Read Wancho Naga 2 Wanghombu 10 Bible Online

2 Wanghombu 10 - Wancho Naga bible

2 Wanghombu 10

¹Ahap sixli pangwüi athütle Samaria ma 70 khünak ngole tüikya. Jehu-e laiza tuita zalaxle tingnu ma apün-adale ngokyabu hato, tingpu-haxpabu tamchu Ahap sixli hwome mamix ang laxle ngokyabu hato laifabu akat. Ija laiza ile tüikya:

²“Hünzom a wanghom sixlibu hanpakma akhix-amik angkyabu changtüi ilaxle hünzom chak ma ma man-kanlin, man, chang-pax tamchu ziakople tüikya tingnu, ibu pangwüi tüi. Idaile ija laiza kopkya füi tomle,

³hünzome wanghom sixli khama mixtsak-naomüi tuita zün, chix wanghompa ang achang ilaxle chix khose ang azan ang tom angkya changle.”

⁴Samaria ma apün-ada ang ngokyabu abüt-aban. Hwome thüi: “Kwome Jehu füi alünle chemle ajongüi? Wanghom Joram hia wanghom Ahaziah hokhie ngaxchu münthün!”

⁵Ikhoma wanghom homlo hia tingnu angkya nguakax-wangkhobue tingpu-haxpa hia wanghom sixli hwom mamixbu pangwüi füi asüilaxle ija kaxho Jehu hato akat: “Kwom a nang hi nang dabu changle, idaile kwome nange athüithüi mok ang achwonle tüile. Ikoxlechu kwome wanghom ang owachu münzing, nang zongto chem müile le thütpuix, ija ningle moklax.”

⁶Jehu-e hwom hato mama laiza tamchatle akat: “Hünzom ku füi jangtüi, ilaxle ku kaxtombu kax ma laxle tüi ang achwonle jangtüi, ngainyix ipongkhae Jezril ma ku hato Ahap sixli hwom khangbu apüihüi.” Ahap sixli hwom 70 khünak a Samaria angkya tingpu-haxpabu cha-o ma tüikya. Ibu a hwome tux-tsomle atsün.

⁷Chemtue Jehu laiza hwome kople changpuix, Samaria angkya lompabue Ahap sixli hwom 70 khünak pangwüi lang, hwom khangbu tsong ma sho, ilaxle ibu a Jezril to Jehu hato akat.

⁸Chemtue Ahap sixli hwom pangwüi khang dütle apüikya kaxwün Jehu hato wangpuix, chixe ibu othom anyi ma tingnu pan ma akhünle danlaxle ikhama ofüinop kople thom angkya kax kox.

⁹Swomsae chix tingnu pan to lai ilaxle ikhama tüikya khünakbu ang thüi: “Wanghompa Joram lang ang tung laxle chix mik amütkya a ku changpu, ija bama hünzom hünlix münchang. Ikoxle ibu owae lang?

¹⁰Ile changkyae, ajepa Elija makhange, Ahap sixli hwom hanpakma JOWANPAe chempang akaxle changdaopuix, ibu pangwüi changle ngaidaoale ahole.”

¹¹Ifüima Jehu-e Ahap füikya haxnu-homsa opang Jezril ma ngole tüikya hex, ibomachu chix nguakax-wangkhobu, chix zuikhuibu, chix zompu-zangpabu, ibu pangwüi lang; hwom opupuchu ozün ma chitox.

¹²Jehu a Jezril angkya Samaria to ka ang lai. “Chun-nyetmixbu pan”, le nyakkya jongtakha haxmik ma

¹³chixe zidaokya Judah wanghom Ahaziah füikya mamixbu züizüi apong ilaxle atüi: “Hünzom opangpang?” Hwome lan: “Ahaziah füikya mamixbu changpu. Kwom a wangchanu Jezebel sasün hwom hia wanghom kakobu achuak-achenle chang ang Jezril to kaiüi.”

¹⁴Jehu-e chix khünakbu ang kaxkox: “Ibu ozün ma kopkox!” Hwome ibu kop, ilaxle ikhama tüikya thapshua zui ma hwom lang. Hwom pangwüi 42 khünak tüikya, hwom bibi opupuchu ozün ma chitox.

¹⁵Ikha angkya Jehu achexle kax, ilaxle lomba to Rekab sasün Jonadab chix füi apong. Jehu-e chix ang salam koxle thüi: “Künyi mongjang asüi tüipu, nange ku to asun angchahex?” Jonadab-e lan: “Kue asunüi.” Jehu-e lan: “Jangchangba nange ku ang nang chak koxhüi.” Okhie chak akhao, ilaxle Jehu-e, chix to chix man-kanlin ma angat ang asunle angatle thüi:

¹⁶“Ku füito oman ilaxle kue JOWANPA to chemtukux mongkoxle changpuixle nang hanpak ang hule koplax.” Ilaxle hokhi tomtomle Samaria to man-kanlin kho ma ngale ka.

¹⁷Chemtue hwome ikhato alople changpuix, Jehu-e Ahap füikya haxnu-homsa pangwüi, tuita chitoxle lang. Ija a ile chang angkya hanpakma JOWANPAe Elija füi akax daokya ningle chang.

¹⁸Jehu-e Samaria angkya khünakbu sele asox ilaxle thüi: “Wanghompa Ahap-e Bal baozang to shwompu, ikoxle kue chix to kaile shwompu.

¹⁹Bal ajebu komkaile sele asoxhüi. Chix to shwomkyabu pangwüi tamchu chix zompu-zangpabu pangwüi, owachu shanle chitoxüi; kue Bal ang chongkya tö kox angkya tüile, ilaxle owapang ima chiwomüihex, hwom ang mik max ang tomüi.” (Ija a Bal to shwomkyabu pangwüi angle awüt angkya hanpakmale Jehu-e atsingle wünkya changkya.)

²⁰Ifüima Jehu-e kaxkox; Bal achuakle tö kox angkya hanpakma tyalaxle khuapu ang tom! Ija kaxho apukle,

²¹Jehu-e Israel haxtok pangnu khato wüi kax apuk. Bal to shwomle ngokyabu pangwüi ngui; owachu chinguile chingo. Hwom pangwüi Bal baozang to shwomkya nui to ngui ilaxle ija hom awang.

²²Ifüima Jehu-e zompu-zangpabu khama zom nyiza to hu ang ngokya mix ang otsao nyiwunbu apüilaxle baozang shwom-mixbu chak to kox angkya akax.

²³Ifüima Jehu chix jaojao Rekab sasün Jonadab füi baozang shwomkya hom to dong, ilaxle ikhama tüikya khünaknu ang thüi: “Tsingle koplax, hünzom khama pangwüi Bal to shwomkya mixmix wüi chang angkya mwot, JOWANPA to shwomkya mix owachu ima münwom angkya mwot.”

²⁴Ifüima Jonadab hokhie Bal ang zokle ashunkya tö kox ang hüi. Chixe baozang to shwomkya hom homtho to 80 khünak ziakop laxle ngo angkya hanpakma ija kax adangle fakya füi thom: “Hünzome khünaknu pangwüi lang angkya changpu; owae hwomkha angkya khünak tuita paole azang ang tomle changüihex, chix ma khüzün koxkya füitix ija tsangthom angkya changpu!”

²⁵Jehu-e tö koxle changkya füi tomle, chixe nyetmixbu hia nguakax-wangkhobu ang thüi: “Dongkox ilaxle hwom pangwüi lang kox; hwom owachu paole azang ang taxtom!” Hwom changlobu syetlaxle dong, hwom pangwüi langle awüt, ilaxle mangbu homtho to linle alai. Ifüima hwom a baozang shwomkya nuithongdua to dong.

²⁶Hwome ikha to tüikya zomtong longlo homtho to alai, ilaxle ija zokle ashun.

²⁷Idaile hwome baozang shwomkya hom hia zomtong longlo pangwüi olithule ama, ilaxle ija baozang shwomkya hom a faopao pom ang achang: oja athax kople tüile ngopuix.

²⁸Ile Jehu-e Israel haxtok angkya Bal baozang to shwomkya olom olithu.

²⁹Ikoxle wanghom Jeroboam, owae Bethel hia Dan ma maihupongsabu hun makhange zingle dan üntoxle Israel khünakbu ang ija to shwom ang tomlaxle achax ang tompuix, ija thüi anole chixe chuwüi ochax lyen.

³⁰JOWANPAe Jehu ang thüi: “Nange Ahap hwom sixli to ku mongtex ma shale hwondaoa. Ikhoma, kue nang füi tsaosaxle thüipu, nangsix-nangli hwom a Israel haxtok ma tsünthom ali kople apün-awangle ngo ang tomüi.”

³¹Ikoxlechu Jehu-e JOWANPA, Israel nok Zang Wanlombu chix mong makhange abakle chito; itülüi Israel khünakbu ochax to düt ang tomkya Jeroboam man mix to.

³²Ipongma JOWANPAe Israel haxtok wankam ahik ang süt. Siria nok wanghom Hazael-e Israel haxtok pangwüi tingtak laxle kop.

³³Ikhama Jordan shuanu zongma handünchi kao haxtok Arnon shuanu angkya Aroar tinglong shuathong chikao alople: Gad, Reuben hia Handünchi Manasseh hwom ngokya Gilid hia Bashan haxsüt pangwüi wom.

³⁴Jehu-e amokmok pangwüi, chix chatsak-muazongle mokkya mwot pangwüi Israel nok Wanghombu Pukax Laipex ma zale thomle.

³⁵Chix a zi, ilaxle Samaria ma akhün. Chix man ma chix sasün Jehoahaz a wanghom ang achang.

³⁶Israel nok wanghom tuita ang Jehu-e Samaria ma zanglao 28 apün-awang.