Read Wancho Naga 2 Samuel 8 Bible Online

2 Samuel 8 - Wancho Naga bible

2 Samuel 8

¹Hidaole homkya füima wanghompa Dawid-e Filistia nok to tamchatle sing, hwom to lüt ilaxle haxtok ma oshuk chitüile apün-awang.

²Ifüima chixe Moab nok to lüt. Chixe kople thomkyabu hax ma jip ang tom ilaxle hwom mixhuak azom kha angkya anyi a langle awüt. Ikhoma Moab nok a chix wangpün a achang ilaxle chix ang süithale hüi.

³Ifüima chixe Zobah angkya Siria nok haxtok angkya wanghom to chixe lüt. Wanghompa a Rehob sasün Hadadezar changkya. Hadadezar a Eufrat shuakuxchi haxtok to chatlaxle apün ang paole asu pongma ija ile chang.

⁴Dawid-e chix kux 1700 man füikya süpahibu ilaxle 20000 cha ma azankya süpahibu ang achang. Chixe man-kanlin 100 ma hanpak ang tüi ilaxle man mamabu bakle hongle afai.

⁵Chemtue Damaska angkya Siria noke wanghompa Hadadezar to fong ang süpahibu akatle changpuix, Dawid-e ija to sing ilaxle 22000 khünak lang.

⁶Ilaxle chixe hwom haxsüt to süpahibu pom zai ilaxle hwom chix wangpünbu ang achangle chix süitha ang tom. Pangnu chito JOWANPAe Dawid ang wüi lüt ang tom.

⁷Hadadezar nguakax-wangkhobue twonkya hun dibu Dawid-e hwople kop ilaxle ibu a Jerusalem to apüi.

⁸Hadadezar-e apünle ngokya tingnu Betah hia Beruthai angkya wi-jan chuwüi chixe huanuma kop.

⁹Dawid-e Hadadezar süpahi to lütkya Hamath nok wanghompa Toi-e atatle lax.

¹⁰Ikhoma chixe obithomthom ma hexle azanle hüikya Hadadezar to Dawid-e lütkya bama chix ang mongmüikya kaxho kox ang chix sasün Joram Dawid hato akat. Joram-e Dawid hato hun, khop hia wi-janbu makhange zingkya hinghobu kat.

¹¹Wanghompa Dawid-e ibu a zangshwom pongma twon angkya hanpakma atsaole dan. Ibu füi tomle chixe mixnok tingtakle changpongma kopkya khop-jan hia hunbu chuwüi atsaole dan.

¹²Chixe ibibi nok tingtak: Edom, Moab, Amon, Filistia, üntoxle Amalek—ilaxle chixe Hadadezar kux tsui kopkya kha angkya chuwüi tüikya.

¹³Humnu Haxsha ma 18000 Edom nok langlaxle chatkya füima sisile Dawid mün a fuale pao.

¹⁴Edom nok pangkha towüi chixe süpahibu pom zai ilaxle khünaknu a chix wangpün ang achang. Pangnu chito wüi JOWANPAe Dawid ang wüi lütkya kox.

¹⁵Dawid-e Israel nok pangwüi thakma apün ilaxle chix khünak noknusa to tomwüi ajit-awale tamchu changle apün-awang.

¹⁶Zarüiah sasün Joap a chix süpahi khama lompa tuita changkya. Ahilud sasün Jehusafat a kaxkhün kopmix mwot ma thom;

¹⁷Ahitub sasün Zadok hia Abiathar sasün Ahimelek nyi a nguapa changkya; Seraiah a khwa ma chakzapa.

¹⁸Jefuneh sasün Benaiah a Dawid nyetmix tüichong ilaxle Dawid sasün hwom a zompu-zangpabu changkya.