Read Wancho Naga 2 Wanghombu 2 Bible Online

2 Wanghombu 2 - Wancho Naga bible

2 Wanghombu 2

¹Chemtue JOWANPAe Elija a Zang zangwin makhange pao ang tungpuix, ipongma Elija hia Elisha nyi a Gilgal lom to tüikya.

²Elija-e Elisha ang thüi: “Ikhama tanle nuibang, chemthüikoxleJOWANPAe ku Bethel alople ka ang tsanle ngole.” Ikoxle Elisha-e lan: “Kue thothale ngokya JOWANPA hia nang mün ma, ku nang füi chiatsai angkya tsaopu.” Ikhoma hokhi pangnyi Bethel to ka.

³Bethel ma tüile ngokya ajebu othom tuita chix hato nguilaxle Elisha ma atüi: “Nang füi tomle ngokya nang hopunu anyix JOWANPAe pao angkya changpule nange matik hia?” Ikoxle Elisha-e lan: “Changle, kue ija awanle, ikoxlechu athax ija mo taxwün-ngohax.”

⁴Ifüima Elija-e chix ang thüi: “Elisha, chingchalaxle nange ku ima tanle nuibang; chemthüikoxle JOWANPAe ku Jeriko to pao angkya tsanle ngole.” Ikoxle Elisha-e thüi: “JOWANPA ozün ma tüikoxle, ilaxle nang chuwüi ozün ma tüile ngokoxle, kue nang tata danle münapaoüi.” Ikhoma hokhi pangnyi wüi Jeriko to ngui.

⁵Ilaxle Jeriko ma tüile ngokya ajebu othom tuita chix hato nguilaxle Elisha ang thüi: “Nang füi ngole tüikya nang hopunu anyix JOWANPAe nang ha angkya pao angkya changle le nange matik hexnyi?” Elisha-e lan: “Chang kox-a, kue ija awandaoa; hünzom dangjajale shongngohüi.”

⁶Ifüima Elija-e Elisha ang thüi: “Chingcha üntoxle nang a ima nuibang, chemthüikoxle JOWANPAe ku a Jordan to pao angkya akaxdaoa.” Ikoxle Elisha-e lan: “JOWANPA ozün ma tüikoxle ilaxle nang chuwüi ozün ma tüile ngokoxle, kue nang nang tata pao ang mündanüi.” Ikhoma hokhi pangnyi wüi pao.

⁷Ikha tokya aje hwom 50 chuwüi Jordan alople tomwüi pao. Elija hia Elisha nyi shuakax ma zak, ikoxle aje hwom 50 a süchaktong to ajongle ngo.

⁸Ifüima Elija-e chix nyi-za suk, ija ashep, ilaxle ija füi ti to fit; ijama ti anyi ang achangle ahan, ilaxle Elisha hokhi a haxzan makhange tachi to tale le.

⁹Ikhato Elija-e Elisha ang thüi: “Ku nang ha angkya mapaoba, kue nang hanpakma chem moküi akaxlax.” Elisha-e lan: “Chingchalaxle ku a nang tsak-zong mantswon mix ang achang kox.”

¹⁰Elija-e lan: “Nange huanuma tsakkya judaoa; ikoxlechu nang ha angkya ku tswonle paokya nange ngünle jangchang thüiningle ija nang ang koxüi ikoxle nange ngün ang chikop thüiningle ija nang ang münkoxüi.”

¹¹Ile hokhi kaxkaxle ahamle ngopongma wün füikya man-kanlin hia manbu lailaxle hokhi a ajan, ilaxle Elija a Zang zangwin füi zangkangting to dün.

¹²Elisha-e ija ngün ilaxle Elija nyakle akhong: “Apa, apa, Israel nok kho-awale ngopupa, nang nang dongüi-ngün!” Ifüima Elisha-e Elija tamchingün. Mongtsik laxle Elisha-e Chix Nyiwun Anyi ang achangle Akyet.

¹³Chixe Elija-e adütle toxkya nyi tswonle koplaxle hom chito chatle Jordan shuanu kax ma ajong

¹⁴Elija nyi füi chixe ti to fitle thüi: “JOWANPA, Elija Zang ojong ma tüi?” Chixe ti to tamchatle fitkya füi tomle ti anyi ang achangle ahan, ilaxle Elisha ija makhange tachi to tale le.

¹⁵Chemtue chix thüntho ma tüikya Jeriko angkya ajebue chix ngünle laxpuix, hwome thüi: “Elija chasa Elisha ma tüile ngole.” Hwom chix pong to zale apong, ilaxle chix tunthoma hwom haxchi to hule akhux.

¹⁶Hwome chix ang thüi: “Athax hulax, nang thothale ngokyabu füi tomle, nang tunthoma mixtsak-naomüi hwom sün 50 tüile; nang hopunu lom ang ibu tsanle apaokox; ile chichang thüiningle Zang Chasae nwonle dünlaxle chix a ojongjong haxnukho to chichangba haxbang khato adütle chuwüi thomtüilax.” Elisha-e lan: “Ile münchang, hünzom a chipaoüi.”

¹⁷Ilaxle chix azakle machang machangle hwome chix ang thüi: “Apao kox.” Ikhoma chixe hwom mixsün 50 pao ang dan. Ibue Elija lomle hanpak nyix azom jao ahom, ikoxlechu chix a chiataktsuak.

¹⁸Ilaxle chix Jeriko ma ngole tüipongma wüi ibu a chix hato chat. Chixe hwom ma atüi: “Kue hünzom ang taxpaongole münthüi daimi?”

¹⁹Tingnu angkya khünakbue Elisha ang thüi: “Hulax, kwome nang ang thüipu, nange ngünkya ningle, tingnu osün a müile, ikoxlechu ti a münmüi ilaxle naosom oti-okuak ma pao ang tomle.”

²⁰Chixe kaxtom kox: “Khup hozün tuita ma hidaole hum danlaxle ku hato apüihüi.” Hwome ija chix hato apüile kox.

²¹Chix shuasa kax to ju ilaxle ikhato hum adüt üntoxle thüi: “Ija a JOWANPAe akaxkya kax changpu: ‘Kue ti ibu otsao ang achangdaoa, ilaxle athax ijae khünak zi ang müntomüi ilaxle naosom oti-okuak ma paole münchangüi.’”

²²Ikhoma anyix kople, Elisha-e akaxkya kax lailaile ti a timüi ang achangle hüi.

²³Imakhange Elisha a Bethel to dong. Chix dongle lomba to tüipongma naosombu chix füi apong ang ngui üntoxle chix chanyi-wanjaile chang. Hwome chix ang thüi: “Nang khangkhopa, donglax! Nang khangkhopa, donglax!”

²⁴Chixe aküile hukoxle ibu ngün, ilaxle JOWANPA mün a hwom to thuakzomle chang. Ifüima faokha tokya chepnu anyi laile hüi, ilaxle naosom hwom 42 ashikle awüt.

²⁵Ikha angkya chix Karmel haxnu to pao, ilaxle etokhange chix a Samaria to chat.