Read Wancho Naga 1 Wanghombu 6 Bible Online

1 Wanghombu 6 - Wancho Naga bible

1 Wanghombu 6

¹Israel noke Ijip haxtok dantox füima zanglao 480 lükya to, Israel nok thakma Solomon-e apünkya zanglao ali sütpongma, lyetnu kua anyi, Zip lyetnu ma, Solomon-e Zangshwom-Hom ma mwot owang wang.

²Hommong khama ija a olwot ma fit 90, okhao ma fit 30 ilaxle ochuak ma fit 45 tüikya.

³Namnopkya nui a sok 7 zule ilaxle sok 14 khaole tüikya, ija a otsao nui khaokya tukuxle changkya.

⁴Zangshwom-Hom long katukbu ma fülombu tüikya, ilaxle fülom ibu a omongchi ja ilaxle kothochi a humhumle tüikya.

⁵Kotho long katuk füi asaole, Zangshwom-Hom homsamchi hia nuakfüichi kao ma, azom pong ma athünkya homthünbu zaile tüikya, ilaxle homthün tuipong a fut 7 okao pong tsuale tüikya.

⁶Fangchi angkya nui pangwüi fut 7 okao pong khaole tüikya, otan angkya homthün a fit 9 pong khaole tüikya, ilaxle thak angkya homthün nuibu a fut 10 okao pong khaole tüikya. Homthün kho tokya Zangshwom-Hom katuk a hax angkya katuk füi süpakdaole tüikya, ile changkya khoma nuibu a katuk ma püntsi huafobu chilax homtoxle athongle thom ang tsuak.

⁷Zangshwom-Hom zaikya longbu a long thole alaikya nui to zingle achwon daokyabu changle, ikhoma Zangshwom-Hom zaile changpongma jantu, wafax chichangba tüta ningkya jan oling-olakbu ozing-ozua chemchu chitüi homle mok.

⁸Zangshwom-Hom füi asople zaile tüikya fangchi angkya fülom a Zangshwom-Homnu zong ma shuathong chikao ma, homthün anyi hia azom ha alople dong angkya dixtuabu füi zaile tüikya.

⁹Ile wanghompa Solomon-e Zangshwom-Hom zaikya ashuk. Chixe sa ang sedar püntsibu atsi laxle ima sedar pünkhao wüi nomle zing.

¹⁰Zangshwom-Hom füi asople tüikya homthün azom pangwüi fut 7 okao pong tsuale, Zangshwom-Hom tatok katukbu füi asaole zailaxle ibu a sedar püntsibu füi asople zaile tüikya.

¹¹JOWANPAe Solomon ang thüi:

¹²“Nang ku wanlombu hia kaxtombu pangwüi kax ma laxle jangtüi, kue hünpa Dawid füi tsaotsütle changdaokya nang ang mokle koxüi.

¹³Nange zaile alaikya Zangshwom-Hom ma ku a, ku khünaknu Israel nok füi ngoüi, ilaxle kue hwom otuechu danle chitoxüi.”

¹⁴Solomon-e Zangshwom-Homnu zaikya tsuakle hüi.

¹⁵Hommongkha a, wakhua makhange sa alople sedar püntsi füi chwop, ilaxle wakhua a pain pün füi zai.

¹⁶Omong tokya nui, oja ang Ataxkya Otsao Nui le nyakpuix, ija a Zangshwom-Hom ma onui swonle alaile zai. Ija a olwot ma fit 30 ilaxle hax makhange sa alople sedar pün füi atsyenle tüikya.

¹⁷Ataxkya Otsao Nui tunthoma tüikya nui a fit 60 lole tüikya.

¹⁸Sedar pünkhaobu a maikuak hia maipuabu zingle aza-apuale tüikya; hom mongkha bakle sedar füi chwople tüikya, ikhoma long katuk ojao chingün.

¹⁹JOWANPA Tsaotsüt Suak dan angkya hanpakma Zangshwom-Hom ma onui swonle nuilua tuita zaile alai.

²⁰Zangshwom-Hom angkya nuilua a olwot, okhao hia ochuak pangwüi fit 30 pong tüikya. Ikha bakle hun füi chwople zai. Tötsap a sedar pün füi chwople zai.

²¹Zangshwom-Hom hommong kha a hun füi chwople zing, ilaxle ija hun füi chwople tüikya nuilua fülom ma hun janbüi ata.

²²Zangshwom-Hom hommong kha pangwüi hun füi chwop, iboma Ataxkya Otsao Nui angkya tö-tsap chuwüi hun füi chwop.

²³Olip pün makhange ozang anyi füikya zünmok zingle alai ilaxle ibu a Ataxkya Otsao Nui ma dan. Pangnyi wüi fit 15 pong tsuale tüikya.

²⁴Ija nyi a otom hia olwot ma tomwüi tamchu talailaile tüikya. Okhi pangnyi ma wüi ozang anyipong tüikya, ozang tuipong a fut 7 okao pong lole tüikya, ikhoma tuita zangza makhange ata zangza alople fut 15 oba tüikya.

²⁷Ija nyi a Ataxkya Otsao Nui ma atale apüt, ikhoma hokhi ozang pünkya zangza nui tanti wama apongle tüikya, ilaxle mama ozang anyi füi a katuk to lyetle tüikya.

²⁸Ija ozang anyi pong füikya zünmok pangnyi to hun füi chwop.

²⁹Noknu nui hia nuilua katukbu a ozang füikya zünmok, pam pün hia maipua, ibu füi aza-apuale tüikya.

³⁰Wakhua ngaxchu wüi hun füi chwople tüikya.

³¹Olip pün makhange zingkya, pangnyi chito hyenle dapkya kahak a Ataxkya Otsao Nui fülom ma apüt; ija kahak okho pangnyi wüi junjunle tüikya.

³²Ija kahak a ozang füikya zünmok, pam pün üntoxle maipua, ibu füi aza-apuale tüikya. Kahak, ozang füikya zünmok ilaxle maipua, ibu pangwüi to hun füi chwop.

³³Noknu nui to nop angkya kha ma, olip pün makhange ozongkhing ali alaile kapox zaile tüikya.

³⁴Pain pün makhange zaikya, adople thomfang kahak anyi tüikya.

³⁵Ibu kahak ang ozang füikya zünmok, pam pün hia maipua, ibu füi aza-apua tamchu ibu to hun füi chwople tüikya.

³⁶Zangshwom-Hom tunthoma lopsha tuita zaile tüikya. Ija nui katuk a long dün azom obaba to sedar püntsi dünpong füi zaile tüikya.

³⁷Ija Zangshwom-Hom homting zaikya a, Solomon-e apünkya zanglao ali lükya to, lyetnu anyi, Zip lyetnu ma owang wang.

³⁸Lyetnu kua achyet, Bul lyetnu, ija a Solomon-e apünkya zanglao bün-büta lükya to, mong ma ajangkya lailaile ija Zangshwom-Hom zaikya mwot ashukle hüi. Solomon-e ija zai ang zanglao anüt lax.