Read Wancho Naga 1 Wanghombu 21 Bible Online

1 Wanghombu 21 - Wancho Naga bible

1 Wanghombu 21

¹Jezril ma Ahap wanghom homlo zui ma Naboth le amünkya mixsün kux grep haxtok tüikya.

²Nyixta Ahap-e Naboth füi akax: “Nang grep haxtok ku ang laxhüi. Ija ku wanghom homlo zui ma soxkya changle, ilaxle kue ija a sui-lai alaikya onui ang laxse tsule. Kue ija hanpak ang sümüikya grep haxtok mama koxüihex chichangba otha okhonguile koxüihex.”

³Naboth-e lan: “Kue ija haxtok a apu-apa hwom man tswonkya changle, kue ija nang ang kox angkya to JOWANPAe ngaxchu naxabaxkox.”

⁴Naboth-e chix kax to lankya kaxlan khoma mongtsik, ikhoma mongmale Ahap a hom to chat. Chixe katuk chito thüne hule ile lyading ma süt chisaxle jiple ngo.

⁵Chix kakonu Jezebel chix hato ngui ilaxle atüi: “Nang ang ipongpongle chem mongmapu? Nange süt büthüikoxle chisaxpu?”

⁶Chixe lan: “Naboth-e ku kax to lankya kaxlan khoma changpu. Kue otha okhonguile koxle chichang thüichu mama ifüi sümüikya haxtok olüi koxlaxle thüichu kue chix grep haxtok laxfangle thüikoxle chixe ku ang ija münfatsuak lüta.”

⁷Jezebel-e lan: “Müidaoa, nang a wanghompa tuita, changcha? Zolax ilaxle ma mong amüi üntoxle süt saxlingle changkox. Naboth grep haxtok kue nang ang koxüihex.”

⁸Ifüima Ahap sohi laxlaxle she-e laiza tuita za ilaxle ibu to chix shintop kox ilaxle ibu nguakax-wangkhobu hia Jezril angkya mixmüi tüichongbu hato afanle apao.

⁹Ija laiza ma ile za: “Nyixta chisax-chilingle atsaokya nyix apukle changkox, khünaknu pangwüi sele asox kox, ilaxle Naboth achuak-achenle changkox.

¹⁰Zang hia wanghompa nyi to thuakzomle changdaoa lükya kaxfyet anyi apüihüi. Ifüima chix a tingnu angkya pan athaile alailaxle long füi thuple langüi.”

¹¹Jezebel kaxtom ningle nguakax-wangkhobu hia Jezril angkya mixmüi tüichongbue mok.

¹²Hwome chisax-chilingle atsao angkya nyix bama apuk. Khünaknu pangwüi sele asox ilaxle Naboth achuak-achenle chang.

¹³Kaxfyet olom anyi füi chix ma Zang hia wanghompa nyi to thuakzomle changkya noknusa tunthoma tsaihux-kaxhux fele chang. Ikhoma chix tingnu pan athaile alai ilaxle long füi thuple lang.

¹⁴Ija kaxho Jezebel hato ahüi: “Naboth a langdaoa.”

¹⁵Jezebel-e ija kaxho kopkya thuile wanghompa Ahap ang thüi: “Naboth a langdaoa. Athaxpi chixe nang ang hang-jole münchangpule grep haxtok koplax.”

¹⁶Ima wüi thuile Ahap pao ilaxle ija grep haxtok chix kux ang kop.

¹⁷Ipongma JOWANPAe Elija füi akax. Chix a Tishbe angkya ajepa changkya,

¹⁸JOWANPAe thüi: “Samaria angkya wanghompa Ahap hato paokox. Nang thoma chix a Naboth grep haxtok ma bangüi. Chix a ija haxtok ma chak ma kopsele azongle nuiüi.

¹⁹Chix hama, ku, JOWANPAe ile akaxle le thüikox: ‘Nange khünak langkya boma chix tingtok ngaxchu lax ang hi? Ojong ma Naboth aji to hie chaile changpuix ijong khama wüi nang aji tochu hie chaiüi.’ Ija kax a ku kax changpule chix hama akaxle laxkox.”

²⁰Chemtue Ahap-e Elija ngünle laxpuix, chixe thüi: “Nang a ku zanpa changle. Nange ku ngünle laxdaopuix nyi?” Elija-e lan: “Changle, kue nang ngünle laxdaoa, JOWANPA miksho ma komkaile thaikya mwotlom to nange mongkoxle changdaoa.

²¹Ikhoma JOWANPAe nang ang thüile: ‘Kue nang hato thama apüiüi, kue nang oting amütüi ilaxle nang homkha ang lükaka komle oli-okan chitoxle naosa hia mixmüi chemchu chisüile komkaile amütüi.

²²Nang homkha a Nebat sasün wanghompa Jeroboam homkha hia Ahijah sasün wanghompa Basha homkha lailaile achangüi, chemthüikoxle Israel nok ochax lom to alyetle changkya makhange nange ku mongtsik mwople lai ang tomdaoa.’

²³Ilaxle Jezebel hanpakma chu JOWANPAe thüile, she mang chuwüi Jezril tingnu ma hie saxüi.

²⁴Nang homkha angkya khünak owa tingnu zile changüihex, chix a hie saxüi. Iningle kotho to owa zilaxüi hex, chix mang a okun-olae saxüi.” (

²⁵Chix kakonu Jezebel-e mong asa laxle Ahap-e mokkya lailaile JOWANPA mik-hu ma chisumüile komkaile ochax mokkya mix a owachu chitüi.

²⁶Israel khünakbu nguipongma JOWANPAe ija haxtok angkya jwonle apaokya Amon nokbu lailaile chapa to shwomkya makhange chixe pangnu füi akhokya zakkop ochax mwot mok.)

²⁷Chemtue Elija-e chix kax ashukpuix, Ahap-e chix nyi akyet, ilaxle sikle awüt, ilaxle nyikhwon awun. Chixe süt chisax, nyikhwon dingma jip, ilaxle thün wüi huishole mongma füi aham.

²⁸JOWANPAe ajepa Elija ang thüi:

²⁹“Ahap-e chix lailai to ku tong to chemle puinaile changpuix nange ngüncha? Chixe ile changkya khoma kue thama chix hato, chix ozün ma ngotanto münapüi, ikoxle Ahap hwom homkha hato kue thama apüi angkya a chix sasün tsünto tix changpu.”