Read Wancho Naga 1 Wanghombu 13 Bible Online

1 Wanghombu 13 - Wancho Naga bible

1 Wanghombu 13

¹Tötsap ma Jeroboam-e o kox angle ajong pongkhae, JOWANPA kaxtom ma Judah tokya ajepa tuita Bethel to ngui.

²JOWANPA kaxtom ma laxle ajepae ija tö-tsap to thuakzomle akax: “O tö-tsap, O tö-tsap, ija a JOWANPA kax changle: Dawid homkha ma Josiah le amünkya nao ngünüi. Nang ma tö koxle ngokya songsari tö-tsapbu ma zomzingle tüikya zompu-zangpabu chixe nang ding ma langüi, ilaxle chixe nang ma khünak za takle ashunüi.”

³Ilaxle ija ajepae chizakle akaxle pao: “Ija tö-tsap a akhixdaoüi, ilaxle ija ma tüikya wünjuakbu chiaküi. Ipongma, JOWANPAe ku makhange akax daokya changale hünzome tsing ang kopüi.”

⁴Chemtue wanghom Jeroboam-e ija atatle laxpuix, chixe ija aje to chak-khi hi ilaxle kaxkoxle thüi: “Ija khünak kopkox!” Ima wüi thuile wanghompa chak faile pao chatle chixe ija chak achat ang chithole tang.

⁵Allele tö-tsap a anyi ang achangle afile nguak ilaxle wünjuakbu hax to chiak. Ija a ajepae JOWANPA mün ma ajekya lailaile chang.

⁶Wanghompa Jeroboam-e ajepa ang thüi: “Chingchalaxle JOWANPA nang Zang to ku hanpakma zangjopkox ilaxle ku chak amüi angkya akaxkox!” Ajepae JOWANPA to zangjop, ijama wanghompa chak müile hüi.

⁷Ifüima wanghompa-e ajepa ang thüi: “Ku füi tomle hom to nguihax ilaxle tütali sax-lingle changhax. Nange chem mokdaopuix, ija hanpak ang kue nang ang hingho-najo-sa faüi.”

⁸Ajepae lan: “Nange ku ang nang tuina tomtom koxüile thüikox ngaxchu ku nang füito münhüi tamchu nang füi sax-lingle münchang.

⁹JOWANPAe ku ang chemchu chisax-chiling angkya, ilaxle ku nguikya lomnu makhange chichat angkya kaxtom koxle changdaoa.”

¹⁰Ikhoma ija ajepa a chix nguikya lomnu makhange chichat, ikoxle mama lomkua tokhange chat.

¹¹Ipongma Bethel ma azupa aje tuita tüikya. Ija nyix Judah tokya ajepa nguilaxle Bethel ma chempangle mokpuix ilaxle wanghompa füi chempangle akaxpuix, ibu pangwüi sasün hwom nguilaxle chix hama wünle kox.

¹²Ija aje azupae atüi: “Chix chatüi-e ochichi lomkua makhange lepuix?” Hwome chix hama lomkua ahole kox.

¹³Chix hanpakma mantsak tuita achwon angkya hwom füi akax. Hwome ile mok ilaxle chix ija kho ma ngalaxle

¹⁴Judah tokya ajepa lekya lomnu fole achexle pao. Ija mixsün a chix thoma zak pünnu zangkhung ma thungle nazak nui. Chixe atüi: “Judah nok tokya nguikya ajepa nang changcha?” Ija mixsüne lan: “Changle, ija a ku changle.”

¹⁵Chixe thüi: “Ku füi tomle hom to nguihax ilaxle tomle fong saxhax.”

¹⁶Ikoxlechu Judah tokya ajepae lan: “Ku a nange se-lomkya ningle nang füi tomle ngui ang münthoüi. Kue ikhato chemchu nang füi tomle sax-lingle münchangüi,

¹⁷chemthüikoxle ile chemchu chisax-chiling angkya JOWANPAe ku ang kaxtom koxle changdaoa tamchu ku a nguikya lomkua makhange chichat angkya akaxdaoa.”

¹⁸Ipongma Bethel angkya azupa aje-e thüi: “Ku chuwüi nang lailaikya ajepa tuita changpu, ilaxle JOWANPA kaxtaimixe nang a ku hom to se ilaxle fong asüt angkya ku füi akaxle changdaoa.” Ikoxle ija azupa aje a atsingle akaxkya changkya.

¹⁹Ikhoma Judah nok tokya ajepa ija azupa füi tomle chix hom to ngui ilaxle chix füi tomle fongsax.

²⁰Okhi tsap ma thungle tüipongma azupa aje hato JOWANPA kax hüi,

²¹ilaxle chixe Judah nok tokya ajepa füi akhongle akax: “JOWANPAe thüile: Nange chix kax ma münlax tamchu chix kaxtom ma münmok.

²²Ikoxle chixe taxsax taxlingle abaxkya nok to nang anongle chatlaxle sax-lingle changdaoa. Ija khoma ang a langüi ilaxle nang mang a hünzom kako zukting ma akhün ang müntomüi.”

²³Okhie fongsüt tsuakle changkya füima, azupa aje-e Judah nok ajepa hanpakma mantsak ma hünzingle achwon.

²⁴Chix a ija ma ngale pao, ikoxle lomba to mailang apong laxle chix lang. Chix man a lom ma danle thom ilaxle mantsak hia mailang nyi a apiale ajongle nui.

²⁵Owawa khünak imakhange leüima ija mang, ozuima mailang ajongle ngünle tox. Hwome Bethel to nguilaxle hwome ngünle toxkya kaxwün wang.

²⁶Chemtue azupa ajepae ija kax atatle laxpuix, chixe thüi: “Ija a JOWANPA kaxtom kax ma chilaxkya ajepa tuita changpu! Ikhoma, chixe ile moküile akax daokya ningle JOWANPAe mailang tsanle ahüilaxle chix mik amüt ang tompu.”

²⁷Ifüima chixe chix sasün hwom ang thüi: “Ku hanpakma ku mantsak achwonkox.” Hwome ija achwon, ilaxle

²⁸chix a ija ma ngalaxle kakya thoma man a hozui ma mailang hia mantsak hwom ajongle bang. Mailang-e mang chisax chichangba mantsak tochu chishing.

²⁹Ajepa azupae ija mang tswonle kop, ilaxle mangtsa üntoxle akhün angkya hanpakma Bethel to apüi.

³⁰Chixe ija hwom homkha zukting ma akhün, ilaxle chix füi tomle sasün hwomechu mangtsale thüi: “O tüita-naopa, ku tüita-naopa!”

³¹Mangzuk tsuakle chang füima ajepa-e sasün hwom ang thüi: “Chemtue ku ziüihex, ku ija zukting ma akhünkox ilaxle ku mang a chix mang ding ma athünle dankox.

³²Bethel angkya tö-tsap hia Samaria angkya tingnubu ma onui-onui to zangshwomnui zaile tüikyabu hanpakma chixe JOWANPA kaxtombu chempang koxle changdaopuix ibu pangwüi changle ngai angkya jaojao changle.”

³³Israel nok wanghompa Jeroboam, athaxchu chix ochax lom tokya mong chichat, ikoxle zangjang kako tokyabu, chixe zaikya zangshwomnuibu ma zomzing ang chizakle zompu-zangpabu kamle ngo. Chixe nguapa ang chix mong atsutsu zünle lax.

³⁴Ija ochaxe chix hato tamchu chix wangting hato olithule otam amüt angkya thama ahüi.