Read Wancho Naga 1 Wanghombu 12 Bible Online

1 Wanghombu 12 - Wancho Naga bible

1 Wanghombu 12

¹Rehoboam Shekem to ka; ikhato chix wanghom ang achang ang shuakuxchi Israel nok pangwüi asox.

²Chemtue Nabat sasün Jeroboam, owa Solomon chak tokya azang ang Ijip nok to paole tüipuix, chixe ija kax atat ilaxle Ijip nok tokya chat

³Shuakuxchi tokya khünakbue chix se ang apao, ilaxle hwom pangwüi Rehoboam hato nguilaxle chix ang thüi:

⁴“Hünpa Solomon-e kwom to zongzong ma hwon ilaxle hün lixle ahünpu. Nange ibu hünlit achatlaxle kwom khangkho angaile jangchang, kwom a nang zongto nang kax ma laxkya nang wangpünnu ang ngoüi.”

⁵Chixe lan: “Nyix azom füima tamchatle nguihüi, izuma kue hünzom ang ku kaxlan faüihex.” Ikhoma hwom pao.

⁶Wanghom Rehoboam-e mixpa tüichong opange hopa Solomon nguakax wangkhobu ang mokle hüidaopuix, ibu füi azutle zangwün. Chixe atüi: “Kue ibu khünakbu kax to chemle lanüi?”

⁷Hwome lan: “Nange haxmüi zangmale hwom thothale changüile jangtex, hwom zongto müikya kaxlan koxlax, jangchang thüiningle hwome jento kax ma laxle nang thothale changüi.”

⁸Ikoxle chixe mixmüi tüichongbu hwon-nwot ahai ilaxle chix füi tomle tsongkya, athax chix nguakax wangkho ang ngole tüikya naosünbu hato pao.

⁹Chixe hwom ma atüi: “Hwom hünlit achafale akax ngokya khünaknu kax to kue chemle lanüi?”

¹⁰Ibue lan: “Nange hwom hama akax angkya kax a ija changpu: ‘Ku chak-khisa a apa khyadax füi ngaxchu chongle tüile!’

¹¹Hwom ang thüikox, ‘Apa-e hünzom ang hünlit chongkya koxpu, kue ija sisimix alixüi. Chixe hünzom to sansüi füi fitle changkya khama kue man to fitkya müikhwon zu füi fitle changüi.’”

¹²Nyix azom füima chixe sekya ningle Jeroboam hia khünaknu pangwüi Rehoboam hato ngui.

¹³Wanghompa-e mixmüi tüichongbu hwonpua-jenwot ahai ilaxle khünaknu füi,

¹⁴naosünbue anwot-anole fakya ningle sa-male zangwün. Chixe thüi: “Apa-e hünzom ang hünlit chongle ahünpu, kue ifüi sütsexle ahünüi. Chixe hünzom to sansüi füi fitpu; kue hünzom to man to fitkya müikhwon-zu füi fitle changüi!”

¹⁵Shiloh ang ajepa Ahijah-e Nabat sasün Jeroboam füi akax daokya ajekax changle ngai angkya hanpakma ile chang angkya a JOWANPA mongtex changkya. Ikhoma wanghompa-e khünaknu zangwün to ojao na chitha.

¹⁶Chemtue khünaknue, wanghompa-e hwom zangwün to na münthaüile ngünle laxpuix, hwome akhongle thüi: “Dawid hia chix homkha athaidao! Hwome kem hanpak ang chem alanle fadao? Israel khünaknu mahom-hom to fanhax! Rehoboam-e chix mo chixe alüile naxwünkox!” Ikhoma Israel khünaknu wanghompa füi apüile ajong,

¹⁷ilaxle chix a Judah haxtok ma tüikya khünaknu hanpak tata ma wanghom ang dantox.

¹⁸Ifüima Rehoboam-e mwotmixbu to hu-mix ang ngokya Adoniram Israel khünaknu hato tsanle apao, ikoxle hwome chix to long füi thuple lang. Ija thoto, nonokhaile Rehoboam man-kanlin ma nga ilaxle Jerusalem to paole azang.

¹⁹Ija makhange shuakuxchi angkya Israel nok Dawid wangting füi zan ang achangle pao.

²⁰Chemtue Israel khünakbue Ijip nok to ngokya Jeroboam chatle tüile le atat ang koppuix, hwome chix a khünaknu nguazua to se ilaxle chix a Israel nok wanghompa ang zing. Dawid sixli füito Judah homjen tata danle tox.

²¹Chemtue Rehoboam Jerusalem to nguipuix, chixe süpahi sümüimüi, Judah hia Benjamin homjen angkya 180, 000 khünak sele asox. Azan angkya tamchu shuakuxchi Israel nok tochu chixe wüi apün angkya chix mong ma hüi.

²²Ikoxle ajepa Shemaiah ang Zang-e,

²³Rehoboam hia Judah tamchu Benjamin khünakbu hato ija kaxho kox angkya akax:

²⁴“Hüntüi hünnao hwom, Israel nok zan to taxka. Hünzom pangwüi mahom-hom to chatdao. Chemle changngopuix ija a ku mongtex changle.” Hwom pangwüi JOWANPA kaxtom kax ma laxle mahom-hom to chat.

²⁵Israel nok wanghompa Jeroboam, Efraim haxnu chithong ma tüikya Sekem tingnu ma pan hia zanhunuibu zaile ziakop, ilaxle onox ma ikhama ngo. Ifüima chix pao üntoxle Penuel tingnu ma pan zaile ziakop.

²⁶Chixe chix füi alüile akax: “Athax ile changle, ku khünakbu Jerusalem to ka üntoxle ikhato JOWANPA ang tö koxle jangchang, hwome Judah wanghom Rehoboam füi nokmüile changüi ilaxle hwome ku a langle awütüi.”

²⁸Chixe Ibibile ajangle tsuakkya füima, chixe hun makhange maihupongsa anyi zing ilaxle chix khünaknu ang thüi: “Hünzom a zangshwom ang Jerusalem to müimamale tsailo to ka ngole. Israel khünaknu, Ijip nok tokya hünzom alaile apüikya baozangbu ikhama tüile, hulax!”

²⁹Chixe maihupongsa tuita Bethel ma dan ilaxle tuita a Dan ma dan.

³⁰Ilaxle Bethel hia Dan to zangshwom ang paole khünaknue ochax lyen.

³¹Chatle chuwüi Jeroboam-e haxkhobu to zangshwomnuibu zaile alai, ilaxle chixe Liwi homjen chichangkyabu khatokya zompu-zangpabu kam.

³²Judah nok angkya pangpwon lailaile, Jeroboam-e lyetbün achyet lükya nyixbün aga to tuita pangpwon alai. Bethel angkya tö-tsap ma chixe zingle alaikya maihupongsabu ang tö kox. Ilaxle chixe zaile alaikya zangshwomnuibu to zomzingle chang ang chixe zomzingmixbu dan.

³³Lyetnukua achyet ma nyixbün aga lükya, chixe tyakya hanpak nyix chix Bethel to paolaxle Israel khünaknu hanpakma, chixe alaikya pangpwon mün ma tö-tsap ma töbu kox.