Read Wancho Naga 2 Wanghombu 19 Bible Online

2 Wanghombu 19 - Wancho Naga bible

2 Wanghombu 19

¹Wanghompa Hezekiah ang hwom zangwün atatkya füi tomle mongtsik, ilaxle chix nyipong akyet, ija man ma nyikhwon apong üntoxle JOWANPA Zangshwomnui to pao.

²Chixe nguakax-wangkho tuita wanghom homlo ma wangshem tüichong ang ngokya mixsün Eliakim, khwa ma chakza mix Shebna ilaxle zompu-zangpa khama tüichong othom, Amoz sasün ajepa Isaia hato akat. Hwome chuwüi nyikhwonbu awunle kop.

³Ija a chixe Isaia hato hwom makhange hokya kaxho: “Anyix a sikngün angkya hanpak; kwom a sikngün ma tamchu thajao ma tüile. Kwom a, sheko mixnu tuitae naoput wok kakle ngo, ikoxlechu pux angkya zong chitüile maxngokya mixcha tuita ningle changle.

⁴Asiria nok chongwangpae ozün ma tüikya Zang tha ajao ang chix nguakax-wangkho khama akhokya ahüile. JOWAN ZANG, nange ibu thajao wünhai kax nax atat ilaxle ibu akaxkyabu to sikngün koxle naxchang. Ikhoma kem khünaknu ozün ma tüile ngokyabu hanpakma zangjople changkox.”

⁵Chemtue Isaia-e wanghompa Hezekiah kaxho koppuix,

⁶chixe ija kaxnong achat: “Chixe hünzom khosün ang münthopule JOWANPA ada angkya zangwün füi Asiria noke hünzom to aza-anale chang ang chitom angkya JOWANPAe nang füi akaxle.

⁷JOWANPAe chongwangpa na ma tüle chongkya ozing atat ang tomüi, ija thoto paole chix a hwom chaxwan to chatüi ilaxle ikhato JOWANPAe chix a mik max ang tomüi.”

⁸Asiria nok nguakax-wangkhoe, chongwangpa a, hozui ma tüikya tingnu Libnah füi azan ang ka angkya Lakish angkya achexle changdaoa, le awan ang kop; ikhoma ikhato chix füi apong ang chix ka.

⁹Etheopia nok wanghom Tirhakah-e zunlaxle Ijip nok süpahibu hwom to sing ang hüile ngokya kaxho Asiria nok ha alop. Chemtue ija kax chongwanghompa-e atatle laxpuix, chixe Judah nok wanghompa Hezekiah hato laiza akatle,

¹⁰“Nange ongkya Zang-e nang a ku chak ma chilam angkya nang füi akaxdaoa, ikoxlechu ijae nang dyenlale chang ang taxtom.

¹¹Asiria nok chongwangpae, chixe amüt-sele tsukya nok to chemle hwonpuix, ija nange atatle ngopu. Nang azang ang thoüile nange thütlaxpia?

¹²Apu-apa hwome Gozan, Haran, hia Rezef, ibu tingnu ama ilaxle Telassar ma ngokya Betheden khünakbu langle awütpu, ilaxle hwom baozang opupuechu ibu khosün ang chitho.

¹³Hamath, Arpad, Sefarwaim, Hena, hia Iwah nok wanghombu a omaün?”

¹⁴Wanghompa Hezekiah-e kaxhomix angkya laiza lax ilaxle ija e, ifüima chix Zangshwom-Hom to pao, ija laiza a JOWANPA tunthoma dan,

¹⁵ilaxle zangjop: “O JOWANPA, Israel nok Zang, owa ozang füikya zünmok ding ma thungle tüipuix, Zang a nang tata wüi, nange tix chaxwannu wangtingbu thak ma apün-awangle ngopu. Nange ding-hi-hax zingle alaipu.

¹⁶JOWANPA, athax kwom to chemle changle ngopuix nange hukoplax. Ozün ma tüikya Zang, nang ajaole Sennacherib-e akaxkya kaxma pangwüi to apalax.

¹⁷Asiria nok chongwangpae obibi nok hexle ama ilaxle chaxwan ibu a khünak chingokya haxtok ang achangle,

¹⁸tamchu hwom baozangbu zokle ashunkya ibue tix baozang chichang ikoxle pün hia long füi khünak chake zingkya chapabu changpu.

¹⁹Athax a, JOWANPA kwom Zang-e, nange kwom Asiria nok chak tokya khosünhüi, ilaxle chaxwannu angkya jat-libu noke JOWANPA, nangtix Zang changpule naxtsing.”

²⁰Ifüima wanghompa Hezekiah zangjop to JOWANPAe lankya kax füi, Isaia-e kaxho mix Hezekiah hato akatle thüi:

²¹JOWANPAe thüile: “Sennacherib, Jerusalem tingnue nang cha nyile tamchu nang ajaole.

²²Nange owa cha nyipuix tamchu owa to adix-adale changpuixle thüt? Nange ku, Israel nok otsao Zang adix-adapu.

²³Nange nang man-kanlinbu füi Lebanon haxnu atsuakya kha pangwüi sumle kop ang thopu, le nang bama tsaichong-kaxbongle chang angkya nange kaxhomix ahüipu. Ija faokha tokya ojang alokya sedar pünbu tamchu sümüikya saipres pünbu nange dak ang tsuakle ilaxle zukya faonu mongto nange alop thopule ngamtüi.

²⁴Mixnok chaxwan to tüküibu tholaxle ikha tokya ti ling ang thopu ilaxle nang süpahibue Nail shuanu azop ilaxle ija tok ma cha füi nak ang thopule angam tüi.

²⁵“Nange ibu ile chang angkya kaitanto wüi kue ajukle tsuakthom daokya nange münatat hexnyi? Athax kue ibu ile mokle paopu. Pan zailaxle ziakople thomkya tingnubu a longkhix athünle thomkya nui ang achang angkya tsak-zong nang ang kue tix koxpu.

²⁶Ikhato ngokya khünakbu ma tsak-zong chitüile asho; hwom a za ilaxle abüt-aban. Hwom a haxsha angkya hingzangbu lailaile chichangba handünchi zangcheie ibu to thule changpongma changpongma, ibu a homkho to nyemle tüikya achabu lailai.”

²⁷“Nange chem mokpuix, ojong to paopuix, nang bama pangwüi awanle ngopu. Nange ku zongto chemtukux shix-male changpuix, ibu pangwüi kue awanle ngopu.

²⁸Kue nang shix-male changkya hia mongngam bama kax atatle ngopu, ilaxle athax kue nang nakua makhange jankuix huküi ilaxle ija füi nang wikha ma shaole chang ang tomüi, ilaxle lomtang oja makhange nang nguipuix ija lomtang makhange kue nang chat ang tomüi.”

²⁹Ifüima Isaia-e Hezekiah ang thüi: “Ija a ibu chemle chang angkya hex, ibu bama mowan changpu: Ija zanglao hia ngaizangkya zanglao, nange sax ang a faotsax tata wüi ang changüi, ikoxle ifüi zang a nange nang tsaxshit ang tamchu tsaxtu ang kopüi, ilaxle grep küi laxle grep ziak sax ang kopüi.

³⁰Judah ma opang ozün ma tüilaxpuix, hwom a haxmong to zule otsing ju ang kople tüle oziak dünkya pünbu ningle tüle ahui-alyale changüi.

³¹Jerusalem hia Zaion Haxnu ma ozün ma ngokya khünakbu tüiüi, chemthüikoxle ile chang angkya bama JOWANPAe mongzangwünle tsuakdaoa.

³²“JOWANPAe Asiria nok chongwangpa bama akaxkya a ija changpu: ‘Chix a ija tingnu zan to dongle tingnu mongto nople münchangüi chichangba ibu to sanjun tuita füi haple münchangüi. Di füikya süpahi tuita chu tingnu zui to münnguiüi, ilaxle ija akhople kopdaokya aho ang haxlwon laxle chemchu münzingüi.

³³Nguikya lomnu makhange wüi chix a anongle chat ang tomüi, tingnu mongto nople münchangüi. Ija kue akaxkya a JOWANPA kax akaxpu.

³⁴Ku münchong hia ku dapa Dawid füikya ku tsaotsüt tüikya khoma, kue ija tingnu kho awale kopüi ilaxle sünle kopüi.’”

³⁵JOWANPA kaxtaimix ija ja Asiria nok to paolaxle süpahi 185, 000 lang. Ofüinop zangzunge, khünak ibu pangwüi omang ang achangle ikhama bang.

³⁶Ifüima Asiria nok chongwangpa Sennacherib ikha tokya chatle Ninewi to ngui.

³⁷Nyixta chixe chix baozang Nisrok shwomkya nuito ija to shwomle ngopongma, chix sasün anyi, Adramelek hia Sharezar nyie, chix changlo füi chix lang, ilaxle hokhi a Ararat nok to paole azang. Chix sasün mama mix, Esarhaddon a hopa man ma chongwangpa ang achang.