Read Wancho Naga 1 Wanghombu 19 Bible Online

1 Wanghombu 19 - Wancho Naga bible

1 Wanghombu 19

¹Elija-e chemle mokpuix ilaxle Bal ajebu chemle langle awütpuix, ibu pangwüi wanghompa Ahap-e chix kakonu Jezebel hama wünle kox.

²She-e Elija hato kaxho akatle thüi: “Nange ajebu to chemle hwondaopuix ilailaile ngainyix ipongkhae kue nang to chihwon jangthüiba baozangbue ku naxlang.”

³Elija tüle za, ilaxle chix khangkhom ang pao. Chixe chix dapa laxlaxle Judah ang Bersheba to pao.

⁴Chix dapa ima toxlaxle Elija a nyixta tungle faonu mongto ahamle pao. Chix a pünnu tuita zangkhung ma nazakle thung ilaxle chix a namzibaele thüt. Chixe zangjople thüi: “Ija sikngün mongthang a huanu changle. Ku tsün paofa. Ku a zikox wüi müiüi.”

⁵Chixe ija püntong ma shuikya thuile ojip ang achang. Allele kaxtaimix tuitae chix to twonlaxle akax: “Zolax üntoxle sax-lingle changlax.”

⁶Chixe akhople hukoxle chix khangkho ma ankhao tuita üntoxle ti pe tuita le ngün. Chixe sax-lingle chang ilaxle anaole chuwüi shui.

⁷JOWANPA kaxtaimixe chatlaxle anaole chuwüi chix azwotle thüi: “Zolax üntoxle sax-lingle changlax chichangba wünham lom nang zongto namhuanu ang changüi.”

⁸Elija zo ilaxle sax-lingle chang. Ija süt-e chix ang Otsao Haxnu Sinai alople nyix 40 aham angkya janzüi kox.

⁹Ikhato chix zangnak akai ang longlua tuita to nop. AlleleJOWANPAe chix füi akax: “Elija, nange ito chem mokpu?”

¹⁰Chixe lan: “JOWANPA Khüthak Zang, kue jento nang tata thothale hüipu ikoxlechu Israel khünaknue nang füikya hwom Tsaotsüt amapu, nang tö-tsap pünle amapu ilaxle nang ajebu langle awütpu. Athax ku tata ma athale ngopu ilaxle hwome ku mik amüt ang azongle ngopu.”

¹¹“Lailax ilaxle Haxnukho to ku tunthoma ajonglax”, le JOWANPAe chix ang thüi. Ifüima JOWANPA le le haxnubu afi ilaxle longnubu akhixle chang ang tom. Ikoxle ija zangwin ma JOWANPA a chitüikya. Zangwine jepkya zak ilaxle ifüima bütix-si.

¹²Bütix sile changkya füima wün lai. Ija wün machu JOWANPA a chitüi. Wün laile changkya füima huxsa ma ozing tuita atat.

¹³Chemtue Elija-e ija atat ang koppuix, chixe ma nyi füi thün to khung üntoxle paolaxle longkun fülom ma ajong. Ija kaxzinge chix füi akax: “Elija, nang ikhato chem mokle ngohompu?”

¹⁴Chixe lan: “JOWANPA Khüthak Zang, kue jento nang tata thothale hüipu. Ikoxlechu Israel khünakbu nang füikya hwom Tsaotsüt amapu, tö-tsapbu pünpu ilaxle nang ajebu komkaile langpu. Athax a ku tata ma atha-akiale tüipu, ilaxle hwome o ku lang ang tungle ngopu.”

¹⁵JOWANPAe thüi: “Damaska angkya faonu to tamchatlax, ifüima Siria nok ma wanghom ang Hazael to müngae ale kamlax.

¹⁶Nimshi sasün Jehu, Israel nok wanghom ang kamle münga füi palax. Ilaxle Abel Meholah angkya a Shafat sasün Elisha nang man ma müngae lile kamkox.

¹⁷Hazael chak tokya chilangle opang azangle tsuaklaxpuix Jehu-e langüi, ilaxle Jehu chak tokya chilangle opang azangle tüilaxpuix Elisha-e langüi.

¹⁸Ikoxlechu kue 7000 khünak Israel nok ma ozün ma toxüi, ibu a pangwüi Bal chichangba chixe chapabu tong to chipui ikoxle ku lwot-to le ngokyabu changüi.”

¹⁹Elija pao ilaxle maihu ozyem füi hanbaile ngokya Elisha lomle atak. Chix tunthoma maihu han shembün-ata tüikya ilaxle chixe a akiakya hanshem füi hanbaile tüikya. Elija-e chix nyiwun sik ilaxle Elisha to awunle kox.

²⁰Ifüima Elisha-e maihu han danle tox, Elija füito azuile zik, ilaxle thüi: “Kue apa füi tun apong tamchu anu füi jankax zexle toxhüi ang, ifüima ku a nang füi-füile hüiüi.” Elija-e lan: “Kue nang münabax, shongpao toxlax.”

²¹Ifüima Elisha chix maihu hanbu hato chat, ibu lang ilaxle omüi song. Ija müi songkya ma ha ang hanlak-dangbu lax. Chixe ija müi khünaknu ang kox, ilaxle hwome ija sax. Ifüima chix a Elija füito fongmix tuita ningle azuile pao.