Read Wancho Naga 1 Wanghombu 17 Bible Online

1 Wanghombu 17 - Wancho Naga bible

1 Wanghombu 17

¹Gilid angkya Tishbe makhange ajepa Elija-e wanghompa Ahap ang thüi: “Ozün ma tüikya JOWANPA, Israel nok Zang, kue owa thothale ngopuix, chix mün ma kue nang füi akaxpu, kue tamchatle ile chang koxle mathüi tanto hüile ngokya zanglao anyi-azom bama nyen dütkya hia zangwatkya müntüiüi.”

²Ifüima JOWANPAe Elija ang thüi:

³“Ijakha dantox dao ilaxle Jordan shuanu zongma handünchi ma Kerith shuasa zui ma nang azwonle ngolax.

⁴Ija shuasae nang ang lingti koxüi, ilaxle nang hato süt apüile kox angkya hanpakma okhabu füi akaxdaoa.”

⁵Elija-e JOWANPA kaxtom kax ma lax, ilaxle pao üntoxle Kerith shuasa zui ma ngo.

⁶Chixe ija shuasa angkya ti ling ilaxle swompui-hansong ma chithaile chix hato okhabue an hia müibu apüile kox.

⁷Zang chiwatkya khoma aluile chingo homtoxle ija shuasa chuwüi zople zan.

⁸Ifüima JOWANPAe Elija füi akax,

⁹“Athaxpi Sidon zui angkya tinglong Zarefat to paolaxle ikhato ngolax. Ikhato ngole tüikya thanucha tuita ang nang tux angkya hanpakma kue kaxtom koxle thomdaoa.”

¹⁰Ikhoma Elija a Zarefat to pao, ilaxle chix a ija tinglong pan zui to hüile tüipongma hakangbu tswonle afoxle ngokya azupi tuita ngünle lax. Chixe she ang thüi: “Chingchalaxle ku hato ling angkya ti shong apüihüi.”

¹¹Ilaxle she ija ti lax ang paole ngopongma, chixe she nyaklaxle thüi: “Ilaxle ku hato an chuwüi hidaole apüihüi.”

¹²She-e lan: “Ozün ma tüikya nang Zang mün ma tsaosaxle kue thüipu, ku ma an ikuxsa ngaxchu müntüi. Ku ma tüikya pangwüi a an chakpuix ta iboma münga thua tuita, ibibi wüi. Ku ma atüitüisa moktakle ku sasün kukhi süt achwon angkya hanpakmale ku ikhato ha lom ang laikya changle. Ijatix kukhi hanpak ang oshuk fongsüt ang changüi, ifüima kukhi woknuak ma zi angkya lan wüi.”

¹³Elija-e she ang thüi: “Taxaban. Paokox üntoxle süt achwonkox. Ikoxle pongwang ma, nang ma tüikya kha angkya hidaole an zinglaxle ku hato shong apüihüi, ilaxle atale tüikya pangwüi hünsa hünkhi hanpak ang achwonlax,

¹⁴chemthüikoxle ija a JOWANPA, Israel nok Zang-e akaxkya kax changle: Ku, JOWANPAe zang awatle machang tanto, khua tuita angkya an ahuale münchangüi chichangba pe tuita angkya münga ahuale münchangüi.”

¹⁵Ija zomnucha paolaxle Elija-e akaxkya ningle mok, ilaxle obibi nyix hanpak ang hwom süt okhonguile kop.

¹⁶JOWANPAe Elija hama tsaokya lailaile ija khua angkya an chiahua chichangba ija pe angkya münga chiahua.

¹⁷Ifüima aluile chingo homtoxle ija zomnucha sasün kak; chix a sükhün-sükhünle khünle kak, ilaxle oshuk ma chix a zile pao.

¹⁸She-e Elija ang thüi: “Zang khünak, nange ku to ile büthüikoxle hwonpu? Nang ikhato ku ochax ngaile aho laxle kusa azik ang nguipia?”

¹⁹Elija-e she ang thüi: “Naosa ku ang laxhüi.” She chak angkya nao chixe lax, chix ngokya homkho tokya nuito dün, ilaxle chix lyading ma dan.

²⁰Ifüima chix akhup laxle zangjop: “O JOWANPA, ku Zang, nange iningkya shoma ija thanucha hato büthüikoxle ahüipu? She-e tüle chingcha-jaja füi ku to humele hüipu, ikoxle athax a nange she sasün mik max ang tompu!”

²¹Ifüima Elija ija naosa ding ma chix fak tinle danlaxle othom azom ma jao zangjop: “O JOWANPA, ku Zang, ija naosa tamchatle azang ang tomkox!”

²²JOWANPAe Elija zangjop to lan; ija naosae tamchatle zaksyet ilaxle azangle zo.

²³Elija-e ija nao fangchi to honu hato jo ilaxle thüi: “Hulax, hünsa a azangüna!”

²⁴She-e lan: “Athax kue awandaoa, nang a Zang khünak jao changle ilaxle JOWANPAe nang makhange zangwünle!”