Read Wancho Naga 2 Wanghombu 12 Bible Online

2 Wanghombu 12 - Wancho Naga bible

2 Wanghombu 12

¹Israel wanghom Jehu-e apünkya zanglao anüt lükya to Judah ma Joash wanghom ang chang, ilaxle chixe Jerusalem ma zanglao 40 apün. Chix honu a Bersheba angkya mixcha Zibiah changkya.

²Zompu-zangpa Jehoiada-e chix to zün-saile tüikya khoma Joash-e chix tsün-tsün ma JOWANPA mong amüile mok.

³Ikoxlechu, songsari baozang to shwomkya onuibu bakle chiamale tüikya, ilaxle khünaknue ibu khato sobu zokle shwomkya tamchizak.

⁴Joash-e zompu-zangpabu sele asox ilaxle Zangshwom-Hom ma thashe chatkya hia owanlom ma tö koxkya tamchu mongmüi to koxkya ngunsyen athünle thom angkya hanpakma akax.

⁵Zompu-zangpa pangnusae mwot lailaiba Zangshwom-Hom azün-apünle chang angkya hanpakma, chixe thothale koxkyabu chak makhange tö koxkyabu kha angkya ngun athünle kop angkya hünlit lax.

⁶Ikoxlechu Joash-e apünkya zanglao 23 kopkya mong ma zompu-zangpabue Zangshwom-Hom azün-apünle humekya kha chitüi.

⁷Ikhoma chixe Jehoiada hia mama zompu-zangpabu se ilaxle atüi: “Hünzome Zangshwom-Hom azün-apünle büthüikoxle chichangpu? Athax makhange hünzome kopkya ngunsyen hünzome mün-athünüi, hünzome ibu a ku chak to kox angkya changpu, ikoxle tix Zangshwom-Hom azün-apünle changkya mwot tsuaküi.”

⁸Zompu-zangpabue ija kax to müiüile lan ilaxle Zangshwom-Hom azün-apünle chimok angkyachu müiüile jo ma tom.

⁹Ifüima Jehoiada-e suak tuita lax, okahux ma okha tuita zo, ilaxle Zangshwom-Hom to nopkya tsaxchi kao fülom tuita zui ma ija suak dan. Zompu-zangpa ima akhi ang ngokya mixe, zangshwom ang nguikya khünakbue apüikya ngun ija suak ma sho.

¹⁰Chemtue ija suak ma ngun huanuma awangle changüihex, wanghom khwa ma wangshem tüichong hia Nguakho nyi nguiüi, ija khop achuklaxle tuak ma thütüi.

¹¹Ija thüt-zingle tsuakkya füima ija khop ang Zangshwom-Hom ma mwot akhi ang ngole tüikyabu chak to koxle toxüi, ilaxle ijae zingpabu ang, pünzütle hom zaikya omün,

¹²longswon mün, longthup mün, hom azün-apünle zai ang shakkya pün hia long tha kox ang, ibomachu homzai mwot chempang ma baklaxpuix ibu pang tha kox ang twon

¹³Ikha angkya ngun funtachu, khopkhua-wansa hia nyazongbu zingkya to lax ang chichangba wüntik dannuibu zaikya ma, chichangba khop hia hun mwot-kat tüta ningkya zing angchu chitwon.

¹⁴Ibu pangwüi, hom azün-apünle mwot mokkya khünakbu ang koxkya hia tui-mwot shakkya ma ashix.

¹⁵Ija mwot to akhi-amik ang thomkyabu tuita chu thaithaxkya mix chitüi, idaile ibu ngunsyen tamchatle akiak-akungle hungo angkya mwot chemchu chitüi.

¹⁶Tsangmüt hia ochax tö hanpak ang koxkya ngun ija suak ma chisho, ija a zompu-zangpa hwom kux ang koxle apao.

¹⁷Ipongma Siria nok wanghom Hazael-e Gad tingnu tingtakle ija kop. Ifüima chixe Jerusalem tingtak angkya mongzangwünle tsuak.

¹⁸Judah nok wanghom Joash-e chix thoma apünkya Jehusafat, Jehoram hia Ahaziah hwome kop üntoxle JOWANPA hanpak ang atsaole thomkya tö pangwüi lax, ija to bole chix jaoe koxkya töbu tamchu Zangshwom-Hom hia wanghom homlo ma tüikya hun tuina, ibu pangwüi wanghompa Hazael hato akat ilaxle Jerusalem angkya chix süpahibu apao ang tom.

¹⁹Wanghompa Joash-e mokkya mwot pangwüi Judah nok Wanghombu Pukax Laipex ma zale tüile.

²⁰Wanghompa Joash nguakax-wangkhobue chix lang ang tung, ilaxle mixsün anyi, Shimeath sasün Jozakar hia Shomar sasün Jehozabad nyie, Jerusalem handünchi kao ma hax thokle asha laxle zaikya hom ma, Shella to juüi lom ma chix lang. Joash a Dawid tingnu angkya wanghom hwom zukting ma akhün, ilaxle chix sasün Amaziah a chix man ma wanghom ang achang.