Read Wancho Naga 2 Wanghombu 20 Bible Online

2 Wanghombu 20 - Wancho Naga bible

2 Wanghombu 20

¹Ipongma wanghompa Hezekiah tüle kakle ziüi khakha tüikya. Amoz sasün ajepa Isaia chix wai ang nguilaxle thüi: “Nange pangnu jali khuakhomle tsuak angkya bama JOWANPAe nang füi akaxle, chemthüikoxle nang a tamchatle kakmüi toxüile münchang, zik hanpakma achwonlax.”

²Hezekiah-e katuk chito chix thüne hulaxle zangjop:

³“JOWANPA, mongong füi tamchu kax ma laxle nang thothale hüikya ku bama nang mongtex chem hex, ile mok angkya ku azong-afale changkya ibu texle ataklaxmi.” Ilaxle chix a mongmaxle sop ang süt.

⁴Isaia-e wanghompa danle tox ikoxlechu chixe wanghom homlo khwa osungkha kaile machangba JOWANPAe chix ang,

⁵khünaknu lompa Hezekiah hato chatlaxle chix füi ija kax akax angkya kaxkox: “JOWANPA ku, hünpa Dawid Zang-e, nang zangjop atatle laxdaoa tamchu nang mikfi ngünle laxdaoa. Kue nang kak tamchatle müi ang tomüi, ilaxle nyix azom ma nang Zangshwom-Hom to paoüi.

⁶Kue nang chatle zanglao 15 ngo ang tomüi. Asiria nok chongwangpa chak tokya nang tamchu nang tingsho kue sünüi. Kue ija tingnu kho awaüi. Ija a kue ku mün hanpakma tamchu ku dapa Dawid füikya ku kaxtsao thom angkya hanpakma kue ile moküi.”

⁷Ifüima Isaia-e wanghompa wangshem füi chix tsom mok to fupsa makhange zingkya hinge atsamle kox angkya tamchu ile changkox tix wüi chix kak müi angkya akax.

⁸Wanghompa Hezekiah-e atüi: “JOWANPAe ku kak amüiüi ilaxle nyix azom füima ku a Zangshwom-Hom to pao ang thoüi lekya münwan ang a chem tüi?”

⁹Isaia-e thüi: “Chix kaxtsao münthaipu lükya münwan JOWANPA chix jaoe nang ang koxüi. Athax, dixtua angkya chaxba nang thochi to chikap bün naxle le texüi hia chichangba füichi to naxchatle texüi?”

¹⁰Hezekiah-e lan: “Ija chaxba thochi to chikap bün alyet angkya wüi chwonpai changüi. Ija füichi to chikap bün chat ang taxtom.”

¹¹Isaia-e JOWANPA to zangjop, ilaxle JOWANPAe ija chaxba chikap bün füichi to chat ang chitom. Ija chaxba a wanghompa Ahaz-e zingkya dixtua ma tüikya.

¹²Ija pongma Babilon nok wanghompa Merodak Baladan, Baladan sasüne wanghompa Hezekiah kakle tüileta le atale lax, ikhoma chixe chix hato hingho-najo tuita füi laiza tuita akat.

¹³Hezekiah-e kaxhomixbu pongle kop ilaxle chix tuinabu, chix khop hia hun, sui amüikyali ongan müikya hia ongan müikya münga, ilaxle chix süpahi chang-pax, ibu pangwüi aho. Chix pung ma tamchu chix wangting ma atüitüi bakle hwom hato oli tuita chitoxle aho.

¹⁴Ifüima ajepa Isaia wanghompa Hezekiah hato nguilaxle atüi: “Khünak ibu ojong tokya nguipu tamchu hwome nang ang chemle thüipu?” Hezekiah-e lan: “Khünak ibu a tüle tsailo nok, Babilon tokyabu changle.”

¹⁵Isaia-e atüi: “Hwome wanghom homlo ma chem to hu?” Hezekiah-e lan: “Hwome pangwüi to hudaoa. Pungkha ma hwom hato chiahole toxkya oli tuita müntüi.”

¹⁶Isaia-e wanghompa ang thüi: “JOWANPA Khüthak Zang-e,

¹⁷nang wanghom homlo ma tüikya pangwüi tamchu athax kople tüikya, hünpu hia hünpa hwome athünle thomkya tuina pangwüi Babilon nok to, ota-otua chemchu chitoxle tsuile pao angkya hanpak nyixta hüile ngokya kax akaxle.

¹⁸Tangthokya nangsix-nangli züizüi kople paolaxle Babilon wanghom homlo ma wangshem ang lax angkya hanpakma otuizinglaxle danüi.”

¹⁹Hezekiah-e, ija a chixe apünkya tuk ma tumüi lomkhaole ngo angkya kax akaxpule thütlaxle lan: “JOWANPA tokhange nange ku ang fakya kaxho a müihule.”

²⁰Wanghompa Hezekiah-e mokkya pangwüi, chix naomüi mwotbu, chixe tibombu zingkya hia tingnu to apüi angkya tilom thole alaikyabu, ibu pangwüi Judah nok Wanghombu Pukax Laipex ma zale tüile.

²¹Hezekiah a zile pao ilaxle chix sasün Manasseh a chix man ma wanghom ang achang.