Read Wancho Naga 1 Wanghombu 16 Bible Online

1 Wanghombu 16 - Wancho Naga bible

1 Wanghombu 16

¹Hanani sasün ajepa Jehu füi JOWANPA akax ilaxle Basha hanpakma chix ang ija kaxho kox:

²“Nang a owa ngaxchu chichangkya ikoxlechu kue nang ku khünaknu Israel nok thakma lompa tuita ang achangpu. Ikoxle athax Jeroboam lailaile nangechu ochax lyenpu ilaxle ku khünaknu ochax lom to alyetpu. Ija ochax ngünlaxle ku ang mongtsik dongpu,

³ikhoma kue nang tamchu nang homkha, Jeroboam lailaile chilaxle awütüi.

⁴Nang homkha angkya khünak owawa tingnu mong ma zile jangchang, chix mang a hibue saxüi, ilaxle kotho to owa zilaxüihex, chix mang a okun-olabue saxüi.”

⁵Basha-e chempang mokpuix tamchu chixe mongnu alaile mokkya mwotbu Israel nok Wanghombu Pukax Laipex ma zale tüile.

⁶Basha zi ilaxle Tirzah ma akhün, ilaxle chix sasün Elah chix man ma wanghom ang achang.

⁷Basha-e JOWANPA zongto thaile ochax mwot mokkya khoma, Basha hia hwom homkha zongto chimüikya kaxho ija JOWANPA tokhange ajepa Jehu-e apüile kox. Chix thoma wanghompa Jeroboam-e achaxkya ningle chixechu ochax lyenle changkya khoma chichangle chixe Jeroboam hwom homkha pangwüi mik max ang tomkya khoma, chixe JOWANPA ang mongtsik adün.

⁸Judah wanghom Asa-e apünkya zanglao 26 ma, Israel haxtok ma Basha sasün Elah wanghom ang achang, ilaxle Tirzah ma chixe zanglao anyi apün.

⁹Zimri, chix nguakax-wangkho khama mixsün tuita, owa ang wanghompa man-kanlin tomtom to hua angkya hünlit koxle thomkyahex, chixe chix zongto chisumüikya mwot mok. Nyixta Tirzah ma, Elah a Arza hom ma jutokle tüikya. Arza a wanghom homlo to hu angkya mixsün changkya.

¹⁰Zimri homkha to dong, Elah langle awüt, ilaxle chix man ma wanghom ang achang. Ija a Judah wanghom Asa-e apünkya zanglao 27 lükya to ile chang.

¹¹Zimri wanghom ang achangkya janpüi ma Basha homkha pangwüi langle awüt. Hwom füikya haxnu-homsa tokya lükabu hia zuikhui hwom pangwüi lang.

¹²Ikhoma, ajepa Jehu makhange JOWANPAe Basha zongto chimüikya chempang akaxle changdaopuix, ija lailaile Zimri-e Basha hwom homkha khünak pangwüi langle awüt.

¹³Hwome chapabu shwomkya hia Israel nokbu ochax lom to alyetle changkya khoma, Basha hia chix sasün Elah nyie JOWANPA, Israel nok Zang ang mongtsik adün.

¹⁴Elah-e mokkya pangwüi Israel nok Wanghombu Pukax Laipex ma zale tüile.

¹⁵Judah wanghom Asa-e apünkya zanglao 27 ma, Zimri-e Tirzah ma Israel nok nyix anüt apün. Israel nok süpahibue Filistia angkya tingnu Gibbethon tingtakle tüikya,

¹⁶ilaxle chemtue hwome Zimri-e wanghompa mik amüt ang tungkya hia chix langle awütkya kaxho koppuix, ijaja ma wüi hwome hwom lompa Omri Israel nok wanghom ang achangle khuapu.

¹⁷Omri hia chix süpahibue Gibbethon danle tox ilaxle paole Tirzah alop.

¹⁸Chemtue Zimri-e tingnu sumle changdaokya tamting ngünle laxpuix, chix wanghom homlo hommong to dong, ilaxle wanghom homlo to wünlang üntoxle chixchu ija wün ma max.

¹⁹Ija a JOWANPA zongto chixe ochax lyenle changkya khoma ile chang. Chixe ochax lyenle tamchu Israel nokbue achax ang tomle changkya ma Jeroboam-e chix tho angkyabu lailaile JOWANPA ang mong ama.

²⁰Zimri-e mokkya pangwüi, chixe chichang-chizangle mokkya huxtsing-loptsang pangwüi Israel nok Wanghombu Pukax Laipex ma zale tüile.

²¹Israel khünakbu ahak-ahanle chang; züizüie Ginath sasün Tibni wanghom ang achangse tsu, ikoxle mamabue a Omri wüi naxngole thüt.

²²Oshukma Omri chima sekyabue wüi lüt. Tibni zile pao ilaxle Omri wanghom ang achang.

²³Idaile Judah wanghom Asa-e apünkya zanglao 31 ma, Israel nok haxtok ma Omri a wanghom ang achang ilaxle chixe zanglao 12 apün. Pongwang angkya zanglao azok Tirzah ma apün,

²⁴ifüima Shemar le amünkya mixsün angkya chixe Samaria haxhua khopjan ngunkhix 6000 koxlaxle shak. Omri-e haxhua ma pan zaile ziakop, ilaxle ija Shemar füima, pongwang lükya haxtok hopu mün ma samaria le nyak.

²⁵Omri-e chix tho angkya pangnu to nüile JOWANPA zongto ochax lyen.

²⁶Chixe ochax lyenkya üntoxle khünaknu ochax hia chapa to shwomkya othai lom to alyetkya tokhange, chix tho angkya Jeroboam lailaile chixe chuwüi JOWANPA, Israel nok Zang ang mongtsik adün.

²⁷Omri mwot hia chixe tsuakle hüikya pangwüi Israel nok Wanghombu Pukax Laipex ma zale tüile.

²⁸Omri zi ilaxle chix a Samaria ma akhün, ilaxle chix sasün Ahap chix man ma wanghom ang achang.

²⁹Asa-e Judah apünkya zanglao 38 lükya to Omri sasün Ahap Israel nok ma wanghom ang achang. Chixe Samaria ma zanglao 22 apün.

³⁰Chix thoma apünle lekyabu pangnu to nüile chixe JOWANPA zongto achaxle mok.

³¹Jeroboam ningle achaxkya chix zongto ojao chingui; chix a ito kaile paolaxle Jezebel chix kako ang lax. Jezebel a Sidon nok wanghompa Ethbal sacha achangkya. She füi kako tan ilaxle Ahap-e Bal chuwüi shwom.

³²Samaria ma chixe Bal ang baozang shwomnui zing ilaxle chix hanpakma tö-tsap zailaxle ija baozang shwomnui ma dan.

³³Chixe baozangchanu Asherah chapa chuwüi ajong. Chix thoma apünle ledaokya Israel wanghombu pangnusa to akaile chixe JOWANPA, Israel nok Zang ang mongtsik adün.

³⁴Chixe apünkya tukma Bethel angkya Hiel-e Jeriko tamchatle zing. Nun sasün Jihusua makhange JOWANPAe akax daokya ningle, chixe Jeriko tingnu zingle amüi ngopongma chix sasün tüichong Abiram asam, anaolechu ija tingnu pan zaile ngopongma sasün naoshukpa Segub asam.