Read Wancho Naga 1 Wanghombu 3 Bible Online

1 Wanghombu 3 - Wancho Naga bible

1 Wanghombu 3

¹Chix sasün hama aju-asomle wangcha apüilaxle Solomon-e Ijip wanghompa füi nokmüi. Chixe wanghom khwalo, wanghom homlo hia Zangshwom-Hom hia Jerusalem akhople tsuathale long katuk zingle alaikya tan ang apüilaxle she a Dawid tingnu ma thom.

²Ipongma JOWANPA hanpakma Zangshwom-Hom mazingkya, ikhoma khünakbue tö-tsap zinglaxle töbu koxle zangshwomle hüi.

³Solomon-e JOWANPA to mongkün ilaxle hopa Dawid-e adangle fakya kaxtombu kax ma laxle hüi, ilaxle chixe ngaxchu ma tö-tsaptsap to müibu langle zangshwomle hüi.

⁴Tuita mwot khoma tö kox ang chix Gibeon to pao, chemthüikoxle noknue süchongle twonle hüikya tö-tsap a ikhato tüile ngo. Ledaokya ma chixe ikhama othom hota to nüile jao zokle ashunkya töbu koxle hüi.

⁵Ijama wünmang chito JOWANPAe chix hato ngailaxle atüi: “Kue nang ang chem fakoxle müisele nange thütpu?”

⁶Solomon-e lan: “Nange ku apa Dawid hato chongkya mongkün ahole hüipu, ilaxle nang dapa, chix a müikya tuita nang kax ma laxle tüikya mix ilaxle otsingtsing füi chix a nang füi nokmüile ngo. Ilaxle anyix chix man ma apünle tüikya chix sasün tuita, chix koxkya füi nange chix hato chongkya tamchu chizakkya mongkün ahole hüipu.

⁷O JOWANPA, nange ku a apa lüi ma wanghompa ang achang ang tompu, ikoxlechu ku a apün-awang angkya olom ojao chitikkya naosa tuita.

⁸Ku a, nange mamix ang zünle kopkya khünaknu, e-ang chithole tüikya khama tüile.

⁹Idaile nang khünaknu thakma kue sukya kaxfün fakya füi tamchu omüi hia oma ajatle awanle apün ang thokya lima ku ang je-hwon fahüi. Ile chichang thüiningle ibibikya nang khünaknu kue chemle apünthoüi?”

¹⁰Solomon-e ija jukya khoma JOWANPA ang tüle mongmüi,

¹¹ikhoma chixe Solomon ang thüi: “Nange tsünlo-zaknuile ngo angkya, ahak-aluale tüi angkya chichangba ma zongto zanpabu ozik-omüt bama jukya füi nange sule apün-awang angkya hanpakma je-hwon wüi jule changkya khoma,

¹²nange jukya kue nang ang koxüi. Kue nang ang je-hwon otax-onüi koxüi. Nang lailaikya mix owachu matüitox tamchu müntüitoxüi.

¹³Kue nang ang nange chijukyabu ngaxchu wüi koxüi: nang tsüntsün ma mama wanghombu to nüile nang ahak-aluale tamchu achuak-achenle ngo.

¹⁴Nange hünpa Dawid lailaile ku to mongkünle tamchu ku wanlombu hia kaxtombu kax ma laxle jangtüi, kue nang a tsünlo-zaknuile ngo ang tomüi.”

¹⁵Solomon mik azangle zo ilaxle JOWANPAe chix füi wünmang chito zangwünkya changale awanle lax. Ifüima chix Jerusalem to ngui, JOWANPA Tsaotsüt Suak tunthoma ajong, ilaxle zokle ashunkya tö hia notom-tusüi töbu koxle JOWANPA to shwom. Ifüima chixe chix nguakax-wangkhobu püntuxle chang.

¹⁶Nyixta tsangtsa hangle ngokya mixcha anyi nguilaxle wanghompa Solomon tunthoma ajong.

¹⁷Tutae akax: “Wanghompa, ija mixcha kukhi hom tuita ma ngopu, ilaxle shechu tüile ngopongma kue sasün tuita puxle alaipu.

¹⁸Nyixta-anyi homkya füima she-e chuwüi sasün tuita puxle alaipu. Ija hom ma kukhi boma owachu müntüikya.

¹⁹Ikoxle ja tuita she lop-khopkya bama she-e chitsingtoxle sasün sheple langbangpu.

²⁰She a zangnak-nak ma wüi zo, ikoxle ku mikngüt müile jiple ngopongma ku zui angkya naosa lax ilaxle ija ma lyading ma ajiple tox; ilaxle sasün mang a ku lyading ma danle toxpu.

²¹Ngainop ningle ku zolaxle nao ang tsom asip ang hukoxle, ija naosa a omang ang bangpu. Kue khile hukoxle ija nao a ku naosa münchangle awan ang koppu.”

²²Ikoxle ata mixcha mixe thüi: “Ile ojao münchang! Ozün ma tüikya nao a ku nao wüi changpu, ikoxle omang ma tüikya a nang nao wüi changpu!” Anyi-lükya mixchae thüi: “Ile münchang! Omang a nangkux, ikoxle ozün a ku kux wüi changpu!” Ile hokhi wanghompa tunthoma nao ma atinle ala.

²³Ipongma wanghompa Solomon-e thüi: “Hünkhi pangnyie wüi ozün ma tüikya nao ma atinkya changa; omang mix a tata ang koxkya changa!”

²⁴Wanghompa-e changlo lom ang apao, ilaxle ija apüile fakya zuma,

²⁵chixe thüi: “Ozün ma tüikya nao asexle anyi ang achang kox ilaxle hokhi ang thopong-thopong afikle laxkox.”

²⁶Ikoxle honu tsingtsinge, sasün to tüle kak-künkya tüikoxle, wanghompa ang thüi: “Wanghompa, chingchalaxle nao a taxlang! Nao a ku zuinu angwüi laxkox!” Ikoxle ata mixchae thüi: “Ija nao kukhi tütapu ang koxle taxchang, ija nao anyi ang achangle asexkox.”

²⁷Ijama Solomon-e thüi: “Nao a taxlang! Ija nao a pongwang lükya mixcha ang laxkox: she a ija nao honu tsingtsing changle.”

²⁸Chemtue Israel khünakbue Solomon kaxfün zing atatle changpuix, hwom pangnusa kün-mong towüi chix hanpakma tüle achuak-achenle thüt, chemthüikoxle ifüima hwome sukya kaxfün fale tsuak angkya Zang-e chix ang je-hwon koxle thomkya hwome tsingle lax.