Read Wancho Naga 2 Wanghombu 16 Bible Online

2 Wanghombu 16 - Wancho Naga bible

2 Wanghombu 16

¹Israel haxtok ma Remaliah sasün Pekah wanghom ang ngokya zanglao 17 lükya to, Judah nok ma Jotham sasün Ahaz a wanghom ang achang.

²Zanglao 20 ma wanghom ang achang laxle chixe Jerusalem ma zanglao 16 apün. Chixe hopu Dawid angkya müikya zanglom chilax itülüi chixe, JOWANPA, chix Zang zongto chem chimüipuix ijaja mokle,

³chixe Israel nok wanghombu man to. Israel noke hwom haxtok alople changpongma, JOWANPAe jwonle apaokya khünakbue mokkya, nushixdongle baozang to shwomkya olom tole, chixe chix sasün tuita zokle ashunkya tö hanpak ang chapa ang kox.

⁴Haxhuabu hia zangkhung tüikya pün pangwüi tong to zaile tüikya, songsari baozangbu to shwom angkya onui to Ahaz-e töbu kox tamchu ongan müikya sobu zok.

⁵Siria nok wanghom Rezin hia Israel nok wanghom Pekah nyie single Jerusalem kop, ikoxlechu Ahaz to lüt ang chitho. (

⁶Ipongma Edom nok wanghompa-e Elath tingnu chix chak ma kop, ilaxle ikhama ngokya Judah nokbu jwonle apao. Edom nok Elath ma anok, ilaxle athax kople ngole tüile.)

⁷Ahaz-e Asiria wanghompa Tiglath Pilesar hato ija kax füi kaxhomix akat: “Ku a nang to mongkoxkya nang dapa tuita changle. Ngui laxle ku to single ngokya Asiria hia Israel nok wanghombu chak tokya ku khosele fahüi.”

⁸Ahaz-e Zangshwom-Hom hia wanghom homlo ma tüikya khop hia hunbu chongwangpa hato hingho ang koxle akat.

⁹Ahaz-e tsaiju-kaxjule changkya ningle Tiglath Piresar a chix süpahibu koplaxle Damaska tingtak ang ka, ija kop, wanghompa Rezin lang, ilaxle khünakbu Kir nok to kun ma thom ang pao.

¹⁰Chemtue wanghompa Ahaz a chongwanghom Tiglath Pilesar füi apong ang Damaska to nguipuix, chixe ikhato tö-tsap ngün ilaxle zompu-zangpa Uriah hato otiatiale achat. Ikha angkya muaküsa jali tuita chu chiama.

¹¹Ikhoma Uriahe ija lailaile tö-tsap tuita zingle alai ilaxle Ahaz chatüi thoto wüi ija zingle tsuak.

¹²Damaska tokya chix chatkya zuma, Ahaz-e ija tö-tsap zingle tsuakdaokya ngünle lax.

¹³Ikhoma chixe ijama müi hia tsax töbu kox, ilaxle ju thokle tö kox üntoxchu ija ding ma wüi notom-tusüi aji tö kox.

¹⁴JOWANPA ang atsaole koxkya khop tö-tsap a ija tö-tsap hozün hia Zangshwom-Hom nyi bama tüikya. Ikhoma Ahaz-e ija tö-tsap hozün zongma chaknong ma achex.

¹⁵Ifüima chixe Uriah ang kax kox: “Ija chongkya tö-tsap ku kux a anopningle zokle ashunkya tö kox ang hia hansong ma saxziak tö kox angkya hanpakma twonkox. Wanghompa hia khünaknu kux zokle ashunkya tö hia saxziak tö kox angkya hanpakma a, anaolechu khünaknu kux grepti-ju hanpak angchu naxchang. Tö koxkya müi aji pangwüi ija dingma thokkox ikoxlechu wi tö-tsap a kue tsaxchi kao ma nantak angkya hanpakma ku kux ang danle toxkox.”

¹⁶Uriahe wanghompa kaxtom ningle mok.

¹⁷Zangshwom-Hom ma twonkya khop-zyen wanghompa Ahaz-e alai ilaxle ibu ma tüikya khopbu alaile lax. Chixe khop makhange zingkya maihubu 12 tok ma tüikya wi bomnu lax ilaxle ija a long ding ma dan.

¹⁸Ilaxle Asiria chongwangpa mong amüi ang Ahaz-e Zangshwom-Hom angkya wanghom tüntong tanlya apao ilaxle Zangshwom-Hom to nop angkya wanghom fülom tix.

¹⁹Wanghom Ahaz-e mokkya pangwüi Judah nok Wanghombu Pukax Laipex ma zale tüile.

²⁰Ahaz a zile pao, ilaxle chix a Dawid tingnu ma wanghom hwom zukting ma akhün, ilaxle chix sasün Hezekiah a chix man ma wanghom ang achang.