Read Wancho Naga 2 Wanghombu 22 Bible Online

2 Wanghombu 22 - Wancho Naga bible

2 Wanghombu 22

¹Judah nok wanghompa ang achang pongma Josiah a zanglao achyet changkya; ilaxle chixe Jerusalem ma zanglao 31 apün. Bozkath tinglong angkya Adaiah sacha Jedidah a chix honu changkya.

²Josiah-e JOWANPA zongto müikyakya mok; Zang Wanlombu khünzule tole, chixe hopu Dawid mantole mok.

³Chixe apünkya zanglao 18 lükya to, wanghompa Josiah-e chix khwa angkya chakzamix Shafan, owa Azaliah sasün ilaxle Meshullam susün changkya hex, chix ija kaxtom füi Zangshwom-Hom to apao:

⁴“Nguakho Hilkiah hato paokox ilaxle Zangshwom-Hom fülom ma nyetmix ang ngokya zompu-zangpabue khünaknu angkya ngun chemtukux athünle tüipuix, ija paktikle laxhu.

⁵Zangshwom-Hom azünle zing angkya mwot to sütle ngokyabu chak to ija ngun kox angkya chix füi akaxkox.

⁶Hwome pün zingpa, homzai mixbu hia longswon-mixbu, ibu hingchak kox angkya tamchu homzai mwot ma lax ang shakkya pün hia long, ibu shak angkya changle.

⁷Ija mwot to akhi-amikle humele ngokyabu tangthokya khünakbu changle, ikhoma hwom ma chemtukux bakpuix, ija akiak-aziakle atüi-atua ngo angkya mwot müntüi.”

⁸Shafan-e wanghompa kaxtom Hilkiah hato apüi ilaxle chixe Zangshwom-Hom ma Wanlom Laipex atakle tüikya chix hama apua. Hilkiah-e chix ang ija laipex kox, ilaxle Shafan-e ija e.

⁹Ifüima chix chatlaxle wanghom hato kaxwün wangle thüi: “Nang dabu Zangshwom-Hom angkya ngun laxlaxle ija azünle zaikya mwot to humixbu chak to koxle toxdaoa.”

¹⁰Anaole chu chixe thüi: “Ija a Hilkiah-e koxkya laipex changle.” Ilaxle chixe ija, wanghompa-e atat ang akhongle e-le aho.

¹¹Chemtue wanghompa-e ija laipex ele lekya atatle laxpuix, chix ang mongma ilaxle chix nyi akyet,

¹²ilaxle nguakho Hilkiah, Shafan sasün Ahikam, Mikaiah sasün Akbor, khwa chakzamix Shafan, ilaxle wanghompa wangshem tüichong Asaiah, hwom bibi hato ibibi kax kox:

¹³“Ija laipex ma zale tüikya bama, ku tamchu Judah khünaknu hanpakma JOWANPA füi tsaitik-kaxshole anohu. Ija laipex ma chem mok angkya hex-ole zale tüipuix, ija chimokkya khoma JOWANPA a kem füi mongtsikle ngoüna.”

¹⁴Hilkiah, Ahikam, Akbor, Shafan hia Asaiah hwom, Huldah le amünkya ajenu owa Jerusalem tingzün zong ma ngole tüipuix, she füi tsaitik-kaxshole chang ang pao. (She kakopa Shallum, owa Tikwah sasün tamchu Harhas susün changkya hex, chix a Zangshwom-Hom nyi-za to hu-mix changkya.) Hwome she hama, chemle pang changpuix bakle akhixle wünle kox,

¹⁵ilaxle she-e hwom ang wanghompa hato chatlaxle

¹⁶JOWANPA tokhange hüikya kaxho ija chix ang kox angkya akax: “Kue Jerusalem tamchu ikhama tüikya khünakbu to sikangünüi. Ija a wanghompa-e edaokya laipex ma zale tüikya ningle changüi.

¹⁷Hwome ku chilaxle awütdaoa ilaxle mama baozangbu ang töbu koxle changdaoa; hwome mokkya mwot ibu makhange ku ang mongtsik adünle changdaoa. Jerusalem zongto ku mongtsikkya tüidaoa ilaxle ija a tam dang angkya münchang.

¹⁸Wanghompa chix jao hanpakma, ija a JOWANPA, Israel nok Zang ku jaoe akaxkya changpu: Laipex ma zale tüikya kax to nange apalax,

¹⁹ilaxle kue Jerusalem hia ima tüile ngokya khünaknu to sikngün fa ang azakya kax atatkya zuma, nang mong alüix tamchu nang nyi-za akyet üntoxle sopngale ku chitong to puile changlax. Kue ija mikngün zong ma za-adünkya tuita tamchu khünaknue ija omün othuak-ozom lom to lün angkya onui tuita ang achangüi. Ikoxlechu kue nang zangjop atatle laxdaoa,

²⁰ilaxle oja sikngün Jerusalem hato ahüi angkya changkya hex, ija a nang mazi tanto münahüi. Kue nang a mongsom ma zi ang tomüi.” Khünaknu a wanghompa Josiah hato ija kaxho füi chat.