Read Wancho Naga 2 Wanghombu 18 Bible Online

2 Wanghombu 18 - Wancho Naga bible

2 Wanghombu 18

¹Israel nok ma Elah sasün Hoshea-e apünkya zanglao azom lükya to Ahaz sasün Hezekiah a Judah nok ma wanghom ang achang.

²Zanglao 25 ma tüipongma chix a wanghom ang achang ilaxle chixe Jerusalem ma zanglao 29 apün. Chix honu a Zekariah sacha Abijah changkya.

³Chixe hopa Dawid mantole JOWANPA zongto chem müipuix ijaja mok.

⁴Chixe Bal baozang to shwomkya onuibu ama, longlo küikyabu ama ilaxle baozangchanu Asherah chapa dakle atsun. Chixe Nehushtan le nyakkya khop füi Mosa-e zingkya pe chuwüi akhixle awüt. Ija tuk kople Israel noke ija achuakle ongan müikya so zokle shwomle tüikya.

⁵Hezekiah-e JOWANPA Israel nok Zang to mongong thom; Judah ma chix lailaikya tamchatle chitüitox, chix thotochu chitüi chichangba chix füi tochu chitüi.

⁶Chixe JOWANPA to mongong thom ilaxle otuechu chixe kax ma chilaxle chitüitox, ikoxle Mosa ang koxkya JOWANPA kaxtombu pangwüi otia ma thom.

⁷Ikhoma JOWANPA a chix füi tüikya ilaxle chix mwottho pangwüi ozalünle le. Chix Asiria chongwangpae apünkya fang ma ngose chitsu ilaxle chix füi alünle ajong.

⁸Chixe Filistia nok to lüt ilaxle noksa naoli makhange chongkya tingnu to lünle, Gaza hia ija akhople tüikya haxtokbu womle hwom ngokya kha tingtakle tsui.

⁹Hezekiah-e apünkya zanglao ali lükya to, oja wanghompa Hoshea-e Israel nok apünkya zanglao anüt lükya changkya hex, Asiria nok chongwangpa Shalmanesar-e Israel nok tingtak ilaxle Samaria tingnu akhople kop.

¹⁰Ile akhople kople thomkya füima zanglao azom lükya to Samaria nguak. Ija a Hezekiah-e apünkya zanglao azok lükya to tamchu Hoshea-e apünkya zanglao aku lükya to ile chang.

¹¹Asiria nok chongwangpae Israel khünakbu Asiria nok to zanda ang koplaxle pao, ilaxle hwom züizüi Halah tingnu ma ngo ang tom, züizüi a Gozan haxsüt ma tüikya Habor Shuanu zui ma anok ang tom, ilaxle mamabu a Medi nok angkya tingnubu ma ngo ang tom.

¹²Israel noke JOWANPA, hwom Zang kax ma chilax üntoxle hwom füikya JOWANPA Tsaotsüt ama tamchu JOWAN dapa Mosa makhange hwom ang koxkya wanlombu kax ma chilaxle tüikya khoma Samaria a nguak angkya lai. Hwome chiapa tamchu kax ma chilax.

¹³Asiria chongwangpae apünkya zanglao 14 lükya to Judah angkya pan zailaxle ziakople thomkya tingnubu single, ibu to lüt.

¹⁴Lakish ma tüikya Sennacherib hato Hezekiah-e ija kaxho akat: “Kue thaile mokdaoa, chingcha üntoxle nang zansing shongzak-hüi ilaxle kue nange ajuju koxüi.” Hezekiah kax to chongwangpa kaxlan a ile changkya: “Hezekiah-e khop otuak ma 10000, hun 1000 chix hato akat angkya wüi changpu.”

¹⁵Zangshwom-Hom hia wanghom homlo suak ma atüitüi khop Hezekiah-e chongwangpa hato akat.

¹⁶Chixe Zangshwom-Hom kahakbu angkya hunbu hongle ashix ilaxle chixjao jaoe chwople zingkya kapox angkya hunbu chixe hongle alai, ilaxle chixe ibu pangwüi Sennacherib hato akat.

¹⁷Asiria nok chongwangpae Lakish angkya süpahibu huanuma, Hezekiah zan to ka ang Jerusalem to akat. Ija othom a chix süpahi nguakax-wangkho hwom mixsün azome azuile tüikya. Chemtue hwom Jerusalem to nguile changpuix, thakchi tilua angkya ti apüi tilom makhange hwome nyitak mixbue mwot mokle tüikya lomtang ziakop.

¹⁸Ifüima hwome wanghompa Hezekiah apüi ang apao, ilaxle chix nguakax wangkho hwom mixsün azom a chix füi apong ang lai: Hilkiah sasün Eliakim, chix a wangshem tüichong ang ngokya mix; Shebna, chix a khwa ma chakzapa; Asaf sasün Joah, chix a chakza mwot pangwüi to akhi-amikle changkya mix, hwombibi.

¹⁹Asiria nok nguakax-wangkho tuitae hwom ang, Hezekiah ma mongong itukux chemkha tokya tüipuixle chongwangpae tsingsele tsukya kax apuale kox.

²⁰Chixe atsangle akax: “Nange zangwün zaza füi süpahibu lüix ma mwot pangwüi tsuaküile thütpia? Nange Asiria zongto alünle ajong koxle, nang to owae asunüile texlaxpu?

²¹Nange a Ijip noke nang to asunle faüile textüi angpu, ikoxle ija a acha pün kiathox ang laxkya thatha changüi, ija a pakle paoüi ilaxle nang chak to hukle laxüi. Chemtue owawae chix to mongongle changüihex, Ijip nok wanghompa-e ilele wüi hwonpu.”

²²Ija Asiria nok nguakax-wangkhoe chizakle akax: “Chichangba nange, JOWANPA, nang Zang to mongongpule ku hama akaxüi hia? Judah hia Jerusalem ma tüikya khünaknu ang Jerusalem tö-tsap tata ma tix tö koxle chang angkya oli changpule akaxlaxle, Hezekiah-e pünle amakya zangshwomnui hia tö-tsap ibu a JOWANPA kux changkya.

²³Kue chongwangpa mün ma nang füi tsaitsuak-kaxtsuakle changüi. Nange ibibi bakle aham angkya khünakbu jang ataktsuak thüiningle kue nang ang man 2000 koxüi!

²⁴Nang a Asiria nok nguakax-wangkho hwom khama ahixkya füi apyen ang ngaxchu münasu, ikoxle ngaxchu Ijip noke nang hato man-kanlinbu hia mankho ma azankya süpahibu akatüile nang mongong ngopu!

²⁵Kue hünzom haxtok tingtak laxle ibu amakya a JOWANPA tokhange fongkya chilax homtoxle changpuixle nang thütdaicha? JOWANPA chix jaoe ku ang, ija to singlaxle tingtakle ama angkya kax koxpu.”

²⁶Ifüima Eliakim, Shebna hia Joah hwome ija nguakax-wangkho ang thüi: “Alixachong, kwom füi Aram nok kax ma akaxhüi; kwome ija kax tsingle, Ibri kax ma taxakax; zünkho angkya khünaknu noknusae apale ngole.”

²⁷Chixe lan: “Hünzom tamchu wanghompa tata hama ibu akax angkya hanpakmale chongwangpae ku ikhato akatpuixle hünzome thütdaicha? Ile münchang, ikoxle kue zünkho to ngokya khünaknu füichu akax ngopu, hünzom lailaile hwome chuwüi hwom fao sax ilaxle hwom hip lingle chang angkya changle.”

²⁸Ifüima ija nguakax-wangkho ajong ilaxle Ibri kax ma azax: “Asiria nok chongwangpae hünzom füi chem akaxle ngopuix ija to na thalax!

²⁹Hezekiah-e hünzom dyenlale chichang angkya bama chixe hünzom ang kaxkhün koxpu. Hezekiah-e hünzom khosün ang müntho.

³⁰Ilaxle hünzome JOWANPA to mongong tüi angkya bama chixe hünzom mong jikle adüt ang taxtom. JOWANPAe hünzom khosünle changüi ilaxle Asiria nok süpahibue hünzom tingnu tingtakle chang ang chitomle chixe abaxle tuiüile taxthüt.

³¹Hezekiah kax to tax-apa. Asiria nok chongwangpae hünzom ang tingkhua angkya lai ilaxle chak ajongle chix tong to pui angkya kaxtom koxle. Hünzom ang ma grep ziak angkya oti ling ang tomüi, ilaxle hünzom ang ma fupsa pün angkya fupziakbu sax ang koxüi tamchu hünzom tüküi angkya tibu ling ang tomüi.

³²Chongwangpa-e hünzom, ma haxtok lailaile tüikya khato chatlaxle tingkople chang ang makox tanto hom zaile, grepti-ju kop angkya grep haxtok hia an zing angkya hanpakma sozam, olip münga hanpakma olip, ilaxle nax-ti tüikya haxtok ma oshing mongle machang tanto hünzome otiatia lüwüi saxlaxle ngo ang ataküi. Chix kaxtombu kax ma laxle hünzom jangtüi, hünzom a münziüi ikoxle JOWANPAe hünzom a ozün ma ngo ang tomüile Hezekiah ang hünzom angat ang taxtom.

³³Owawa baozange ibu haxtok Asiria nok chongwangpa chak tokya khosünle tütüitoxcha?

³⁴Hamath hia Arpad baozangbu athax omaün? Sefarwaim, Hena hia Iwah baozangbu omaün? Owawae Samaria nok khosünle changhexcha?

³⁵Baozang ibu tuitata ngaxchu chongwangpa chak tokya hwom haxtok khosünle kop-hexcha? Jangchangba JOWANPAe Jerusalem khosün ang thoüile chem makhange hünzom mongto ajang ang tom?”

³⁶Khünaknu dang ang dang angle süt, wanghom Hezekiah-e hwom füi akaxle thomdaokya ningle hwome kaxsix tuita chidün.

³⁷Ija ma Eliakim, Shebna hia Joah hwome mongtsik laxle hwom nyi-za akyet, ilaxle Asiria nok nguakax-wangkho tuitae akaxkya kax ija wanghompa hato wünle kox.