Read Wancho Naga 2 Wanghombu 11 Bible Online

2 Wanghombu 11 - Wancho Naga bible

2 Wanghombu 11

¹Wanghompa Ahaziah honue, Athaliah-e sasün langkya kax kopkya füi tomle, she-e chongwang hwom homkha pangwüi mik-amüt angkya kax kox.

²Ahaziah sasün Joash tata paole azang, chix chuwüi mamabu füi tomle langse pa, ikoxlechu chix a honuchong Jehosheba, wanghompa Jehoram sasün, tamchu owa Ahaziah zongto nanao ikoxlechu manunu sa changkya hex, she-e paole azün. She-e chix a Zangshwom-Hom ma tüikya jipnui to laxlaxle apüi ilaxle ikhato chix to humele thomlaxle Athaliah chak tokya azün. Ile chix a mik chiamütle danle tox.

³Zanglao azok kople Jehosheba-e ija nao to humele atsün, ilaxle wanghompa Athaliah-e apünle ngokya tuk akaile pyenle thom.

⁴Ikoxlechu zanglao anüt lükya to nguapa Jehoiada-e wangcha wanghombu nyetmix hia wanghom homlo nyetmixbu sele apüi ang tsan, ilaxle hwom Zangshwom-Hom to ngui angkya akax, ilaxle ikhama hwom ang chixe chem mok ang mwotlom zingle tüipuix, ija ma joma tom ang kox. Chixe hwom hato Ahaziah sasün Joash aho,

⁵ilaxle hwom ang ibibile kax kox: “Chemtue hünzom nazak nui nyix, ma mwot mok ang nguiüihex, othom azom kha angkya hünzom thom tuitae wanghom homlo nye angkya changle;

⁶mama othom tuita Sur zünkai nyele ajongüi, ilaxle othom tuita a zünkai ma, mama nyetmixbu nuakfüi ma nyele ajong angkya changle.

⁷Othom anyi opang nazakle nuikya nyix, mwot chitüile chakngaile asulaxpuix, hwom a Zangshwom-Hom ma wanghompa kho awa ang nyele ajong angkya changle.

⁸Hünzome wanghompa Joash, ma changlobu syet laxle, chix ojongto paopuix ikhato paole nye angkya changle. Hünzom hato soxle ahüihüi lang angkya wüi changle.”

⁹Nguakax-wangkhobue Jehoiada kaxtombu apa, ilaxle hwom khünakbu chix hato apüi. Nazakle nuikya nyix mwot tüikya hia chakngaile asukyabu pangwüi apüi.

¹⁰Chixe nguakax-wangkhobu ang Zangshwom-Hom ma thomkya, wanghompa Dawid kux di hia paxbu kox.

¹¹Chixe khünakbu a ma changlolo syet laxle, Zangshwom-Hom fülom akhople ajong laxle, wanghompa kho awa ang tom.

¹²Ifüima Jehoiada-e Joash homtho to alai, chixe khang ma khohom sünle kox, ilaxle chongwang hwome apün-awang angkya wanlom laifa tuita chix chak ma atwon Ifüima Joash to münga füi lile wanghom ang kamkya apuk. Khünaknue chak akhao ilaxle sungdünle shozex: “Wanghompa tsünlo-zaknuile ngohüi!”

¹³Wangchanu Athaliah-e nyetmixbu akhongkya ozing atat ilaxle Zangshwom-Hom to nonokhaile ngui. Ikhama khünaknu huanuma asoxle tüikya.

¹⁴Ikhato she-e wanghom hozün tuita Zangshwom-Hom fülom ma, wanlom ma tüikya ningle ajongle tüikya ngün. Chixe a nguakax-wangkhobue tamchu nyazong mütmixbue akankhople tüikya, ilaxle khünaknu a mongmüi atungle akhongle tamchu nyazong mütle tüikya. Athaliah-e mongtsik-mongma laxle she nyi-za akyetle akhong: “Thomün-o! Mwonün-o!”

¹⁵Jehoiada-e Athaliah a Zangshwom-Hom homkwon ma langsele chitsu, ikhoma chixe süpahi akhokya ang kaxkox: “She a nyetmixbu zyenle tüikya otanto alaikox, ilaxle she kho awa ang ajongkya mix jangtüi thüiningle ija khünak a lang kox.”

¹⁶Hwome she kop, wanghom homlo to apüi, ilaxle ikhato Man Zünkai ma hwome she lang.

¹⁷Zompu-zangpa Jehoiada-e wanghompa Joash hia khünaknu, JOWANPA füi Tsaotsüt hato apüile, hwom a JOWANPA khünaknu ang ngoüihex-ole tsaosax ang tom. Chixe wanghompa hia wangpünnu bama chuwüi Longzale tsaosax ang tom.

¹⁸Ifüima khünaknu a Bal baozang to shwomkya nui to ngui, ilaxle ija thuple atsun; hwome ikha angkya tö-tsap thuple akhix, Bal zompu-zangpa Mattan, tö-tsap tunthoma lang, ifüima Jehoiada-e Zangshwom-Hom nyele thom ang tom.

¹⁹Ilaxle chix nguakax-wangkhobu, wanghom nyetmixbu tamchu wanghom homlo nyetmixbu othome Zangshwom-Hom makhange wanghom homlo alople wanghompa zunle apüi. Hwom füifüi ma khünaknu azui. Nyetmixbu zünkai makhange wanghom homlo to noplaxle Joash-e-e chix tüntong kop.

²⁰Khünaknu pangwüi ang mong huanuma müi, ilaxle athax Athaliah wanghom homlo ma langle tingnu a wandangjale tüikya.

²¹Chix zanglao anüt ma Joash a Judah nok ma wanghom ang achang.