Read Wancho Naga 2 Wanghombu 14 Bible Online

2 Wanghombu 14 - Wancho Naga bible

2 Wanghombu 14

¹Jehoahaz sasün Jehoash-e Israel nok apünkya zanglao anyi lükya to Joash sasün Amaziah Judah nok ma wanghom ang achang.

²Chix zanglao 25 ma wanghom ang achang, ilaxle Jerusalem ma chixe zanglao 29 apün. Chix honu a Jerusalem angkya Jehoiaddin changkya.

³Chixe JOWANPA pomtho ma amüimüi wüi mok ikoxlechu chix a hopa Dawid ningle a chichang; itülüi hopa Joash-e chemle mokpuix iningle mix mok.

⁴Chixe songsari baozangbu to shwomkya nuibu chiama, ilaxle khünaknue ibu khato tö koxkya hia ongan müikya so zokle baozangbu shwomkya tamchizak.

⁵Chemtue Amaziah-e apün-awangle chifün mongle changpuix, ifüi tomle chixe hopa, wanghompa langkya nguakax-wangkhobu pangwüi lang.

⁶Ikoxlechu, chixe hosu-sasün hwom a chilang ikoxle Mosa Wanlom ma, JOWANPA kaxtom: “Hosu-sasün hwom mütkop khoma honu-hopa hwom mik amüt angkya münchang, ilaxle honu-hopa hwom mütkop khoma su-sa hwom mik max ang tom angkya oli münchang; khünak tuita a chix huak mütkop khoma tix wüi mik-max ang tomüi”, le tüikya ningle mok.

⁷Humnu Haxsha ma Amaziah-e Edom nok süpahibu 10000 lang. Chixe Shella tingnu zan ma kop ilaxle ija ang Jokthil le nyak; ija mün anyix chuwüi tüile.

⁸Ifüima Amaziah-e Israel nok wanghom Jehoash hato azan angkya tsiakle kaxhomixbu apao.

⁹Ikoxle wanghompa Jehoash-e ibibi kaxnong achat: “Hanpak tuita ma Lebanon Haxnu angkya kongbüi zunu tuitae Sedar pün hato kaxho akatle thüi: ‘Nang sacha ku sasün ma laxhüi.’ Faomüi tuita leüi-e ija kongbüi hux to tingle afele tox.

¹⁰Athax Amaziah, nange Edom nok to lütlaxpusa le nang ang mong ngamtüi. Kopdaokya nang münchong füi mongtexsha le hom ma ngodao. Nang tamchu nang khünaknu haha towüi thama apong ang ngün-ngangale büthüi angkya tingtui lomle ngopu?”

¹¹Ikoxle Amaziah-e ija kax to kheba chithüi: ikhoma wanghompa Jehoash, chix khünakbu koplaxle kale Judah angkya Beth Shemesh ma chix füi azan.

¹²Amaziah süpahibu towüi anao, ilaxle chix süpahibu pangwüi mahom-hom to paole azang.

¹³Jehoash-e Amaziah a ozün ma koplaxle achale Jerusalem to pao ang tom, ilaxle Efraim zünkai makhange ozong angkya zünkai alople olwot fak 100 tukux tingnu long katuk thuple atsun.

¹⁴Chixe ataktak khop hia hun, Zangshwom-hom ma atüitüi tuina, wanghom homlo angkya ngunsyen, ibu pangwüi Samaria to laxlaxle chat. Chix füi tomle chixe zanda ang kople thomkyabu chuwüi laxlaxle pao.

¹⁵Jehoash-e amokmok pangwüi, Judah nok wanghom Amaziah füi mongchongle azankya, ibu pangnusa Israel nok Wanghombu Pukax Laipex ma zale tüile.

¹⁶Jehoash zile pao ilaxle chix a Samaria angkya wanghom hwom zukting ma akhün, ilaxle chix sasün Jeroboam II chix man ma wanghom ang achang.

¹⁷Judah wanghom Amaziah a Israel nok wanghom Jehoash zikya füima zanglao 15 ngo.

¹⁸Amaziah-e mokkya pangwüi Judah nok Wanghombu Pukax Laipex ma zale tüile.

¹⁹Jerusalem ma Amaziah lang ang tungle ngokya tüikya, ikhoma chix Lakish tingnu to paole azang, ikoxle chix zanpabu ikha kople to le nguilaxle chix lang.

²⁰Chix mang a mankho ma angat laxle Jerusalem to chat ilaxle Dawid tingnu angkya wanghom hwom zukting ma akhün.

²¹Judah angkya khünaknue, ikhoma chix sasün, zanglao 16 nao Uziah a wanghom ang kamle khohom sünle kox.

²²Hopa zile paokya füima Uziah-e tamchatle azanle kop üntoxle Elath tamchatle zingle amüi.

²³Judah nok wanghom Joash sasün Amaziah wanghom ang achangkya zanglao 15 lükya to Jehoash sasün Jeroboam Israel nok ma wanghom ang achang, ilaxle Samaria ma chixe zanglao 41 apün.

²⁴Nebat sasün Jeroboam, ami chix tho tokya wanghompa, owae Israel khünaknu ochax lom to zunle alyetpuix, ija zanglom thüi anole chixe chuwüi JOWANPA zongto ochax lyen.

²⁵Chixe Israel haxtok ang tüikya chaxwan shuakuxchi Hamath Lomnu makhange shuathongchi Molo-Omang Tinu alople, haxtok pangwüi chatle zan ma kop. Gad Hefar angkya Amittai sasün ajepa Jona, chix dapa makhange JOWANPA, Israel nok Zang-e ile changüihex-ole tsaosaxkya ningle ija ile chang.

²⁶Israel noke zothup huanuma apongkya JOWANPAe ngünle lax; hwom to asun-azu angkya mix owachu chitüi.

²⁷Ikoxlechu Israel nok komkaile tamchu othuithuima ozik-omüt apongle chang angkya a JOWANPA mongtex chichang, ikhoma chixe hwom wanghompa Jeroboam II makhange khosünle hüi.

²⁸Jeroboam II e mokkya pangwüi, chix mongchen füi achax-azanle hüikyabu, tamchu chixe Damaska hia Hamath Israel nok ang chemle achatle koxtsuak puix, ibu pangwüi Israel nok Wanghombu Pukax Laipex ma zale tüile.

²⁹Jeroboam zile pao, ilaxle chix a wanghom hwom zukting akhün, ilaxle chix sasün Zekariah a chix man ma wanghompa ang achang.