Read Wancho Naga 1 Wanghombu 14 Bible Online

1 Wanghombu 14 - Wancho Naga bible

1 Wanghombu 14

¹Ipongma Wanghompa Jeroboam sasün Abijah kak.

²Jeroboam-e chix kakonu ang thüi: “Owaechu chitsing angkya hanpakma nang sün aje ilaxle ajepa Ahijah ngokya Shiloh to paokox. Israel haxtok ma ku wanghom ang achanghüiole akaxkya mix a chix changkya changpu.

³Chix hato ankhao 10, an myet hidaole, ilaxle nax-ti pe tuita le laxlaxtoxlax. Künyi sasün chemle changüile atüilax, ijama chixe nang hama apuale faüihex.”

⁴Ikhoma she a Shiloh to Ahijah hato ngui. Ahijah a azukoxle mike ngün ang chithole tüikya.

⁵Jeroboam kakonu a she sasün kakle ngokya bama atüi ang nguile ngokya JOWANPAe chix hama apuale kox. Ilaxle JOWANPAe Ahijah hama, she füi chemle akax angkya hex apuale kox. Chemtue Jeroboam kakonu ikhato nguile changpuix, she-e owawahex naxthüile atsing,

⁶ikoxlechu chemtue Ahijah-e she nguile fülom alopkya zing atatle laxpuix, chixe thüi: “Donghüi. Nang a Jeroboam kakonu changle le kue awanle. Nange owawahex naxthüile omalax ang atsing? Nang hanpak ang kaxho tuita ku ma tüile.

⁷Paokox üntoxle Jeroboam hama, ija a chix hanpak ang JOWANPA kaxho changle le wünkox: Kue nang a khünak tu tokya zünlaxle ku khünaknu Israel nok thakma wanghompa ang kampu.

⁸Kue Dawid sixli chak tokya wangting laxlaxle nang chak to koxpu. Ikoxle ku dapa Dawid, owae ku kax ma bakle laxle hüipuix tamchu ku kaxtombu mokle hüipuix, ilaxle ku kaxtom kax ma lax üntoxle kue sule le athüithüi pangwüi mokle tüikya hex, ijaningle nang a chix lailaile chichang.

⁹Nang thoto apün-awangle hüikyabu to kaile nange ochax mwot chongkya mokdaoa. Nange ku awüt ilaxle jan-long makhange, shwom angkya hanpakma chapabu zingle alaikya tokhange nange ku ang mongtsik angkya alaidaoa.

¹⁰Ija khoma kue nang wangting hato thama apüiüi ilaxle nang sixli lükaka, naosa hia mixmüi chemchu chizünle, bakle langüi. Kue nang homkha füi owüiole atsaiüi; hwom a fao hwot pupule hwotle awütüi.

¹¹Nang homkha angkya owawa tingmong ma zile jangchang, chix man a hie saxüi, ilaxle owawa kotho to zile jangchang, chix mang a okun-olae saxüi. Ija, JOWANPA kue akaxdaoa.”

¹²Ahijah-e chizakle Ahijah kakonu füi akax: “Nang athax hom to chatlax. Nang tingmong to nguikya füi tomle hünsa ziüi.

¹³Israel khünaknu pangwüie chix mang sopüi ilaxle akhünüi. Jeroboam homkha angkya müile akhünle mangzu angkya a chix tata wüi changüi, chemthüikoxle JOWANPA, Israel nok Zang mongzom müikya a chix tata wüi.

¹⁴JOWANPAe Israel nok haxtok ma wanghompa ang Jeroboam wangting olithule amüt angkya mix danüi.

¹⁵JOWANPAe Israel nok to sikangünüi, ilaxle shuasa acha ham to sipupule she to si ang tomüi. Chixe hwom pupa hwom ang koxkya Israel nok fuakle awütüi, ilaxle Eufrat shuanu tale hwom chiakle asamüi, chemthüikoxle hwome baozangchanu Asherah chapa zaile alailaxle Zang ang mongtsik adündaoa.

¹⁶Jeroboam-e achax laxle Israel nok achax ang tomkya khoma JOWANPAe Israel danle awütüi.”

¹⁷Jeroboam kakonu Tirzah to chat. She hom ma nopkya füi tomle sasün a zile pao.

¹⁸Israel khünaknu chix hanpakma mangsop ilaxle JOWANPAe chix dapa Ahijah makhange akaxkya lailaile hwome chix akhün.

¹⁹Wanghompa Jeroboam-e amokmok pangwüi, chix achax-azankya hia chixe apün-adale changkya, ibu pangwüi Israel nok Wanghombu Pukax Laipex ma zale tüile.

²⁰Wanghompa ningle Jeroboam-e zanglao 40 apün-adale hüi. Chix zi ilaxle akhün ifüima chix sasün Nadap-e chix lüi.

²¹Solomon sasün Rehoboam, Judah ma wanghom ang achang pongma zanglao 41 nguile changdaokya, ilaxle chixe Jerusalem ma zanglao 17 apün. Ija tingnu a Israel haxtok khama, ikha makhange chix to shwom angkya hex-ole JOWANPAe zünle kopkya tingnu tuita changkya. Rehoboam honu a Amon nok tokya Naamah changkya.

²²Judah angkya khünaknue JOWANPA zongto ochax lyen ilaxle hwom pupa hwom to kaile hwom füi JOWANPA ang mongtsik angkya lai.

²³Hwome baozangbu to shwom angkya onui zaile kox, ilaxle long-thong küi laxle haxkho hia pünnu-zuanu tong to shwom angkya hanpakma Asherah chapabu zaile alai.

²⁴Pangnusa füi amakya ibu baozang shwomnuibu to sheko hia lüka ma tsangtsa hangkya khünakbu tüikya. Israel khünaknu ija haxtok to nguipongma mixnokbue chem mokpuix, iningkya zakkop mwot ibu pangwüi Judah khünakbue mok.

²⁵Rehoboam-e apünkya zanglao aga sütle changpongma Ijip nok wanghompa Shishak-e Jerusalem tingtak.

²⁶Zangshwom-Hom hia wanghom homlo ma tüikya tuinabu pangwüi chixe tsuile pao. Solomon-e zingkya hun dibu chuwüi chixe pao.

²⁷Ibu lüi ang wanghompa Rehoboam-e khop dibu zing ilaxle wanghom homlo zünkai nye angkya hanpakma hünlit laxle tüikya nguakax-wangkhobu ang nye ang tom.

²⁸Wanghompa Zangshwom-Hom to nguifofo, nyetmixbu dibue dibu kop, ilaxle ibu nyetmixbu nui to chatle apüile tox.

²⁹Wanghompa Rehoboam-e amokmok pangwüi Judah nok Wanghombu Pukax Laipex ma zale tüile.

³⁰Ibu din ma Rehoboam hia Jeroboam nyi jento tata füi azanlanle ngo.

³¹Rehoboam zi ilaxle Dawid Tingnu ma wanghom zukting ma akhün, ilaxle chix sasün Abijah-e chix mantswonle wanghom ang achang.