Read Wancho Naga 2 Wanghombu 1 Bible Online

2 Wanghombu 1 - Wancho Naga bible

2 Wanghombu 1

¹Wanghompa Ahap zile paokya füima Moab nok Israel nok zan to ka.

²Ilaxle Ahaziah a Samaria angkya chix homthünkho tokya chix nuilua ma tüikya tanlya makhange düt laxle bole ngokya; chixe kaxhomixbu tsanle apaole hwom ang thüi: “Paokox, ilaxle ku kak chimüi-müiüile Ekron nok baozang Balzebub ma atüikox.”

³Ikoxle Tishbi nok Elija füi JOWANPAe akax: “Ajonglax, Samaria nok wanghome tsanle ahüikya kaxhomixbu füi apong ang paolax, ilaxle hwom ang, ‘Hünzom a Israel nok ma Zang müntüile Ekron nok baozang Balzebub hato tik ang paopuix nyi?’ le atüikox.

⁴Idaile athax JOWANPAe ile akaxle, ‘Oja lyakho ma nang dongle tüipuix, ikha angkya nang münthaiüi, ikoxle nang a ziüi jaojao.’” Ilaxle Elija atsaile pao.

⁵Ilaxle chemtue kaxhomixbu chix hato chatpuix, chixe hwom ang thüi: “Hünzom athax ojongto chatüi?”

⁶Ilaxle hwome chix ang thüi: “Khünak tuita kwom füi apong ang dongle ilaxle chixe kwom ang thüi: ‘Hünzom tsanle apaokya wanghompa hato chatlax, ilaxle chix ang thüikox, JOWANPAe ile thüile: Hünzom, Israel nok ma Zang müntüile kax ang Ekron nok baozang Balzebub ma tik ang paopuix nyi? Ija khoma oja lyakho ma nang dongle tüipuix ija angkya tamchithai toxle nang a zile paoüi.’”

⁷Chixe hwom ang thüi: “Hünzom füi apong ang donglaxle ibu kax akaxkya khünak a chemningle tüikya mix?”

⁸Hwome chix kax to lan: “Chix a müimun nyi awunlaxle tamchu müikhwon züpak füi zongbakle hit laxle tüile.” Ilaxle wanghompa-e thüi: “Ija a Tishbi nok Elija changle!”

⁹Ijama wanghome khünak sün 50, lompa tuita ma azui laxle chix hato tsanle apao. Ija mixsün Elija zui to ngui ilaxle chix haxkho ma thungle tüipongma chix füi zangwünle thüi: “O Zang khünak, wanghompa-e nang tamjuhüi leta.”

¹⁰Elija-e ija lompa ang thüi: “Ku a Zang khünak tuita jangchang thüiningle, zangkho tokhange wün adütlaxle nang füi tomle tüikya mixsün 50 mik amütle naxchang kox.” Ipongkhae zangkho tokhange wün düt ilaxle ija mixsün füi tomle tüikya khünak 50 mik amüt.

¹¹Tamchatle chu chixe 50 thakma apünkya lompa mama mixhuak 50 füi tsanle apao. Ija mixsüne Elija hato donglaxle thüi: “O Zang khünak, nang a wanghompa-e momle tamjuhüi leta.”

¹²Elija-e hwom ang thüi: “Ku a Zang khünak tuita jangchang, zangkho tokhange wün düt ang tomkox ilaxle nang füi tomle tüikya mixsün 50 chuwüi max ang tomkox.” Ifüi tomle zangkho tokya Zang wün düt ilaxle ija mixsün füi tomle tüikya khünak 50 mik-amüt.

¹³Anaole chu lompa azom lükya mama mixsün 50 füi tsanle apao. Ija mixsün haxkho to dong ilaxle Elija hato nguilaxle chikux thongle akhux ilaxle chingcha jule akax: “O Zang khünak, kue nang ma chingcha jule thüipu, ku khüzün tamchu nang thothale ngokya khünak ibu 50, kwom pangwüi nang tunthoma thalix ang naxchang.

¹⁴Hulax, zangkho tokhange wün düt laxle owang pongma hüikya 50 khünaknu thakma akhokya lompa anyi, hokhie apün laxle ngokya khünakbu füi tomle noknusa mik maxle changdaoa; ikoxlechu athax nang tunthoma tüikya ku khüzün to chingcha hüimi.”

¹⁵Ifüima JOWANPA kaxtaimixe Elija ang thüi: “Chix füi tomle jukox. Chix thua zale taxngo.” Ifüima Elija achexle wanghompa hato ju.

¹⁶Elija-e wanghompa ang thüi: “JOWANPAe ile thüitüia: Nange büthüikoxle Ekron nok baozang Balzebub hato tik ang apaopu? Ija kax tik angkya hanpakma Israel nok ma Zang chitüikya khoma hia? Ile changkya khoma, lyakho oja ma nang dongle ngopuix, ija lyakho angkya nang münthaiüi ikoxle ikhama zile paoüi.”

¹⁷Ikhoma Elija-e akaxkya JOWANPA kax changle angai ang wanghompa Ahaziah zile pao. Ilaxle Judah ma wanghom Jehusafat sasün Jehoram-e apünkya zanglao anyi lükya to, chix ang sasün chitüikya khoma, hotüi Joram a chix man ma wanghom ang achang.

¹⁸Wanghompa Ahaziah-e mokkya mwot pangwüi Israel nok Wanghombu Pukax Laipex ma komkaile zale thomle.