Read Wancho Naga 1 Wanghombu 11 Bible Online

1 Wanghombu 11 - Wancho Naga bible

1 Wanghombu 11

¹Solomon mixnokchabu füi mongakün. Ijip nok wangcha bomachu chixe Hit, Moab, Amon, Edom ilaxle Sidon, ibu nok tokya shekobu chuwüi lax.

²Mixnok shekobu janglax thüiningle hwom hatochu mix baozangbu to acho-alit angkya hüi angkya daile mixnokchabu taxlax-o lükya JOWANPA kaxtom tüile ngongangale chixe mixnokcha ibu kako ang laxle apüi.

³700 wangchabu bomachu Solomon-e 300 wangnuchabu lax. Ibue chix ang Zang chito tok aho ang tom,

⁴ilaxle chemtue chix azule changpuix, hwome chix ang mixnok baozangbu to shwom ang tom. Hopa Dawid lailaile chixe JOWANPA, ma Zang to mongong chithomtsuak.

⁵Sidon nok baozangchanu Astarte, Amon nok ma nushix dongkya baozang Molek, ibu to chixe shwom.

⁶Hopa Dawid lailaile chitüi homtoxle chixe JOWANPA zongto ochax lyen ilaxle chix kax ma laxle chitüi.

⁷Jerusalem zongma handünchi angkya haxnu ma chixe Kemosh, nushix dongkya Moab nok baozang hia Molek, nushix dongkya Amon nok baozang nyi to shwom angkya onui zing.

⁸Chixe chuwüi, chix shekobu mixnokchabu pangwüie ma baozangzang to shwomle ongan müikya sobu zokle hia töbu koxle chang angkya hanpakma onuibu zaile kox.

⁹JOWANPA, Israel nok Zang chix hato othom anyi ma jao ngailaxle mixnok baozangbu to chishwom angkya akaxle chang koxlechu, Solomon-e chix kax to chiapa, ikoxle chix hato tok mix ahole pao. Ikhoma JOWANPA ang Solomon füi mongma,

¹¹ilaxle chix ang thüi: “Nange chaktung chaktungma ku füikya Tsaotsüt ama laxle ku kaxtombu kax ma chilaxle tüikya khoma, kue tsaopu, kue nang chak angkya wangting tswonle paoüi ilaxle nang nguakax wangkho tuitata ang ija koxüi.

¹²Ibachu, hünpa Dawid tokya chingchae kue ija nang ozün ma tüipongma chang ang müntom, ikoxlechu hünsae apün pongma ile chang ang tomüi.

¹³Ikoxle kue chix chak angkya wangting komkaile paoüile münchang, ikoxlechu ku dapa Dawid hia kue makux ang zingdaokya Jerusalem tokya chingcha khoma, kue chix chak ma oli-okan tuita danle toxüi.”

¹⁴Ikhoma JOWANPAe, Edom nok angkya wanghom tuita Hadad, Solomon füi zanpa ang achang ang tom.

¹⁵Ija thoto, chemtue Dawid-e Edom tingtakle changpuix, ipongma Joap, chix süpahi lompa ikhato mangzu ang paole tox; chix tamchu chix khünakbu Edom nok to lyet azok nui, ipongma hwome Edom nok angkya lükaka pangwüi lang,

¹⁷ilaxle Hadad hia Edom nok hopa dabu züizüi Ijip nok to paole azangle changkyabu tata chilangle ozün ma tox. (Ipongma Hadad a naosa ang tüikya.)

¹⁸Midi toxlaxle hwom a Paran to pao, ikhato hwom füi züizüi obo ang athüt. Ifüima hwom Ijip to ka ilaxle wanghompa hato ngui. Wanghompa-e Hadad ang hidaole haxtok hia hom-hax tamchu osüt-olingbu kox.

¹⁹Hadad-e wanghompa a chix zuikhui amüikya ang achang, ilaxle wanghom hofex, wangchanu Tahpens honao Hadad ma kox.

²⁰She-e chix ang wanghomsa tuita Genubath puxle kox. Ija nao a wangchanue wanghom homlo ma humele wanghom sasün hwom füi tomwüile atsün.

²¹Ijip nok to tüipongma chemtue Dawid hia chix süpahi lompa Joap nyi zikya kaxho Hadad-e atatle laxpuix, chixe wanghom ang thüi: “Ku a kwom chaxwan to chatüi changa.”

²²Wanghompa-e atüi: “Büthüikoxle? Kue nang to hume ang chithole le hia? Ikhoma nang homchi towüi chat-sele mongtsu puixnyi?” Hadad-e lan: “Ku a chat angkya wüi changle.” Ilaxle chix a hwom chaxwan to chat. Edom nok wanghom ang ngolaxle Hadad a Israel nok zongto tüle shixkya zanpa ang achang.

²³Zang-e chuwüi Reson sasün Eliada, Solomon zongto anongle tüi ang tom. Reson a chix hopupa Zodah nok wanghompa Hadadezar chak tokya pao,

²⁴ilaxle pünpaobu othom ma lompa ang achang; (Dawid-e Hadadezar to lüt tamchu chix füikya Siria nok wanghombu mik amütle changkya füima ija ile chang.) Rezon hia chix füikya khünakbu Damaska ma ngo, ikhato hwome chix a Siria nok wanghompa ang zing.

²⁵Solomon ozün ma ngopongma chix a Israel nok zanpa tuita changkya.

²⁶Solomon zongto zanpa ang achangle paokya mama mixsün a Efraim ma tüikya Zeredah angkya Nebat sasün Jeroboam, chix nguakax-wangkho tuita ang ngokya mix changkya. Chix honu a Zeruah le amünkya tuita thanucha changkya.

²⁷Ija a alün-aloxle azankya pukax changle. Solomon-e Jerusalem handünchi kao ma hax thokle asha tamchu tingnu katukbu azünle zingle ngokya.

²⁸Jeroboam a mixtsak naomüi naosün tuita changkya. Chemtue Solomon-e chix süt-mwot ngünlelax, chixe Manasseh hia Efraim ma tüikya mwotmixbu pangwüi to hume angkya mwot kox.

²⁹Nyixta Jeroboam ang Jerusalem makhange chix tata ahamle ngopongma, Shiloh angkya ajepa Ahijah, kotho dongdongle tüikya lomnu ma dangjajale chix füi apong.

³⁰Ahijah-e chixe awunle kopkya nyiwun 12 ang achangle akyet,

³¹ilaxle Jeroboam füi akax: “Nang hanpak ang nyitho bün koplax, chemthüikoxle JOWANPA, Israel nok Zang-e nang ang thüile, ‘Kue Solomon chak tokya wangting paoüi, ilaxle kue nang ang homjen bün koxüi.

³²Ku dapa khoma tamchu Israel haxtok khama kue ku hanpak ang kamle kopdaokya Jerusalem tingnu hanpak ang kue Solomon ang homjen tuita dantoxüi.

³³Solomon-e ku awüt laxle mixnok baozangbu to shwomle changkya khoma kue ija ile mok angkya changle. Chixe Sidon baozangchanu Astarte, Moab nok baozang Kemosh; ilaxle Amon nok baozang Molek, ibu to shwom. Solomon-e ku kax ma münlax; chixe chisule mokdaoa ilaxle hopa Dawid ningle ku wanlom hia kaxtombu münthom.

³⁴Ikoxlechu Solomon chak angkya wangting kue komkaile münpao, ilaxle chix ozün ma ngokya kople kue chix ang apünle wüi ngo ang tomüi. Kue zünle kopkya Dawid, owae ku wanlom hia kaxtombu kax ma laxle tüidaopuix, chix khokho ma kue ile moküi.

³⁵Kue wangting Solomon sasün chak tokya paoüi ilaxle nang ang homjen bün koxüi,

³⁶ikoxlechu kue Solomon sasün ang homjen tuita tüi ang tomüi, ile changkoxle tix wüi, kue ku to shwom angkya hanpakma zünle kopkya tingnu Jerusalem makhange ku dapa sixlie apünle ngo ang kopüi.

³⁷Jeroboam, kue nang a Israel nok wanghom ang achangüi ilaxle nang mong atsutsu haxtok pangwüi thakma nange apün ang kopüi.

³⁸Nange ku kax ma komkaile laxle, ku dapa Dawid lailaile, ku wanlom ma ngolaxle ku kaxtombu kax ma laxle jangtüi thüiningle, ku a nang füi othuithuima ngoüi. Kue nang Israel nok wanghom ang achangüi ilaxle kue Dawid ang koxkya ningle, nang füima chuwüi nangsix-nanglie apünle ngo ang tomüi.

³⁹Solomon ochax khoma kue Dawid sixli hwom to sikangünüi, ikoxlechu othuithui male münchang.’”

⁴⁰Ikhoma Solomon-e Jeroboam lang ang tung, ikoxlechu chix a Ijip nok to wanghompa Shishak hato paole azang ilaxle ikhato chix a Solomon mazi-mazile ngo.

⁴¹Solomon mwot pangwüi, chix tsün hia chix je-hwon, ibu pangnu bama Solomon Pukax Laipex ma zale thomle.

⁴²Chixe a Jerusalem ma Israel nok pangnu thakma apünkya wanghompa ang zanglao 40 ngo.

⁴³Chix zi ilaxle chix a Dawid tingnu ma akhün, ifüima chix sasün Rehoboam chix man ma wanghompa ang achang.