Read Wancho Naga 1 Wanghombu 10 Bible Online

1 Wanghombu 10 - Wancho Naga bible

1 Wanghombu 10

¹Sheba nok wangchanue Solomon mün fuale wünkya atat, ilaxle chix to atuakle wan ang Jerusalem to ngui.

²She füi tomle danuchabu huanuma laxlaxle she ngui, ilaxle ongan müikya münga, likwün hia okhonguile hun, ibu füi hünzing laxle utbu füi ngui. Chemtue she-e Solomon füi apongle changpuix, she mongto texle atakkyakya pangwüi chix ma atüi.

³Chixe ibu pangwüi to lan; chix zongto ibu awanle fa ang khosamkya tuita ngaxchu chitüi.

⁴Sheba nok wangchanue Solomon hwon-je atatle lax tamchu chixe zaile alaikya wanghom homlo ngünle lax.

⁵Chix tsap ma shemle fakya sütling she-e ngünle lax; chix nguakax wangkhobu hom-pung tüle müikyabu ngünle lax, wanghom homkha sütmwot tüle müikya hia wanghom homlo ma sütmix mwotmixbu tamchu hwome awunkya nyizabu, fongkhat ma chix to humele fakya dabu üntoxle chu Zangshwom-Hom ma chixe koxkya tö, ibu pangwüi ngünle lax. Ibu ngünlaxle zakdün jao alakle abüt.

⁶She-e wanghompa Solomon ang thüi: “Kue kwom chaxwan to nang bama tamchu nang je-hwon bama atatle laxkya otsing tomtata changdaongün a!

⁷Ikoxlechu onui alople nguilaxle ku mik tomtatae ibu pangwüi ngünle machang tanto kue münongkya. Ikoxle kue atat ang kopkya a ibu süifi süitex ngaxchu münchangdao ngün-a; nang je-hwon hia tuina ku hama wünle fakya ngaxchu huanu changngoüna.

⁸Nang kakonubu chemtukuxkya shomüichabu hex!

⁹JOWANPA nang Zang achuak kox Nang Israel nok wanghom ang achang laxle nang füi chix mongzom ibukux müipule ahodaoa, chemthüikoxle Israel hanpakma tüikya chix mongkün a oshuk chitüikya changle, ikhoma nange chix wanlom to laxle sukya kaxfün thom angkya hanpakma chixe nang wanghom ang zingpu.”

¹⁰She-e apüikya she hingho ibu Solomon ang kox: Hun tuak 4000, ilaxle ongan müikya münga hia likwünbu huanuma kox. She-e chix ang koxkya ongan müikya münga ibu a, chixe chemtuechu mix hingho ipongpongle tümakoptox le tüikya.

¹¹Ofir tokhange hun apüikya Hiram khuae junipar pün hia likwünbu huanuma apüile kox.

¹²Junipar pün makhange wanghompa-e Zangshwom-Hom hia wanghom homlo ma lax angkya thongnu, fakngom üntoxle chix tsaipabue lax ang thuaput-waxmaibu zing. Anyix kople ija ningle junipar pün chemtuechu chihüi üntoxle ngün ang chikop.

¹³Wanghompa Solomon-e ma wanghom homlo zai ang thomkya mwot-kat kha angkya hingho she ang amuamuale huanuma kox, iboma ngaxchu Sheba nok wangchanu ang she-e laxse tsukya ajuju pangwüi koxle apao, ifüima ma dabu koplaxle she a ma chaxwan to chat.

¹⁴Hun shak-sünle changkyabue koxkya süi hia thalex-juatai ma kopkya olüi tamchu Arab nok wanghombue apüikya süi tok to onüi

¹⁵wanghompa Solomon-e zanglao to hun otuak ma 23, 000 pong kople ngo.

¹⁶Solomon-e chongkya-chongkya dibu 200 zing, ilaxle ibu pangwüi to hun tuak anüt pong füi lile chwop.

¹⁷Chixe hixkya dibu chuwüi 300 zing ilaxle ibu pangwüi to hun tuak anyi pong füi lile chwop. Chixe di ibu pangwüi Lebanon fao ma tüikya Homnu tuita ma thom.

¹⁸Chix ang wanghom tüntong chuwüi chongle zingkya tuita tüikya. Ija jongta kha ang luakzong füi zing ilaxle mama pangwüi khato müikya hun füi chwop.

¹⁹Ija tüntong a chifün azok donglaxle zaile tüikya. Chifün otun ma tiale mailang zingle tüikya; mailang pangwüi 12 tüikya. Ija tüntong nuakfüichi ma maihupong okhang zingle tüikya, ilaxle chaklwotnui atale mailang zinglaxle tüikya. Ija lailaikya wanghom tüntong owa wangting tochu chitüi.

²¹Solomon ti ling wansa pangwüi hun füi zingle tüikya, ilaxle Lebanon fao ma tüikya Homnu angkya tiklak pangwüi hun füi zingkyakya wüi changkya. Khop a ojao chiawon, chemthüikoxle Solomon din to khop a wünlixle chitwon

²²Chix ang Hiram khua füi tomle aham ang tinu mongto aham angkya khua tüikya. Chix khua a zanglao azom obaba ma hun, khop, luakzong, müinak hia müisabu koplaxle chatle aham.

²³Wanghompa Solomon a wanghom pangwüi füi jetüi-hwonlang tamchu ahak-aluale tüikya.

²⁴Zang-e chix ang koxkya je-kax to apa ang chaxwannu pangwüi chix hato nguisele tsu.

²⁵Chix hato ahüihüi pangwüi hingho-chaktwon ang: khopjan, hun, nyi-za, chang-hi-pax, ongan müikya münga, manbu hia mantsakbu apüile zangpua foto ngui.

²⁶Solomon-e süpahibu 1400 man-kanlin makhange azan angkyabu ilaxle 12000 mankho makhange azan angkyabu le zingle thom. Jerusalem ma züizüi toxlaxle mamabu a tingnu-tingnu to tiale athong ang tom.

²⁷Chixe apün-awangle changpongma, Jerusalem ma, khopjan hia hun a long bütale nok chak towüi tüile ngo, ilaxle Judah haxnu chitong to tüikya Saikomor pün lailaile sedar pünchu huanuma tüikya.

²⁸Wanghompa mwottsan mixbue Musri hia Silisia tokya man thalex,

²⁹tamchu Ijip nok tokya man-kanlin thalex mwot hwom chak ma kople thom. Hwome Hit hia Siria nok wanghombu füi man hia man-kanlinbu khopjan ngunkhix 600 pong ang hang.