Read Wancho Naga 2 Samuel 5 Bible Online

2 Samuel 5 - Wancho Naga bible

2 Samuel 5

¹Ifüima Israel homjen pangwüi Hebron to nguilaxle Dawid ang thüi: “Kwom a nang hak tamchu nang aji changpu.

²Ami kwom wanghompa ang Sol pongma Israel nok zankat lom nange azuile hüipu ilaxle nange chix khünaknu azüi angkya tamchu hwom thakma apün-awang angkya JOWANPAe nang füi tsaole thompu.”

³Ikhoma Israel nok lompabu pangwüi Hebron to Dawid hato ngui. Chix huxsa ma hwom füi nokmüi ang chang. Hwome chix to münga füi pa ilaxle chix a Israel nok wanghompa ang achang.

⁴Chix wanghom ang achang pongma Dawid a zanglao 30 changkya, ilaxle chixe zanglao 40 apün-ada.

⁵Chixe Hebron makhange Judah nok thakma zanglao anüt lyetjang azok apün, ilaxle Jerusalem makhange Judah hia Israel nok pangnyi thakma zanglao 33 apün.

⁶Dawid hia chix khünakbue Jerusalem to single tingtakle nguile hüi. Ikhama ngokya Jebu noke Dawid-e hwom tingnu tingsumle kop ang münthoüile thütlaxle chix ang thüi: “Chemtuechu nang ikhato dong ang münthopu; nang a miksut nababue ngaxchu abax ang thoüi.” (

⁷Ikoxlechu Dawid-e Zaion angkya hwom zanhu nui kop ilaxle ija a “Dawid Tingnu”, le achangle pao.)

⁸Ija nyix Dawid-e chix khünakbu ang thüi: “Jebu nok to kue anukya tukuxle anukya mix ikhama tüicha? Hwom lang koxle wüi asule tüipuix nyi? Jangchangthüiba ti lom makhange donglaxle tingnu angkya miksut naba hia tüimix nuakmixbu to single changkox.” (Ikhoma ile akax: “Miksut naba hia chafai-chaknyai mix JOWANPA hom to ngui ang müntsuak.”)

⁹Zanhu nui kople changkya füima chix a ikhama ngo ilaxle ija ang “Dawid Tingnu”, le nyak. Chixe ija tingnu, hax ohua ma thomle tüikya handünchi kao ma hax thokle awang thomkya makhange owang wanglaxle akhople zingle pao.

¹⁰Othuithuima chix a sisile tsak-zongle chang, chemthüikoxle Khüthak JOWANPA chix füi tomle womle tüikoxle.

¹¹Tair nok wanghompa Hiram-e Dawid füi thajua ma alüixle mwot mok; chixe wanghom homlo zing angkya hanpakma Dawid ang Sedar püntho, long hia pün füi hom zaile kox angkya zingpabu kox.

¹²JOWANPAe chix Israel nok wanghompa ang achangkya ilaxle chix wangting tüle ahak-aluale chang ang tomkya a tuita chix khünaknu hanpak changpule Dawid-e awanle lax ang kop.

¹³Hebron angkya Jerusalem to achexle changkya füima Dawid-e danucha hwom hia kako mamabu chuwüi lax, ilaxle chix sasün hwom sheko hia lükabu chatle chuwüi pux-paile chang.

¹⁴Ibibi naosom hwom a chix ang Jerusalem ma ngün: Shammua, Shobab, Nathan, Solomon,

¹⁵Ibhar, Elishua, Nefeg, Jafia,

¹⁶Elishama, Eliada, ilaxle Elifelet.

¹⁷Filistia nok hama Dawid wanghompa ang kamkya wünle kox, ikhoma hwom süpahibu chix kop ang pao. Chemtue Dawid-e ija kax atatle laxpuix, chix a tsaswot tholaxle zanhule ziakop thomdaokya nui to pao.

¹⁸Filistia nok Refaim haxsha to nguilaxle ija kop.

¹⁹Dawid-e JOWANPA ma atüi: “Kue Filistia nok to chising hia singüi? Nange ku ang hwom to lüt ang chitom hia tomüi?” JOWANPAe lan: “khaxa, singkox. Kue nang ang wüi lüt ang tomüihex!”

²⁰Ikhoma Dawid a Bal Perazim to pao ilaxle ikhato Filistia nok to lüt. Chixe thüi: “JOWANPA a ku zanpabu to chwople tichong-mualyemkya ningle hüi.” Ikhoma ija nui ang Bal Perazim le nyak.

²¹Chemtue Filistia nok paole azang ang azongpuix, hwome hwom baozang chapabu danle tox, ibu a Dawid hia chix khünakbue tswonle pao.

²²Ifüima Filistia nok Refaim to chatle anaole chuwüi ija haxsha amle kop.

²³Anaole chu Dawid-e JOWANPA füi zangwün ilaxle chixe Dawid kax to lan: “Hwom to imakhange taxsing, ikoxle khuakhople ahamlax ilaxle mama chitokhange hwom to sing ang balsam püntong zui ma achwonlax.

²⁴Chemtue nange pünkho ma zankat zing atatüihex, ipongma singkox chemthüikoxle Filistia nok to lüt ang ku a nang thoto wüi achale lengo angkya changle.”

²⁵JOWANPA kaxtom ningle Dawid-e mok ilaxle Geba angkya Filistia nok Gezer to jwonle apao ang tho.