Read Wancho Naga 1 Wanghombu 5 Bible Online

1 Wanghombu 5 - Wancho Naga bible

1 Wanghombu 5

¹Tair nok wanghompa Hiram a jento Dawid füi zuikhui ang ngole hüi. Chemtue chixe wanghompa Dawid man ma chix sasün Solomon wanghom ang achangkya kax atatpuix, chixe chix hato tsaipong-kaxtaimix awün.

²Solomon-e Hiram hato chix kaxnong achatle thüi:

³“Ojen to tomzi nokbu füi azan lanle ngokya khoma apa Dawid-e, chix zanpabu JOWANPAe chix chifa fang ma danle machang tanto, JOWANPA chix Zang to shwom angkya onui zangshwom-hom zaile alai ang chitho.

⁴Ikoxle athax a JOWANPA ku Zang-e ku tomzi nok pangnusa füi nokmüi ang achangle tüile. Ku ang a zanpa owachu müntüi idaile owawae single hüi angkya ku hanpakma thama müntüi.

⁵JOWANPAe ku apa Dawid füi, ‘Nang sasün owa kue nang füima wanghom ang zingle changüihex, chixe tix ku ang Zangshwom-Hom zaile alaiüi’ le tsaosax. Ilaxle athax kue JOWANPA ku Zang to shwom angkya hanpakma ija Zangshwom-Hom zingüile kue mongzangwünle changdaoa.

⁶Idaile ku hanpakma sedar pünbu dak ang nang khünakbu Lebanon to akat-hüi. Ku khünakbuechu hwom füi tomle mwot moküi ilaxle nang khünakbu ang otha nange fünle fakya ma koxüi. Nang khünakbue chemtukux manpuix itukux müile ku khünakbue pündak maman.”

⁷Chemtue ija Solomon kaxho koppuix, Hiram ang tüle mongmüi ilaxle thüi: “Dawid ang chix man ma, ipong chongkya jat-li tuita thakma wanghom ang achang angkya iningle hwontüi-jezaikya sasün mohimankya hanpakma anyix JOWANPA ang münchong fapu!”

⁸Ifüima Hiram-e Solomon hato ibibi kaxho achat: “Kue nang kaxho kopdaoa ilaxle nange lomkya ningle mok ang achwonle tüile. Kue sedar hia pain pünbu koxüi.

⁹Ku khünakbue Lebanon tokya püntho tinu alople jole koxüi, ilaxle ibu tima afwot pao ang müiüi. Ibu a adangle kha laxle nange athaisele thütkya onui alople apüi ang müikya lima zingle koxüi. Onüi alople changkya füima ku khünakbue ibu dale koxüi ilaxle imakhange nang khünakbue pongle laxüi. Nangchi tokhange ku khünakbu ang osüt-oling wüi apongle laxkox.”

¹⁰Idaile Hiram-e Solomon ang chixe chemtukux laxsele lompuix ija tukux sedar hia pain pünbu dakle kox,

¹¹ilaxle Solomon-e chix khünakbu tux angkya hanpakma Hiram ang zanglao to wonglai tsax othum 2000 ilaxle olip münga tsaotsao 400, 000 pe kox.

¹²JOWANPAe chix kaxtsao thom ilaxle Solomon ang hwon-je kox. Hiram hia Solomon nyi bama muamüile ngo, ilaxle hokhie tata füi nokmüi zangwün tsuak.

¹³Wanghompa Solomon-e atsangle mwot mokmixbu ang lax ang Israel haxtok angkya 30000 khünak saile afox,

¹⁴ilaxle ibu to hu angkya mwot Adoniram ang kox. Chixe hwom 10000 pong ma othom azom ang ahan. Othom tuiponge lyetta Lebanon tokya chatlaxle hom ma lyet anyi apongle mok.

¹⁵Solomon long thwotmixbu ang haxhua nok tokya khünak 80000 tüikya, 70000 khünak a hün angkya mix,

¹⁶ilaxle chixe ibibi mwot to akhi-amikle hume angkya hanpakma 3300 khünak dan.

¹⁷Wanghompa Solomon kaxtom ma ibue Zangshwom-Hom homting makhange wüi chongkya-chongkya longnubu thole alai.

¹⁸Solomon hia Hiram nyi khünak mwotmok mixbu tamchu Biblos nok tokya khünakbue long hia pünfi-püntsibu Zangshwom-Hom zai ang achwonle kox.