Read Wancho Naga 1 Wanghombu 15 Bible Online

1 Wanghombu 15 - Wancho Naga bible

1 Wanghombu 15

¹Israel nok wanghompa Jeroboam-e apünkya zanglao 18 nguile changpongma, Abijah a Judah nok ma wanghom ang achang,

²ilaxle chixe Jerusalem ma zanglao azom apün. Chix honu a Absalom sacha Moakah changkya.

³Chixe chuwüi hopa lailaile ochax lyen ikoxle hopu Dawid lailaile chix Zang JOWANPA kax ma laxle chitüi.

⁴Ikoxlechu Dawid khokho male JOWANPA chix Zang-e Jerusalem ziakople apün-adale thom angkya hanpakma Abijah ang sasün tuita kox.

⁵Hit nok Uriah bama thaikya boboma Dawid-e pangnu lom ma chix mong amüile chix kaxtombu kax ma laxle mok.

⁶Rehoboam hia Jeroboam nyi bama laikya zan Abijah tsün ma thule ngo.

⁷Ilaxle Abijah-e mokkyakya pangwüi Judah nok Wanghombu Pukax Laipex ma zale tüile.

⁸Abijah zi ilaxle chix a Dawid tingnu ma akhün, ilaxle chix sasün Asa chix man ma wanghom ang achang.

⁹Israel nok wanghompa Jeroboam-e apünkya zanglao 20 nguile changpongma, Judah ma Asa wanghom ang achang.

¹⁰Jerusalem makhange chixe zanglao 41 apün. Hopi a Absalom sacha Moakah changkya.

¹¹Hopu Dawid lailaile Asa-e JOWANPA zongto chem supuix ija mok.

¹²Chixe chix chaxwan angkya songsari baozangbu to shwomkya nuito tsangtsa hangle tüikya khünakbu, sheko hia lüka pangwüi jwonle apao, ilaxle chix tho angkyabue zingle bangkya chapabu pangwüi awüt.

¹³Hopi Moakah-e baozangchanu Asherah chapa zinglaxle chinunchakkai mwot mokle ngokya khoma she a wangchanu ang ngokya athai. Asa-e ija chapa dakle atsun ilaxle Kidron Haxbang to ija zokle ashun.

¹⁴Chixe songsari baozang shwomnuibu bakle ama ang chitho koxlechu Asa a chix tsüntsün ma JOWANPA to mongong shingmong lüwüi ngole le.

¹⁵Hopae atsaole thomkya tuina pangwüi chixe Zangshwom-Hom ma dan, ilaxle chixe hun hia khop tuinabu chuwüi atsaole dan.

¹⁶Hwome apün-awangle ngokya tuktuk ma Judah wanghom Asa hia Israel wanghompa Basha nyi tata füi jento azanle ngo.

¹⁷Basha-e Judah nok tingtak ilaxle Judan haxtok to nguikya hia laile pao angkya lom tsyen angkya hanpakma zanhu nui pan zaile ziakop.

¹⁸Ikhoma Zangshwom-Hom hia wanghom homlo ma toxkya khop hia hun pangwüi wanghompa Asa-e lax ilaxle züizüi chix nguakax wangkhobu makhange Siria nok wanghompa Benhadad hato ija kaxho füi tomle akat:

¹⁹“Apu-apa hwom lailaile athaxpi künyichu zuikhui ang achanghax. Ija khop hia hun a nang hanpak ang hingho changle. Idaile, chixe ku chaxwan ma thomkya chix süpahibu nyakle naxchatdao ang, athaxpi Israel nok wanghompa Basha füi nokmüi ang ngokya zak-hüi.”

²⁰Wanghompa Asa tsai-kax to wanghompa Benhadad-e müiüile lan ilaxle Israel nok tingnubu to sing ang chix süpahi lompabu hia süpahibu akat. Hwome Ijon, Dan, Abel Beth Makah, Galili Shinthuk-titung zui angkya haxtokbu, ilaxle Neptali haxtok pangwüi hwople kop.

²¹Chemtue ile changkya wanghompa Basha-e atatle changpuix, chixe Ramah ziakop ang pan zaile ngokya zak ilaxle Tirzah to pao.

²²Basha-e ija tingnu ziakop angkya hanpakma athünle thomkya Ramah angkya long hia pün, ibu pao angkya bama owachu chithai angkya hanpakma noknusa hanpak ang wanghompa Asa-e Judah haxtok pangkha towüi kaxpua apik. Long-pün ibu füi Asa-e Mizpah hia Geba, Benjamin haxsüt angkya tingnu ma pan zaile ziakop.

²³Wanghompa Asa-e chempangsa mokpuix, chixe mongnu alaile mokkya hia tinglongbu pan zaile ziakopkya pangwüi Judah nok Wanghombu Pukax Laipex ma zale tüile. Ikoxlechu chix azule chang füima süt ma kople chix a ofai-oshok khünak ang achangle pao.

²⁴Asa zi ilaxle Dawid tingnu angkya wanghom hwom zukting ma akhün, ilaxle chix sasün Jehusafat chix man ma wanghom ang achang.

²⁵Judah nok wanghompa Asa-e apünkya zanglao anyi lükya to, wanghompa Jeroboam sasün Nadap a Israel nok ma wanghom ang achang ilaxle chixe zanglao anyi apünle hüi.

²⁶Chix tho angkya hopa lailaile chixe JOWANPA zongto ochax lyenlaxle Israel nok a ochax lom to alyet.

²⁷Isakar homjen angkya Ahijah sasün Basha-e Nadap mik amüt angkya olom zinglaxle Nadap hia chix süpahibu Filistia nok angkya Gibbethon tingnu tingtakle changpongma chix lang.

²⁸Ija a Judah wanghompa Asa-e apünkya zanglao azom lükya to chang. Ikhoma Basha a Nadap man ma Israel nok ma wanghompa ang achang.

²⁹Janpüi ma chixe Jeroboam homkha khünak lang ang süt. JOWANPAe chix dapa, Shiloh angkya ajepa Ahijah makhange akax daokya lailaile, Jeroboam hwom homkha pangwüi langle awüt; tuitachu ozün ma chitox.

³⁰Chixe ochax lyenkya hia Israel nok ochax lom to alyetkya khoma Jeroboam füi JOWANPA, Israel nok Zang ang mongtsik, ikhokho ma ija ile chang angkya lai.

³¹Nadap-e chempang mokle hüidaolaxpuix ibu pangwüi Israel nok Wanghombu Pukax Laipex ma zale tüile.

³²Judah wanghompa Asa hia Israel nok wanghompa Basha nyie apün-awangle ngokya kople hokhi a tata zongto zan ang ngole hüi.

³³Judah nok wanghompa Asa-e apünkya zanglao azom lükya to Ahijah sasün Basha Israel nok ma wanghom ang achang. Chixe Tirzah ma zanglao 24 apün.

³⁴Chix thoma chemle Jeroboam tüidaopuix ilailaile chixe JOWANPA zongto ochax lyen ilaxle Israel nok ochax lom to alyet.