Read Wancho Naga 1 Wanghombu 7 Bible Online

1 Wanghombu 7 - Wancho Naga bible

1 Wanghombu 7

¹Solomon-e chix hanpakma Chongwang Homlo zanglao bün azom jao laxle zingle alai.

²Lebanon fao angkya pün füi zaile alaikya homnu omong olwot ma fak tsa-anyi, okhao ma fak bün-anyi ilaxle ochuak ma fak anyi tüikya. Ija ma sedar thong zyen-azom tüikya, ibu ding ma sedar püntsibu danle tüikya. Sading ang chuwüi sedar lax, ijae tui dannui to apüile o, ibu a thongbu füi thuale tüikya.

⁴Katuk pangnyichi ma wüi thangmik zyen azom ma zaile tüikya.

⁵Kahak hia thangmikbu ma ozong ali füikya kapox füi tüikya, ilaxle katuk pangnyichi angkya thangmikbu a tata chito thale tüikya.

⁶Fakngombu füi thua laxle nui tuita olwot ma fak bün-anyi ilaxle okhao ma fak anüt ilaxle ija thong füi thua laxle nya-o zaile tüikya.

⁷Wanghompa tüntong dannui, oja ang khwa lechuwüi nyakpuix, ija makhange Solomon-e kaxfün fa. Ija a wakhua makhange homtsa juxfua alople sedar pünkhaobu füi zingle tüikya.

⁸Kaxfün fakya khwa nui toknachi ma Solomon ang chix hom zaile tüikya. Ibu a zangjang hom lailaile wüi zaile tüikya. Ilailaikya hom chixe Ijip cha laxkya wangchanu hanpakma chuwüi zaile kox.

⁹Hom onuibu hia khwa pangwüi homting chifün makhange kakho alople thatsak long müikyabu füi zaile alai. Long ibu thokya onui towüi othüt ma zingle achwon ilaxle kotok hia hommong pangnuchi longzütbit füi zütle zing.

¹⁰Homting chifün a longthup nui ma thupkya longnubu füi zingle alai, züizüi a fakta okao ltokyabu ilaxle züizüi a fakpong ltokyabu changkya.

¹¹Ibu oding ma sedar püntsi dan angkya othüt ma mama longbu tüikya.

¹²Wanghompa khwa, Zangshwom-Hom hommong angkya nuilua ilaxle Zangshwom-Hom to nop angkya nui, ibu ma long odün azom bato sedar püntsibu awonle zaikya katukbu tüikya.

¹³Wanghompa Solomon-e Tair tingnu ma ngokya zingpa Huram le amünkya mixsün se ang apao. Chix a khop mwot bama mwot awankya zingpa tuita changkya.

¹⁴Hopa, owa athax ozün ma chitüipuix, chix Tair tingnu ma ngokya mixsün changkya. Chix a khop-jan mwot bama zingpa tuita changkya. Chix honu a Neptali homjen angkya mixcha changkya. Huram a tuita tsingzaile tüikya mix tamchu mwotlüi awan daokya zingpa tuita changkya. Khop mwot lili pangwüi to hu angkya hünlit lax angkya hanpakma wanghompa Solomon-e sekya ningle nguilaxle mwot ibu pangwüi mokle kox.

¹⁵Huram-e khop thong anyi sex; pangnyi wüi ochuak ma fak ali, thongtom thütkya ma fak anyi okao pong müi ilaxle ija nyi a Zangshwom-Hom nguilom ma küi.

¹⁶Chixe khop thongkho chuwüi anyi zing, pangnyi wüi fakta okao pong chuakle zing, ibu a thongnu okho ma dan angkya hanpakma.

¹⁷Thongnu pangnyi wüi thongkho a janbüi füi aza-apua laxle tüikya,

¹⁸ilaxlechu khop makhange wüi pomegrenet anyi zingle tüikya.

¹⁹Ija thongkho a ochuak ma fakta to nüile lili maipuabu zinglaxle tüikya,

²⁰ilaxle janbüi ningle zailaxle thongkho komkomle tüikya khama ija dan. Thongkho ma tiale okho alople zyen anyi ma pomegrenet noksabu zingle tüikya.

²¹Huram-e khop thongnu anyi a Zangshwom-Hom tunthoma dan; shuathongchi angkya a Jakin ilaxle tuita shuakuxchi ma tüikya ang Boaz le mün kox.

²²Lili maipua lailaile zingkya noksabu khop thongkhobu ma tüikya. Ilaxle ija ningle thongkho aza-apuakya mwot tsuakle hüi.

²³Huram-e khop-jan makhange tüküi fak ma fakta okao zule, fak anyi okao khaole ilaxle okan ma fak azok-okao zinglaxle tüikya.

²⁴Tüküi kotok kaxkom a tüküi füi lyenta ang asople khop zyen anyi tüikya.

²⁵Khop-jan füi zingkya maihupong 12 tok ma ija tüküi athongle tüikya. Kaopong to maihupong azom pong machi chito othüne hule tüikya.

²⁶Ija tüküi a chakpat 4 tütle tüikya. Ija okax a wansa kax lailaile kotho chito lili maipua othün anekya lailaile tüikya. Ija tüküi ma tipe 10, 000 shale tüikya.

²⁷Huram-e khop füi maihu-kanlin chuwüi bün zing; pangwüi tomwüi tomwüile zing. Ibu olwot ma sok 4, okhao ma sok 4 ilaxle ochuak ma sok 3 tüikya.

²⁸Ibu a otsa ma amongle ojong, ozem hia okhao tomwüile tüikya.

²⁹Ija ma mailang, maihupong, ozang füikya zünmok iningkyabu chasabu huanuma zinglaxle apüt ilaxle otsa ma mailang hia maihubu fangchi ma tamchu thakchi male tüle müile zingkya mama mwot-katbu apütle tüikya.

³⁰Müilin-zyen foto khop-jan füi zingkya zyen-cha ali ocha zwotkya dangzem füi zingle tüikya. Ozong ali ma tibom to thuale khopjan fakchabu tüikya. Ibu fakchabu a tüle müile zingkya mama omuabu füi aza-apua laxle tüikya füi thua laxle

³¹ija tibom tokma anguile otsa zingle tuita tüikya. Zyen okho to ija 45 sentimitar, tsuale lai ilaxle su ta ija ofang to tüikya.

³²Ochabu a sok 5 tsuale tüikya. Ibu a noksabu ofang ma tüikya ilaxle ocha apütkya dangzem janlang a otsa füi tuita ang tüikya.

³³Ochabu a man-kanlin chabu lailaile tüikya; ija dangzem janlang, jankan, jankiasa ilaxle jankia küikya janlang ibu pangwüi khop changkya.

³⁴Müilin-zyen pangwüi ma ija nwon angkya hanpakma ofangchi ozong ali ma fakchabu tüikya; ibu pangwüi zyen otsa füi tuita ang achangle zingle tüikya.

³⁵22 sentimitar, kaxkom a zyen okho akhople pangwüi ma tüikya; ija noksa hia fakchabu a zyen otsa füi tuita ang zingle tüikya.

³⁶Fakcha hia noksabu a, cherubim, mailang, pam pün, ilaxle onui tüikya khakha ma tüle müile zingkya mama chakzing maipua-wanzaobu füi akhople aza-apua laxle tüikya.

³⁷Ija a, zyen chemle zaipuix ija changpu; hwom pangwüi otom-owan ma talailaile tüikya.

³⁸Huram-e tibom bün, zyen tuipong hanpakma tibom tuipong zing. Tibom pangwüi okan ma sok 4, ti a 800 pe pong shale zing.

³⁹Chix zyen aga a Zangshwom-Hom zongma shuathong chikao ma apüt, ilaxle mama zyenbu a shuakuxchi ma apüt; tüküi a chixe shuathongchi homzong ma apüt.

⁴⁰Huram-e tiklakbu, hax hoklak hia khup ibu zing. JOWANPA Zangshwom-Hom hanpakma Solomon ang chixe ibu mwot pangwüi tsuakle kox. Ibibi a chixe zingkyabu changle: Thongnukho anyi Thongkho ma khup lailaile okho anyi Thongkho pangnyi ma atale janbüi 400 khop pomegrenet, okho akhople hopong-hopong ozyen anyi ma zing Müilin-zyen 10 Khup 10 Tiküi tuita Tiküi nwon ang maihupong 12 Tiklakbu, haxhok khuakhao, ilaxle khupbu Zangshwom-Hom ma lax ang Wanghompa Solomon hanpakma Huram-e zingkya ibu tuina pangwüi khop füi lipupu wüi.

⁴¹

⁴²

⁴³

⁴⁴

⁴⁵

⁴⁶Wanghompa-e ibu pangwüi Jordan angkya Sukkoth hia Zarethan nyi zo angkya janjao nui ma zingle alai ang tom.

⁴⁷Solomon-e ibu khop huanuma tüikya khoma tuak ma chithüt ikhoma obi tuak hex othüt chitüi.

⁴⁸Solomon ang Zangshwom-Hom hanpak ang hun makhange zingkya tuinabu tüihukya: Tötsap, Zang ang tö kox angkya an dan angkya tsapkhao,

⁴⁹wüntik lotsap bün, ibu a Ataxkya Otsao Nui tunthoma dan, aga a shuathongchi ma, aga a shuakuxchi ma; maipuabu, wüntikbu ilaxle khapbu;

⁵⁰wansabu, wüntik amüt angkya oling-olakbu, khupbu, ongan amüi angkya sokhixbu, ilaxle wün füikya wündix hok angkya khuakhaobu, Ataxkya Otsao Nui hia Zangshwom-Hom fülom hanpakma aja angkya kapat. Ibu pangwüi hun makhange zingle alai.

⁵¹Chemtue Wanghompa Solomon-e Zangshwom-Hom ma mwot pangwüi tsuakle hüipuix, hopa Dawid-e JOWANPA hanpak ang atsaole toxkya tuina: khop, hun hia mama-mama mwotkatbu pangwüi chixe Zangshwom-Hom to tui dannui ma dan.