Read Wancho Naga 1 Wanghombu 18 Bible Online

1 Wanghombu 18 - Wancho Naga bible

1 Wanghombu 18

¹Hanpak hidaole lekya füima, haxzua-zangzuale ngokya zanglao azom lükya to JOWANPAe Elija füi akax: “Nang wanghompa Ahap hato nguile ahokox, ijama kue zangwat ajoüi.”

²Ikhoma Elija achexle pao. Samaria angkya tuinu nuaknu a tüle oziamale jao tüikya,

³ija khoma Ahap-e Obadiah, wanghom homlo to hu angkya khama akhokya ang ngokya mixsün sele anop. (Obadiah a JOWANPA to mongkoxle shwomkya mixsün changkya;

⁴ilaxle chemtue Jezebel-e JOWANPA ajebu langle awütpuix, ipongma Obadiah-e ajebu mixhuak hota pao ilaxle hwom othom anyi ma ahanlaxle mixhuak punyi-bün pong khomle thom, ilaxle hwom ang osüt-oling koxle hume.)

⁵Ahap-e Obadiah ang thüi: “Kem pao üntoxle shuasa bang hia shuakax-shuakho pangwüi to, man hia mansabu ozün ma thom ang tho tang fum chuile tüicha ang hule anohax. Owatsing keme müibu tuita chiazikle thom angchu thotüilax.”

⁶Hwom pangwüi malom kuakuale mafaofao to fumchui lomle pao ang mongtsule ajong.

⁷Ile Obadiah chix lomnu male le ngopongma Elija apongle lax. Chixe chix tikle lax, ilaxle chix chitong ma akhuxle shwom, ilaxle atüi: “Otsing tomtata ma ija nang changcha?”

⁸Chixe lan: “Changle, ku Elija changle. Paokox ilaxle nang hopunu wanghompa hama ku ikhama tüile le thüikox.”

⁹Obadiah-e lan: “Nange ku wanghompa Ahap chak to ku naxlang ang kox angkya thaikya kue chem mokdaopu?

¹⁰Ozün ma tüikya nang JOWANPA mün ma kue tsaosaxle thüipu, wanghompa-e chaxwan pangnok-jating towüi nang lom angkya kax koxdaoa. Chemtue onok tuita angkya wanghome nang hwom haxtok ma müntüile kax koxpuix, Ahap-e ija wanghom ang nang atak ang münthopule tsaosax ang tompu.

¹¹Ikoxle athax nange ku pao üntoxle nang ikhama tüile le chix hama wünlax leo?

¹²JOWANPA Chasa makhange ku tok füima lüile nang chingün-chizik chaxwan to pikle paole jangchangba? Ifüima kue Ahap hama nang ikhama tüile le wünkoxüi, ikoxle chixe nang chiatakle changkya zuma, chixe ku langle awütüi. Ku naosa ma tüitan tokhange wüi mongkoxle JOWANPA to shwomkya mix tuita changpule texle ataklax.

¹³Chemtue Jerubabel JOWANPA ajepa langle changpuix, ipongma kue hwom ajebu hato khünak punyi-bün pong athom laxle othom anyi ma longkun khato pyenle thomkya tamchu hwom ang sütling apüile-koxkya, nange münatat hexnyi?

¹⁴Jangchangba nange ku ang wanghompa hato paolaxle nang ikhama tüikya chemle wünle laxkoxle thüipu? Chixe ku langle awüt angkya changpu!”

¹⁵Elija-e lan: “Kue thothale ngokya, ozün ma tüikya JOWANPA mün ma kue tsaopu, anyix kue ku sün wanghompa hato aho angkya changpu.”

¹⁶Ikhoma Obadiah a wanghompa hato paolaxle chix hama wünle kox, ilaxle Ahap a Elija füi apong ang pao ang lai.

¹⁷Chemtue Ahap-e chix ngünpuix, chixe thüi: “Israel haxtok ma sümakya tingtui adünkya mix, nang a ikhato ngongün!”

¹⁸Elija-e lan: “Ku a tingtui adünle ngokya mix münchang, ikoxle nang ang tingtui adünle ngokya mix changpu, nang tata chichangle hünpa hünkhi pangnyi wüi tingtui adünkya mix changle. Hünzome JOWANPA kaxtom kax ma chilaxle ilaxle Bal chapabu to shwompu.

¹⁹Athax Israel khünak pangwüi ku füi Karmel Haxnu ma apong angkya kax laxkox. Bal ajepabu 450 tamchu baozangchanu Asherah ajepabu hwom 400, opang chima wangcha Jezebel sele tüilaxpuix, hwom pangwüi apüihüi.”

²⁰Ikhoma Ahap-e Israel nok pangwüi tamchu Bal ajebu pangwüi Karmel Haxnu ma apong angkya kax kox.

²¹Elija a khünaknu hato dong ilaxle thüi: “Hünzom ang mongzangwün angkya hanpak chemtukux lole laxlaxüi? JOWANPA a Zang jangchang, chix to shwomkox, ikoxle Bal wüi Zang jangchang chix to shwomkox!” Ikoxle khünaknue kaxfa tuita chilan.

²²Ipongma Elija-e thüi: “JOWANPA aje athax ku tata ma atha-akiale tüile, ikoxle Bal ajebu a 450 tüile ngole.

²³Maihupong anyi apüihüi, tuita a Bal ajepabu ang laxkox, hwome ija langlaxle texle akhix üntoxle ija ha thak dingma danüi ikoxle wüntakle a chichangüi. Ata maihupong füi kue chuwüi ile hwonüi.

²⁴Ikoxle Bal ajebue hwom baozang to jopüi ilaxle kue chuwüi JOWANPA to jopüi, ilaxle opupu zangjop to ding tokhange wün adütle lanüihex, chix tix otsingtsing Zang changpu.” Khünaknue ija changkox a le akhong.

²⁵Ija füima Elija-e Bal ajebu füi akaxle thüi: “Hünzom huanuma tüikya daile, maihupong lax üntoxle thoma hünzome shong achwonlax, hünzome hünzom baozang to jopkox ikoxle ija to wün füi taxthut.”

²⁶Hwom hato apüikya maihupong tuita hwome lax, ija tsople achwon, ilaxle tungto kople Bal to jop. Hwom tüle akhongle thüi: “Bal, kwom zangjop to lanhüi!” ilaxle hwome zingkya tö-tsap akhople azüizüithale ngo. Ikoxlechu kaxlan chemchu chitüi.

²⁷Tungto shene Elija-e hwom wanjaile thüi: “Süzongzongle jopkox, chix a Zang changle, owatsing chix a anyixningkya wünmang ngünle jipbashuile wüi ngoüntüi, chichangba mixwün towüi paoüntüi, chichangthüichu chix a jiple wüi ngoüntüi. Idaile hünzome chix jip a azwot angkya wüi changpu.”

²⁸Ikhoma ibu ajebue sisile akhongle jop ilaxle bit hia changbu füi, hwom zanglom ma tüikya ningle ma to alüile aji laile machang machangle züt.

²⁹Hwom azaxle kaxngat-kaxngui akaxle tsomfüi alople nui, ikoxlechu chem kaxlan chitüi, kaxzing tuita ngaxchu chitüi.

³⁰Ifüima Elija-e khünaknu ang thüi: “Oman, ku hato soxle hüihüi.” Hwom pangwüi chix zui ma afox. Chixe püling-pülale thomkya JOWANPA tö-tsap zingle dan.

³¹JOWANPA chix ang Israel le amün fakya Jakop sasün hwom 12 mün ma chixe longtom 12 tswonle lax.

³²Ibu longbu füi JOWANPA to shwom angkya tö-tsap zingle alai. Chixe ija akhople pe 14 ti noptang thap thole alai.

³³Ifüima chixe tö-tsap ma ha dan, maihupong langlaxle ija omüi a ha dingma dan. Chixe thüi: “Ti tiknu ali awangle apüilax ilaxle tö kox angkya müi hia ha ding to ibu füi lilax.” Hwome ile mok.

³⁴Ilaxle chixe thüi: “Ijaningle tamchatlechu ti tam thoklax.” Ilaxle hwome ti füi tam li. Chixe thüi: “Anaole chuwüi tam lilax.” Anaole chuwüi hwome tamchatle li.

³⁵Tötsap akhople jenle jukya tie thap awang.

³⁶Tsomfüi tö koxtu wama ajepa Elija tö-tsap hato hüi ilaxle zangjop: “O JOWANPA, Abraham Zang, Isak Zang, Jakop Zang! Athaxpi nang a Israel nok Zang changpu ilaxle ku a nang dapa changpu tamchu ibu mwot pangwüi kaxtom ma mokle hüikya changpule angaikox.

³⁷Ku zangjop to lanhüi! JOWANPA, ku zangjop to lanhüi, ikoxle tix ibu khünakbue JOWANPA a Zang changpu ilaxle nange hwom nang hato tamchatle ahüi ngopu le awan ang kopüi.”

³⁸JOWANPAe wün adüt, ijae tö pangwüi zokle ashun. Ha hia longbu ashunlaxle hax to apüile zokle ashun ilaxle thap angkya ti bakle azop.

³⁹Chemtue khünaknue ija ngünle laxpuix, hwome ma alüile hax to tswonle awütle akhong: “JOWANPA, nang wüi Zang changpu, Zang a JOWANPA tata wüi changpu!”

⁴⁰Elija-e kaxkoxle thüi: “Bal ajebu pangwüi kopkox, hwom tuitachu paole azang ang taxkox.” Khünaknue hwom pangwüi kop, ilaxle Elija-e hwom Kishon shuanu to jo laxle hwom pangwüi langle awüt.

⁴¹Ifüima Elija-e wanghompa Ahap ang thüi: “Athaxpi paolax ilaxle sax-lingle changlax. Kue zangwat hüile ngokya ozing atatdaoa.”

⁴²Chemtue Ahap a sax-lingle chang ang paopuix, Elija a Karmel haxnukho to dong. Ikhato chixe chikux bama khang danlaxle akhuxle zangjop. Chixe chix dapa ang thüi: “Paolax ilaxle tinu chito hule anolax.”

⁴³Chix dapa chatlaxle thüi: “Kue chemchu münngün.” Elija-e tompupu ma chix a ile othom anüt ma paolaxle hu.

⁴⁴Othom anüt lükya zuma chix chatlaxle thüi: “Tinu khatokya zangfwom khünak chakfa tukux laikya kue ngün ang kople.” Elija-e chix dapa ang thüi: “Paokox, ilaxle zangwate chix lomtsyenle machang tanto chix man-kanlin makhange hom to kangmomle chatlaxtale wanghompa Ahap ang thüikox.”

⁴⁵Noxtakya bama wüi zangding a zangfwom fwomnake awangle chang, zangwine jep ang süt ilaxle zangwat huanuma wat ang süt. Ahap a chix man-kanlin ma nga ilaxle Jezril hato chat angle lai.

⁴⁶JOWANPA tsak-zong Elija hato ngai, chixe khyadax ma nyi mongle ahinle lax ilaxle Ahap thoto wüi Jezril ha alop ang zikle ngui.