Read Wancho Naga 2 Wanghombu 17 Bible Online

2 Wanghombu 17 - Wancho Naga bible

2 Wanghombu 17

¹Judah wanghompa Ahaz-e apünkya zanglao 12 lükya to Elah sasün Hoshea a Israel nok wanghom ang achang, ilaxle chixe Samaria ma zanglao aku apün.

²Chixe JOWANPA zongto ochax lyen ikoxlechu chix tho to apünle ledaokya Israel nok wanghombu tukux tomtatale a chichang.

³Asiria nok chongwangpa Shalmanesar chix füi azan. Hoshea-e Shalmanesar pomtho to chak ajong ilaxle zangpua süi koxle hüi.

⁴Ikoxle zangta a chixe Ijip nok wanghompa So hato, Asiria nok ang süi thale ngokya azak angkya bama chix to asun ang tho angchale atüikya kax füi kaxhomixbu akat. Chemtue Shalmanesar-e ija tikle laxpuix, chixe Hoshea kop ilaxle kun khato shole thom.

⁵Ifüima Shalmanesar-e Israel nok tingtakle Samaria akhople kop. Ile akhople kopkya zanglao azom lükya to,

⁶ija a Hoshea-e apünkya zanglao aku lükya changkya. Asiria nok wanghompa Shalmanesar-e Samaria kop, Israel khünakbu Asiria to zanda ang kople pao ilaxle hwom züizüi Halah tingnu ma ngo ang tom, züizüi a Gozan haxsüt angkya Habor Shuanu zui ma ngo ang tom, ilaxle züizüi a Medi nok tingnu ma ngo ang tom.

⁷Ijip nok wanghompa chak tokya alailaxle Ijip nok tokya khosünle apüikya JOWANPA, hwom Zang zongto Israel noke ochax lyenle changkya khoma Samaria nguak angkya hato hüi. Hwome mixnok baozangbu to shwom.

⁸Chix khünakbu nguikya zuma JOWANPAe jwonle apaokya khünakbu zomzang hwome lax, ilaxle Israel nok wanghome apüikya zomzangbu chu kop.

⁹Israel noke JOWANPA hwom Zang-e münsule athüithüi mok. Hwome hixkya tingsa makhange chongkya tingnu to lünle hwom tinglong pangnu towüi hwome baozang shwomnuibu zaile alai.

¹⁰Haxhua pangnu khato wüi tamchu zangkhung atüitüi pünnu tong ma hwome long küi ilaxle baozangchanu Asherah chapabu zing.

¹¹Ilaxle hwom chaxwan angkya JOWANPAe jwonle apaokya songsari khünakbu hwon laxlaxle hwome tö-tsap pangnu khato wüi ongan müikya sobu zokle shwom. Hwome mokkya ochax mwot pangnusa füi hwome JOWANPA ang mongtsik adün,

¹²ilaxle ija chapabu to taxshwomle thüikya JOWANPA kaxtom kax ma chilax.

¹³JOWANPAe Israel nok hia Judah nok ang kaxkhün kox ang, chix kaxhomixbu hia ajebu ahüilaxle thüi: “Hünzom ochax lombu danle toxdao ilaxle ku kaxtombu kax ma laxlax, ija ku Wanlombu a kue hünzom putong hwom ang koxdaopu, ilaxle ija ku da ajebu makhange hünzom hato tailaile apüile koxkya tüile.”

¹⁴Ikoxlechu hwome ija kax ma chilax, hwom ang chuwüi hwom pupa hwom lailaile mongkhüi ilaxle JOWANPA to mongongkya kha chitüi.

¹⁵Hwome chix kaxtombu kax ma münlaxpule angam, hwome hwom pupa hwom füi tsaole thomdaokya JOWANPA Tsaotsüt chithom ilaxle hwome JOWANPA kaxkhün ahai. Hwome chemjao chichangkya chapabu to shwom ilaxle hwom chemjao ang chiachang, ilaxle hwom tomzi nokbu zom-zang to, ilaxle man taxto-ole thüikya JOWANPA kaxtom kax ma chilaxle tüi.

¹⁶Hwome JOWANPA, hwom Zang wanlombu pangwüi ama ilaxle hwome shwom angkya hanpakma jan makhange baozang maihupong anyi zingle alai. Hwome baozangchanu Asherah chapa zing, lyettsibu to shwom, ilaxle Bal baozang thothale chang.

¹⁷Hwome songsari baozangbu to shwom ang masu-masabu zokle ashunle tö kox; hwome chajik-muashem, opa-nanpa, ibu füi tsaitik-kaxshole chang, ilaxle JOWANPA ma chem chimüipuix ijaja mok ang hwome mongkox, ile hwome JOWANPA ang mongtsik adün.

¹⁸JOWANPA ang Israel nok füi mongma, ilaxle chixe hwom chix miktho angkya max ang tom, ikoxle Judah tata danle tox.

¹⁹Ikoxle Judah noke ngaxchu JOWANPA hwom Zang wanlombu kax ma chilax. Hwome chuwüi Israel nok zom-zangbu thüi anole chang.

²⁰JOWANPAe Israel nok pangwüi chilaxle awüt, ilaxle chix miksho angkya hwom akiakya mixhuak komkaile ma-amüt ma-amütle tüle shixkya hwom zanpabu chak to kox.

²¹JOWANPAe Israel nok Judah angkya ahan füima, Israel noke Nebat sasün Jeroboam hwom wanghompa ang zing. Jeroboam-e hwom ang JOWANPA danle tox ang tom ilaxle khomtsikya ochax lom to hwom alyet.

²²Hwome Jeroboam manto ilaxle chixe athaithai ma thaile tamchizakle ochax lyen.

²³JOWANPAe chix da ajebu makhange hwom ang kaxkhün koxle hüikya ningle, chix miksho angkya hwom khünak tuita ota chitoxle ma-amüt ma-amütle hwome ochax lyen lüwüi ngo. Ikhoma Israel nok Asiria noke zanhok ma koplaxle pao, ilaxle hwom a athax kople ikha to ngo.

²⁴Asiria nok chongwangpae khünaknu Babilon, Kuth, Iwah, Hamath hia Sefarwaim, ibu tingnu tokya apüilaxle kople thomkya Israel nokbu lüi ma Samaria tingnubu ma ngo ang tom. Hwome ibu pangnu hwom kux ang kop ilaxle ibu ma ngo.

²⁵Hwom ikhato ongui-wang pongma hwome JOWANPA to chishwom, ikhoma chixe mailangbu apüi ilaxle hwom züizüi langle awüt.

²⁶Asiria nok chongwangpa hama, chixe Samaria ma ngo ang tsankya khünakbu ija nok ma tüikya baozangbu wanlom müntik, ikhoma ija nok baozange mailangbu ahüilaxle hwom lang ang tomle.

²⁷Ikhoma chongwangpae kax kox: “Kwome zanda ang koplaxle apüikya kha angkya zompu-zangpa tuita achat-hüi, chix chatlaxle eto ngo ang tomkox, ilaxle khünaknu hama ija nok baozang wanlom apua-anole kox ang tomkox.”

²⁸Ikhoma Israel nok zompu-zangpa tuita Samaria to paodaokya Bethel to chatlaxle ikhato khünaknu hama JOWANPA shwomtole chang angkya anwot-anole ngo.

²⁹Ikoxlechu Samaria ma ngole tüikya khünakbue chizakle makuxkux chapabu zingle wüi ngo, ilaxle hwome ibu Israel noke zingkya zangshwomnuibu ma dan. Khünak mathomthom süile tingnu ma ngokyabue ma nuinui to chapabu zai.

³⁰Babilon khünakbue Sukkoth Benoth baozang chapabu zing, Kuth khünakbue Nergal chapabu zing, Hamath khünaknue Ashima chapabu zing;

³¹Iwah khünakbue Nibhaz hia Tartak chapabu zing, ilaxle Sefarwaim angkya khünakbue hwom baozang Adramelek hia Anamelekbu ang masu-masabu zokle ashunkya tö ang kox.

³²Khünak ibue JOWANPA tochu shwom ilaxle hwomkha angkya pangnu likan kha angkya zompu-zangpabu kam laxle zangshwom-nuibu to hwom hanpakma tö kox ang tom.

³³Idaile hwome JOWANPA to shwom, ikoxlechu hwom ojong nok tokya nguipuix, ikha tokya zanglom to e hwome ma baozangzang to chuwüi shwom.

³⁴Hwome anyix kople hwom zanglom ozangbu tole tüile. Hwome JOWANPA to chishwom ilaxle chixe Jakop, owa ang Israel le mün fapuix, chix sixli hwom ang fakya kaxtombu kax machu chilax.

³⁵JOWANPAe hwom füi Tsaotsüt zing ilaxle hwom ang kax kox: “Mama baozangbu to taxshwom; hwom tong to taxakhux chichangba hwom thothale taxchang, chichangba hwom ang tö koxlechu taxchang.

³⁶Hünzome JOWANPA, owae hünzom chongkya janzüi füi Ijip nok tokya apüile changpuix, ibu kax ma lax angkya changpu. Hünzom ku tong to akhuxüi ilaxle ku ang töbu koxle changüi.

³⁷Othuithuima hünzome wanlombu kax ma laxle tüi angkya tamchu kue hünzom hanpakma jali fakya kaxtombu kax ma laxle tüi angkya changpu. Hünzom ma baozangbu kax ma laxle chichangüi,

³⁸ilaxle kue hünzom füi zingkya Tsaotsüt chialak.

³⁹Hünzome JOWANPA hünzom Zang, ku kax ma lax angkya oli changpu, ilaxle kue zanpabu chak tokya kue hünzom khosünle changüi.”

⁴⁰Ikoxlechu khünak ibue ija kax ma chilax, ilaxle hwome chizakle ma zanglombu tole ngo.

⁴¹Idaile khünak ibue JOWANPA to shwom, ikoxlechu hwome hwom chapabu to chuwüi shwom; ilaxle anyix kople hwom sixlibue chizakle ile mokle tüile.