Read Wancho Naga 2 Wanghombu 15 Bible Online

2 Wanghombu 15 - Wancho Naga bible

2 Wanghombu 15

¹Israel nok wanghompa Jeroboam II e apünkya zanglao 27 lükya to Amaziah sasün Uzziah a Judah nok ma wanghom ang achang.

²Zanglao 16 ma chix wanghom ang achang ilaxle zanglao 52 apün. Chix honu a Jerusalem angkya Jekoliah changkya.

³Chixe chuwüi hopa mantole JOWANPA mik-hu ma sukyakya wüi mok.

⁴Ikoxlechu songsari baozangbu to shwomkya onuibu chiama; ilaxle khünakbue ibu ma otia ma wüi so zokle shwomle hia tö koxle wüi ngo.

⁵JOWANPAe Uzziah ma ngwon pax ang tom, ilaxle ija chix tsüntsün ma ija kak chipaole ngo. Chix a chix hom homto süile ngo, ilaxle chix sasün Jotham-e wangting apünle ngo.

⁶Uzziah-e mokkya mwot pangwüi Judah nok Wanghombu Pukax Laipex ma zale tüile.

⁷Uzziah a zile pao, ilaxle Dawid tingnu angkya wanghom hwom zukting ma akhün, ilaxle chix sasün Jotham a chix man ma wanghom ang achang.

⁸Judah wanghompa Uzziah-e apünkya zanglao 30 nguile changpongma, Jeroboam II sasün Zekariah a Israel nok ma wanghom ang achang, ilaxle Samaria ma chixe lyetjang azok apün.

⁹Chix tho angkyabu lailaile, chixe chuwüi JOWANPA zongto ochax lyen. Israel khünak ochax lom to zunle alyetkya Nabat sasün Jeroboam zanglom chimüikya man chixe chito.

¹⁰Jabesh sasün Shallum-e wanghompa Zekariah lang ang tungle Ibleam ma chix langle awüt, ilaxle chix man ma chix a wanghom ang achang.

¹¹Zekariah-e mokkya pangwüi Israel nok Wanghombu Pukax Laipex ma zale tüile.

¹²Idaile wanghompa Jehu hama: “Nang sixli tsünthom ali kople Israel nok ma wanghom ang achangüihex-ole tüikya JOWANPA kaxtsao ija kotok to changle ngai.”

¹³Judah wanghom Uzziah-e apünkya zanglao 39 lükya to Jabesh sasün Shallum a Israel nok ma wanghom ang achang, ilaxle chixe Samaria ma lyetjang tuita apün.

¹⁴Gadi sasün Menahem a Tirzah angkya Samaria to ngui, Shallum langle awüt, ilaxle chix a ija man ma wanghompa ang achang.

¹⁵Shallum-e mokkya pangwüi, chix huxtsing-loptsang to lünle, Israel nok Wanghombu Pukax Laipex ma zale tüile.

¹⁶Manahem a Tirzah to leüi lom ma tüiponge, chixe Tappuah tingnu, ima tüikya khünaknu ilaxle hozui-onam to tüikya haxtokbu komkaile ama, chemthüikoxle ija tingnu a chix tong to puile chihüi. Chixe wok ma nao tüile ngokya khünakbu ngaxchu wok pople chaole lang.

¹⁷Judah nok wanghompa Uzziah-e apünkya zanglao 39 lükya to Gadi sasün Menahem a Israel haxtok ma wanghom ang achang, ilaxle Samaria ma chixe zanglao 10 apün.

¹⁸Chixe JOWANPA zongto ochax lyen, ilaxle Nebat sasün wanghom Jeroboam, owae chix tsüntsün ma Israel nok ochax lom to azuile hüidaopuix, chix man tole Menahem-echu JOWANPA miksho ma ochax lyen ilaxle chix zikya kople chichang-chizangkya Jeroboam zanglom-saikha ningle ngole hüi.

¹⁹Asiria nok chongwangpa Tiglath Pilesar-e Israel nok to single ngui, ilaxle Menahem-e ija haxtok ma chix tsak-zong achenle kox angkya to fong angkya hanpakmale khop otuak ma 3800 kox.

²⁰Menahem-e Israel khünak hakpabu angkya atsangle khop ngunkhix 50 pong saile lax. Ikhoma Tiglath Pilesar a ma chaxwan to chat.

²¹Menahem-e mokkya mwot pangwüi Israel nok Wanghombu Pukax Laipex ma zale tüile.

²²Chix a zi ilaxle akhün, ifüima chix sasün Pekahiah a chix man ma wanghom ang achang.

²³Judah nok wanghompa Uzziah-e apünkya zanglao 50 lükya to Menahem sasün Pekahiah a Israel nok ma wanghom ang achang, ilaxle chixe Samaria ma zanglao anyi apün.

²⁴Nebat sasün Jeroboam, owae Israel nok ochax lom to zunle paopuix, chix man tole Pekahiah-e chuwüi JOWANPA zongto ochax lyen.

²⁵Pekahiah süpahibu khama lompa Remaliah sasün Pekah-e Gilid angkya khünak 50 kop, ilaxle Pekahiah a Samaria angkya wanghom homlo hommong angkya zanhu nui ma langle awüt, ilaxle ija man ma chix a wanghom ang achang.

²⁶Pekahiah-e amokmok pangwüi Israel nok Wanghombu Pukax Laipex ma zale tüile.

²⁷Judah nok wanghompa Uzziah-e apünkya zanglao 52 lükya to Remaliah sasün Pekah a Israel nok ma wanghom ang chang, ilaxle chixe Samaria ma zanglao 20 apün.

²⁸Nebat sasün wanghompa Jeroboam, owae Israel nok ochax lom to zunle alyetpuix, chix ma tüikya chichang-chizang zanglom twonlaxle Pekah-e chuwüi JOWANPA pomtho ma ochax lyen.

²⁹Pekah a wanghom ang ngole tüipongma Asiria nok chongwangpa Tiglath Pilesar-e Ijon angkya tingnu, Abel Beth Makah, Janoah, Kedesh, ilaxle Hazor, ilaxlechu Gilid haxtok ma tüikya, Galili, ilaxle Neptali, tingnu ibu kop üntoxle khünakbu a Asiria nok to zanda ang pao.

³⁰Judah ma Uzziah sasün Jotham a wanghom ang ngokya zanglao 20 lükya to Elah sasün Hoshea-e wanghompa Pekah lang ang tung, chix langle awüt, ilaxle chix man ma chix a wanghom ang achang.

³¹Pekah-e mokkya pangwüi Israel nok Wanghombu Pukax Laipex ma zale tüile.

³²Israel nok wanghompa, Remaliah sasün Pekah-e apünkya zanglao anyi lükya to Judah nok ma Uzziah sasün Jotham a wanghom ang achang.

³³Chix zanglao 25 ma wanghom ang achang laxle Jerusalem ma zanglao 16 apün. Chix honu a Jadok sacha Jerusha changkya.

³⁴Hopa Uzziah lailaile Jotham-e chuwüi JOWANPA zongto müikyakya wüi mok.

³⁵Ikoxlechu songsari baozang to shwomkya onuibu chiama, ilaxle khünaknue ongan müikya so zokle hia töbu koxle ibu to shwomle ngokya tamchizak. Zangshwom-Hom ma Shuakuxchi Zünkai zingkya mix a Jotham changkya.

³⁶Jotham-e chempang mokpuix, ibu pangwüi Judah nok Wanghombu Pukax Laipex ma zale tüile.

³⁷JOWANPAe Siria nok wanghompa Rezin hia Israel nok wanghompa Pekah nyi, Judah tingtak ang ahüikya a wanghom ang chix ngole tüikya tuk changkya.

³⁸Jotham zile pao ilaxle chix a Dawid tingnu ma wanghom hwom zukting ma akhün, ilaxle chix sasün Ahaz a chix man ma wanghom ang achang.