Read Wancho Naga 1 Wanghombu 20 Bible Online

1 Wanghombu 20 - Wancho Naga bible

1 Wanghombu 20

¹Siria wanghom Benhadad-e chix süpahibu pangwüi sele asox ilaxle man hia man-kanlinbu füikya wanghombu 32 e chix to fongle Samaria akhople kop, ilaxle ija to single tingtak.

²Israel nok wanghompa Ahap hato tingnu to kaxho mixbu tomle apaole thüi: “Wanghompa Benhadad-e

³nang khop hia hun, nang shekobu tamchu nang naosom, mixtsak naomüibu pangwüi chix chak to danhüile ta.”

⁴Ahap-e lan: “Benhadad, nang ku hopupa ang ku ilaxle ku ma atüitüi chixe lax ang tsuak. Ku zongma münma ta le thüikox.”

⁵Anaole chuwüi kaxhomix Ahap hato mama tsang jukya füi nguilaxle Benhadad kaxho akax: “Kue nang hato nang khop hia hun tamchu nang shekobu hia naosombu pangwüi ku chak to danle chang angkya kaxho koxdaopu.

⁶Athax kue nang wanghom homlo hia nang palobu hom lom laxle hwom thangma thanu-juapapa bakle tsuile apüi angkya hanpakma kue ku nguakax-wangkhobu ahüipu. Ngainyix ipongkhae hwom ikhato tüiüi.”

⁷Wanghompa Ahap-e chix haxtok angkya lompabu pangwüi se ilaxle thüi: “Hulax, ija khünake kem thama adün ang tsukya changa. Chixe ku hato, ku kakobu, ku naosom hwom, ku khop hia hun, ibu tsang jule kaxho fapu. Ija to kue müiüile landaoa.”

⁸Lompabu tamchu khünaknue thüi: “Chix kax to na taxtha, chix ngui ang taxkox.”

⁹Ikhoma Ahap-e Benhadad kaxhomix kax to lanle thüi: “Ku hopupa wanghompa hama thüikox: Pongwang angkya tsangjukya a naxwüilax texpu ikoxlechu anaokya tsangjuk füi ku ang mongtsukya müntüi.”

¹⁰Ija kaxhomix chat ifüima Benhadad kaxho mama koplaxle anaolechu nguilaxle akax: “Kue nang tingnu ija pünle ama ang khünak okhonguile koplaxle nguiüi, ilaxle hwome ibu okhix-okhan komle hwom chak füi laxlaxle paoüi. Kue ija chimok thüiningle baozangbue ku hongle naxlang kox.”

¹¹Wanghompa Ahap-e lan: “Süpahi tsingtsinge zan lütle chang füimatix ongam ahopu, ikoxle azanle machang tanto ija ongam münaho angkya oli ta le thüikox.”

¹²Benhadad-e Ahap kaxnong a, chix tamchu chix füikya nokmüi ma ngole tüikya wanghombu füi nyihom ma julingle ngopongkhae kop. Chixe chix khünakbu ang ija tingnu tingtakle chang angkya akax. Ikhoma hwom ija ziakop ang achex.

¹³Ipongkhae ajepa tuita Ahap hato ngui ilaxle thüi: “JOWANPAe thüile, ija chongkya süpahibu thua ojao taxza. Kue nang ang ibu to lüt ang tomüi ilaxle nange ku a JOWANPA changle le awan ang kopüi.”

¹⁴Ahap-e atüi: “Ija zankat lompa ang owa achangüi?” Ajepae lan: “JOWANPAe thüile: Ija a haxsüt-haxsüt ma tüikya Gowarnorbu kaxtom fang ma ngokya süpahi dülabue mok angkya changle.” Wanghompa-e atüi: “Zankat othomnu a owae azuiüi?” Ajepae lan: “Nange azuiüi.”

¹⁵Ikhoma wanghompa-e süpahi dülabu sele asox, hwom a haxsüt ma apünle ngokya Gowarnorbu kaxtom fang ma ngokyabu changkya. Hwom pangwüi 232 tüikya. Ifüima chixe Israel nok süpahi 7000 khünaknu sele asox.

¹⁶Zansing a tungto shen makhange single wang. Ipongma Benhadad hia chix füi nokmüima ngole tüikya wanghombu 32 a pangwüi nyihom mong ma jutokle tüikya.

¹⁷Tunpa ma süpahi dülabu le. Benhadad-e apaokya zyetmixbue, Samaria chito khange süpahibu othom nguile ngotüiale chix hama apuale kox.

¹⁸Chixe kaxkoxle thüi: “Hwom azan angwüi hüikoxle chichangba tumüi zangwünhax lüwüi hüikoxlax, hwom a ozün ma kopkox.”

¹⁹Süpahi düla thome zansing thothut. Hwom füifüima Israel nok süpahibu azui.

²⁰Ilaxle ma füi azan ang hüikya khünakbu pangwüi lang. Siria nokbu pao ma süt ikoxle Israel noke khamkhitle achua, ikoxle Benhadad a mankho ma ngalaxle man ma azankya süpahibu züizüie ziakop laxle paole azang.

²¹Wanghompa Ahap-e zantam kop ang tsuak ilaxle man hia man-kanlinbu kop ilaxle Siria nokbu to thama adünle jao lüt.

²²Ifüima ajepa wanghompa Ahap hato nguilaxle thüi: “Chatlax ilaxle nang süpahibu süzinglax üntoxle olom müile zinglax chemthüikoxle Siria nok wanghombue hüile ngokya tsozit-wazit ma tamchatle tung angkya changle.”

²³Wanghom Benhadad nguakax-wangkhobue chix ang thüi: “Israel nok Zang a Haxnukho Zang changle, ikhoma Israel noke kem to lütle. Ikoxle haxsha ma jangazan thüiningle keme hwom to lütjao lütüi.

²⁴Athaxpi apün-awangle ngokyabu hwom 32 lüi ma zantun ma ziakople tüikya süpahi lompabu danhax.

²⁵Nange amütdaokya süpahi othom, man lüima man, man-kanlin lüima man-kanlin, ilaxle khünak lüima khünak achwonle thomlax ilaxle hwom füi alünle kem a haxsha ma azanüi, izuma hwom füi kem wüi tsak-zongle tüiüi.” Ilaxle hwome akaxkya kax ma laxle wanghompa Benhadad-e mok.

²⁶Tsozit-wazit nguikya zuma Benhadad-e chix khünakbu nyak ilaxle Israel nok to sing ang chix füi tomle Afek tingnu ma asox.

²⁷Israel khünakbu nyak ilaxle atha-achwon. Hwom a zan to ka ang achex ilaxle Siria nok chito thale onui anyi ma athong. Kothofa ma awangle chiakle tüikya Siria nok tu to Israel nok a zwon zyem anyi tukux lüwüi ngün.

²⁸Ajepa a Wanghompa Ahap hato nguilaxle thüi: “JOWANPAe ile thüile: Siria nok a ku a Haxnu Zang changle, Haxsha Zang münchangle thüikya khoma ipongpong tüikya hwom süpahibu to hünzome lüt ang tomüi, ilaxle nang tamchu nang khünaknue ku a JOWANPA changpule awan ang kopüi.”

²⁹Israel nok hia Siria nok a tata chito thale ma thongnuinui ma nyix anüt nui. Nyix anüt lükya to hwom azan ilaxle Israel noke 100000 khünak lang.

³⁰Azangle changkyabu a Fek tingnu to pao, ikhato hwom 27000 khünaknu ding ma tingnu katuk tsunle düt. Benhadad chuwüi ija tingnu to paole azang ilaxle hwom nok chito azwonle ngo.

³¹Chix nguakax wangkhobu chix hato ngui ilaxle thüi: “Israel nok wanghombu a chingcha tüikya wanghombu changle le kwome atatdaoa. Nyikhwon apong ilaxle dingkux ma zu füi ngüile kop üntoxle kwom chix hato nguile jangchang thüiningle owatsing chixe nang chilangle chu toxtüilax.”

³²Ikhoma hwome nyikhwon apong ilaxle hwom dingkux ma zu füi ngüi ilaxle wanghompa Ahap hato nguilaxle thüi: “Nang dapa Benhadad-e nang ma chix khüzün amüt ang taxtomünfale chingcha jupu ta.” Ahap-e lan: “Chix a athaxchu ozün ma wüi tüipia? Müidao, chix a ku zongto tüita-naopa tuita ningle changpu.”

³³Benhadad nguak-wangkhobue ija müikya zangwünbu to apale ngokya, ilaxle chemtue Ahap-e “Tüita-naopa”, le thüipuix, hwome ija kax tswon ilaxle janpüi ma lanle thüi: “Nang kax ma Benhadad a nang zongto tüita-naopa changtüi!” Ahap-e kaxkox: “Chix a ku hato apüihüi.” Chemtue chix hato Benhadad nguipuix, Ahap-e chix füi tomle chix man-kanlinkho ma dong ang se.

³⁴Benhadad-e chix ang thüi: “Hünpa angkya ku apae laxkya tingnubu kue nang ang wüi achatle koxfang. Apa-e Samaria ma zingkya ningle nangechu Damaska ma thalex-juatai nui zing ang tsuak.” Ahap-e lan: “Ija zangwün otsing tomtata jangchang thüiningle, kue nang a danle apaoüi.” Chixe Benhadad füi nokmüi zing ilaxle danle apao.

³⁵JOWANPA kaxtom ma ajebu kha angkya mixsün tuitae chix to chakmok angkya hozui aje tsan ikoxle chixe ile chimok.

³⁶Ikhoma chixe chix ang thüi: “Nange JOWANPA kaxtom kax ma chilaxle changkya khoma nang a ku ha angkya achex shemle mailang tuitae nang lang angkya changpu.” Ilaxle chix achexkya füi tomle mailang tuitae chix lang.

³⁷Ifüima ija ajepae wüi mama ajepa hato nguilaxle: “Ku to hongkox!” Ija khünake chix to hong. Chixe zongbakle hong koxle chix to thomzün.

³⁸Ija ajepae chix thün to nyi füi chwop ilaxle chix sün ajüi ilaxle lommun ma ajongle Israel nok wanghompa leüi tanle nui.

³⁹Wanghompa le le ngopongma, ajepae chix se ilaxle thüi: “Wanghompa, süpahi tuitae kople apüikya zanpa tuita nyelax-o, ija jangapao thüiningle ku khüzün laxüi chichangba khopjan ngunkhix 3000 tsangthom ang tom angkya hex-o lükya ku ma hünlit danle toxkya füi azanle ngokya changle.

⁴⁰Ikoxle kue mama mwot to hule ngotama ija mixsün paole azangdaoa.” Wanghompa-e lan: “Nange alüile ma mik max angkya lomdaoa, idaile nang mik max angkya wüi changle.”

⁴¹Ajepae chix thün angkya nyi sikle da, ima thuile wanghompa-e chix a ajepa tuita changle le awanle lax.

⁴²Ifüima ajepae wanghompa ang thüi: “Ija a JOWANPA kax changle: Kue langdao-ole thüikya khünak nange chilangle paole azang ang tomkya khoma nange ija tha a nang tsün koxle thom angkya changpu. Ija ningle chix süpahibu azangle pao ang tomkya khoma nang süpahibu a amüt angkya changle.”

⁴³Wanghompa a mongtsik ashukle hwom hom Samaria to chat.