato ija zangwün füi kaxhomix akat: “Ija haxtok owae apünüi? Ku füi kaxfün tsuak hüi ilaxle Israel nok pangwüi nangchi to ahüi angkya bama kue nang to asun fang.”

¹³Dawid-e lan: “Müihule! Kue nang füi tsaithop-kaxthop tuita tüi angkya bama kaxfün laxüi; nange ku füi apong ang nguikya zuma Sol sasün Mikal ku hato laxlaxle nguihüi.”

¹⁴Ilaxle Dawid-e chu Ishbosheth hato ija kaxho füi kaxho mix apao: “Ku kakonu Mikal ku ang achatle laxhüi. Kue she lax angkya hanpakma Filistia nok khwon-nui 100 anguile jao zütle koxdaokya changpu.”

¹⁵Ikhoma Ishbosheth-e she a hokakopa Paltiel, Laish sasün, hwom hom tokya pao.

¹⁶Paltiel-e Behurim tinglong alople, lomjang fole sopngale she füito azüi. Ikoxlechu Abnar-e chix ang hom to chat angkya akaxkya zuma chix a hom to chat.

¹⁷Abnar a Israel nok lompabu hato ngui ilaxle hwom ang thüi: “Hünzome hünzom wanghompa ang Dawid laxsele kaiwüi sungle hüipu.

¹⁸Ija hanpakma hünzom ang oshua müikya athaxkha changle. JOWANPAe akax daokya ija kax texle ataklax: ‘Kue ku dapa Dawid a ku khünakbue Israel nok Filistia nok chak tokya khosünle kop ang twonüi ilaxle chixe mama zan-nok pangwüi chak tokya sünüi.’”

¹⁹Abnar-e Benjamin homjen angkya khünaknu füi chuwüi akax ilaxle Benjamin homjen hia Israel noke kaxtun tomkya kaxwün wang ang Dawid hato Hebron to apao.

²⁰Chemtue süntsa khünak koplaxle Abnar Hebron to Dawid hato nguipuix, Dawid-e hwom hanpakma fongkha.

²¹Abnar-e Dawid ang thüi: “Ku paoüi ilaxle athax Israel khünak pangwüi nang wangpün ang achangle ahüiüi. Hwome nang hwom wanghompa ang pongle kopüi ilaxle nange chem lompuix ija nange ataküi ilaxle nange haxtok pangwüi to o-le apünüi.” Dawid-e Abnar ang chix ozik-omüt chemchu müntüipox-ole tsaitsuak kaxtsuak laxle chat ang tom.

²²Ofüima Joap hia mama Dawid nguakax wangkhobu tuina tsui ang paokya ngui; hwom füi tomle tuinabu okhonguile laxlaxle apüi. Ikoxlechu Abnar a Dawid füi tomle Hebron ma chiasu, chemthüikoxle chix a Dawid-e kho-awale ziakop ang apao.

²³Chemtue Joap hia chix khünakbu nguipuix, Abnar a Dawid hato nguikya ikoxle chixe kho-awale ziakop ang tsanle apaodaoale Joap hama wünle kox.

²⁴Ikhoma Joap wanghompa hato ngui ilaxle atüi: “Nange ija chem mok? Abnar nang hato nguipu ikoxle nange chix ile büthüikoxle chat ang tom?

²⁵Chix ikhato nang dyen ang nguipu ilaxle nange mokle ngokya hia nang-ham nang-tüi pangwüi tikle lax angle nguipu. Ija nange bakle tsinglax ngopu!”

²⁶Dawid-e danle tox füima, Joap-e Abnar kop ang khünakbu tsanle akat, ilaxle hwome chix a Sirah tüküi tokya kople apüi; ikoxle ija bama Dawid-e ojao chitsing.

²⁷Chemtue Abnar Hebron to nguipuix, Joap-e pan nuakfüi to paolaxle chixe chongkya huxsa zangwün ang thüikya ningle aho, ilaxle ikhato chixe wok ma tople lang. Ile chixe Joap honao Asahel langkya khoma chix chuwüi lang.

²⁸Chemtue Dawid-e ija kaxho atatle changpuix, chixe thüi: “Ku ilaxle ku wangpünbue Abnar mik maxkya bama ojao müntik, ikoxlechu ija a JOWANPAe awanle ngole.

²⁹Ija bama sikngün Joap hia hwom homkha hato naxnguikox! Tsünthom to hwom homkha ma owawa fünma kak chichangba ngwon kak chichangba sheko mwot tata alankya chichangba zan to maxkya chichangba okhonguile sütling chikopkya, ibu khünak naxlaikox!”

³⁰Ile Joap hia honao Abishai nyie honao Asahel, azan pongma Gibeon ma langkya khoma Abnar to olüix khom.

³¹Ifüima Dawid-e Joap hia chix khünakbu ang ma nyizabu akyet angkya, nyikhwon awun angkya, ilaxle Abnar hanpakma mangsop angkya kaxtom kox. Panjo pongma wanghompa Dawid chix jaojao mang suak tokfüi ma aham.

³²Abnar a Hebron ma akhün, ilaxle zukting ma wanghompa akhongle sop, ilaxle khünaknu pangwüi sop.

³³Dawid-e Abnar mangtsale ile ngao: “Ongat tuita ningle Abnar mik max angkya büthüikya ma laipu?

³⁴Chix chak to khale kopkya chichang, chix cha ma kyeple kopkya chichang; chix a mütkopmix mikmüt ma maxdaoa!” Khünaknu tamchatle sisi sop.

³⁵Khünaknue Dawid ang süt asüt ang nyixtungtale azong, ikoxle chixe tsaosax: “Zanghan mik maxle machang tanto kue tütali saxlaxle jangchang JOWANPAe ku to chakmokle naxchang kox!”

³⁶Hwome ija atatlaxle mongmüi. Otsing tomtata ma wanghompa-e chem mokpuix ibu pangnusa füi khünaknu ang mongmüi.

³⁷Dawid khünaknue tamchu Israel nok pangnusae Abnar mikmüt bama Dawid ma tsaitox kaxfe le chang angkya müntüile awanle lax.

³⁸Wanghompa-e chix nguakax wangkhobu ang thüi: “Anyix Israel nok lompa akhokya tuita zile paole le hünzome münawan hia?

³⁹Ku a tuita JOWANPAe zünle kopkya wanghompa changle, ikoxngaxchu anyix ku ang zong chitüile changkya kue tikle laxle. Zarüiah sasün hwom a ku zongto huanuma wüi changnong pünthomle tüile. Hwome lomkya ningle JOWANPAe ija mütkop bama hwom to sikangünle naxchang kox!”