Read Wancho Naga 2 Wanghombu 23 Bible Online

2 Wanghombu 23 - Wancho Naga bible

2 Wanghombu 23

¹Wanghompa Josiah-e Judah nok hia Jerusalem lompabu nyak,

²ilaxle hwom tomle Zangshwom-Hom to pao. Zompu-zangpabu hia ajebu tamchu khünaknu hakpa-luapabu hia tuimix-nuakmixbu pangwüi hwom füi tomle pao. Zangshwom-Hom ma atakkya tsaotsüt laipex noknue atatle Zangshwom-Hom ma wanghompa-e e.

³Chix a wanghom ngwotnui ma ajong ilaxle JOWANPA füi Tsaotsüt laxle, chix kax ma lax angkya, kün-mong hia chasa makhange abakle chix wanlombu hia kaxtombu thom angkya, ilaxle Tsaotsüte lomkya mwot pangwüi laipex ma zale tüikya ningle mwot ang achangle mok angkya tsaosax, ilaxle khünaknu pangwüi tsaotsüt otia ma thom angkya tsaosax.

⁴Nguakho Hilkiah, chix fang ma tüikya zompu-zangpabu ilaxle Zangshwom-Hom ma nyetmix ang ngokyabu pangwüi füi Bal hia baozangchanu Asherah tamchu lyettsibu to shwomle changpongma laxkya tuina pangwüi Zangshwom-Hom angkya homtho to alai angkya Josiah-e kax koxle akax. Wanghompa-e ibu tui-mwot pangwüi tingnu tokna to Kidron Haxbang zui ma zokle ashun ilaxle ija ojuak a Bethel to apüi.

⁵Judah nok wanghombue Judah haxtok ma tüikya tingnubu hia Jerusalem hozui-onam to zaile tüikya songsari tö-tsapbu ma töbu kox angkya hanpakma atsaole kamkya zompu-zangpabu: Bal, zanghan, lyetnu, lyettsi, ibu ang töbu koxle ngokya zompu-zangpabu pangwüi chixe khua-lua angkya apao.

⁶Chixe Zangshwom-Hom angkya baozangchanu Asherah chapa apao, ija tingnu tokna angkya Kidron Haxbang to paolaxle zokle ashun, ija ojuak thule haxbu ang achang ilaxle ija a noknu zukting to chiak.

⁷Chixe Zangshwom-Hom a, zangshwomnui ma ngokya tsangtsa hangkyabu ngokyakhabu ama. (Ijongkha ma shekobue Asherah to shwom pongma laxkya zu fwon.)

⁸Judah nok tingnubu to tüikya zompu-zangpabu chixe Jerusalem to apüi, ilaxle chixe chix chaxwan pangkha towüi hwom töbu koxle ngokya tö-tsapbu texle atsun. Tingnu to khünaknu nopüi Noknu Zünkai zongma nongchi ma, tingnu angkya Gowarnor Jihusua-e zingkya tö-tsapbu chempang zwon-baozangbu mün ma atsaole thomkya hex, ibu pangwüi chixe pünle ama.

⁹Ibu zompu-zangpabu ang Zangshwom-Hom a mok ang chitom, ikoxlechu hozui zompu-zangpabu ang koxkya twonkhax chiawonkya an hwome sax ang tsuak.

¹⁰Wanghom Josiah-e Hinnom Haxsha angkya songsari baozang to shwomkya nui Tofeh atsunle ama, ile changkya khoma Molek baozang ang owaechu masu masabu zokle ashunle tö kox ang chitho.

¹¹Judah nok wanghombue zanghannu shwomkya ma lax ang atsaole thomkya manbu chu chixe wüi awüt, ilaxle ibu shwom pongma laxkya man-kanlin chixe zokle ashun. (Ibu a Zangshwom-Hom Lopsha, fülom zui ma, nguakax-wangkho tuita Nathan ngokya hom füi aluile chiatsaile thom.)

¹²Judah nok wanghombue wanghompa Ahaz homkho angkya wanghom homlo homtok ma tö-tsap chem ang zingle tüikya hex, wanghompa Josiah-e ibu, wanghom Manasseh-e ibu Zangshwom-Hom khwa lopsha anyi ma oja tö-tsapbu zaile tüilaxpuix, ifüi tomle texle atsun; chixe tö-tsap ibu thuple akhixle atsun ilaxle Kidron Haxbang to tswonle awüt.

¹³Sidon nok baozangchanu Astarte, Moab nok baozang Molek, nushix dongkya ibu chapabu to sho angkya hanpakma, Olip Haxhua zong ma shuathongchi; handünchi Jerusalem ma wanghompa Solomon-e zingkya tö-tsapbu Josiah-e atsunle awüt.

¹⁴Wanghompa Josiah-e küikya longlo thuple ashix, baozangchanu Asherah chapa dakle anguak, ilaxle ibu küile tüikya haxsha a khünak zabue awang ang tom.

¹⁵Nabat sasün Jeroboam, owae Israel nok ochax lom to zule alyetpuix, Bethel angkya chixe zaikya baozang to shwomkya nui pünle awüt. Josiah-e ija tö-tsap bele adüt, longbu thuple akhix, ilaxle ibu haxbu ang achangle thuple akhix; chixe Asherah chapabu chuwüi zokle ashun.

¹⁶Ifüima Josiah-e akhople hukoxle haxhua to chixe zuktingbu ngünle lax; chixe ibu angkya zabu lokle alai ilaxle ibu a ija tö-tsap ma zok. Chixe ile tötsap a oma ang achang, ile kaitanto wüi pangpwon tukma wanghompa Jeroboam tö-tsap zui ma ajongle tüipongma wüi ajepae ajekya kax changle laile ile mok. Wanghompa Josiah-e akhople hukoxle ajepa zukting ngünle lax.

¹⁷Chixe atüi: “Ija a owa zukting hex?” Bethel angkya khünakbue lan: “Judah tokya nguilaxle nange ija tö-tsap to chemle mokpuix, ibu ile chang angkya bama ajele toxkya ajepa zukting a ija changpu.”

¹⁸Josiah-e kaxkoxle thüi: “Ija ile wüi naxngokox. Chix zabu a taxalai.” Ikhoma chix zabu a chialai, ilaxle Samaria tokhange nguikya ajepabu zabu chuwüi chialai.

¹⁹Israel nok wanghombu songsari baozang to shwomkya nui chempang zingle alaikya tokhange JOWANPA ang mongtsik adünle changpuix, Israel tingnu pangnu kha tokya wüi wanghompa Josiah-e pünle awüt. Ibu tö-tsap pangwüi to chixe Bethel ma hwonpupule hwon.

²⁰Hwome thothale ngokya tö-tsap ding ma chixe zompu-zangpabu pangwüi langle awüt, ilaxle chixe tö-tsap pangnu khato wüi khünak zatuabu zokle chang. Ifüima chix a Jerusalem to chat.

²¹Tsaotsüt Laipex ma zale tüikya ningle, JOWANPA hwom Zang achuakle Kaitox Pangpwon sax angkya wanghompa Josiah-e khünaknu ang kaxkox.

²²Kaxfünpabue hwom haxtok apünle hüikya nyix tokhange anyix kopkya mong ma, Israel chichangba Judah nok wanghom owaechu ija Kaitox Pangpwon owaechu saxle chihüi.

²³Athax oshuk ma, Josiah-e apünkya zanglao 18 lükya to Jerusalem ma ija Kaitox Pangpwon sax.

²⁴Nguakho Hilkiah-e Zangshwom-Hom ma atakkya laipex ma zale tüikya wanlom to angkya tsaitsuak kaxtsuakle chang angkya hanpakma wanghompa Josiah-e Jerusalem hia Judah haxtok angkya jenu-shipabu hia chajik-muashem tamchu kako baozangbu pangwüi, chapabu, tamchu songsari baozang to shwomkya tuina pangwüi awüt.

²⁵Mosa Wanlom tokya füi, chix kün-hi-mong, tutex hia tsak-zong pangwüi koxle JOWANPA thothale changkya mix chix lailaikya wanghom owachu chitüitox; tamchu chix tokfüi ma chix lailaikya wanghom owachu chitüitox.

²⁶Ikoxle wanghompa Manasseh-e mokkya mwot khoma Judah nok zongto tüle shixle JOWANPA ang mongtsik dong, ilaxle ija a athax kople chihai tsuak.

²⁷JOWANPAe thüi: “Israel nok to chemle hwondaopuix ija ningle kue Judah nok to chuwüi hwonüi; Ku miksho angkya Judah khünakbu max ang tomüi, ilaxle kue Jerusalem a chilaxle awütüi. Ija tingnu tam chima tüikya Zangshwom-Hom a, ijongkha ma ku to shwom angkya hex-ole kue zünle kopkya kha changhupu.”

²⁸Josiah-e mokkya mwot pangwüi Judah nok Wanghombu Pukax Laipex ma zale tüile.

²⁹Josiah wanghom ang ngopongma, Ijip nok wanghompa Neko-e Asiria nok chongwangpa to fong ang Eufrat shuanu to chix süpahibu zunle apüi. Wanghompa Josiah-e Ijip nok süpahibu Megido ma abax ang azong ilaxle ija zanhok ma chix lang.

³⁰Chix nguakax-wangkhobue chix mang man-kanlin kho ma angat laxle Jerusalem to apüi, ilaxle ikhato chix a, wanghom hwom zukting ma akhün. Judah angkya khünaknue Josiah sasün Joahaz to münga füi lile, chix man ma wanghom ang zünle kop.

³¹Chix Judah nok wanghom ang achang pongma Joahaz a zanglao 23 changkya, ilaxle chixe Jerusalem ma lyetjang azom apün. Chix honu a Hamutal, Libnah tingnu angkya Jerimiah sacha changkya.

³²Hopu-hopa hwom man tole chixe JOWANPA zongto ochax lyen.

³³Ijip nok wanghompa Neko-e, Hamath nok angkya Riblah ma chix da tuita ang koplaxle pao ilaxle khop a otuak ma 3400 ilaxle hun a otuak ma 34000, Judah nok ma süi tuita ningle laxkya ma chixe apünkya ashuk.

³⁴Wanghompa Neko-e Judah haxtok ma, hopa Josiah man ma chix sasün Eliakim a wanghom ang achang, ilaxle chix mün a Jehoiakim le alüix. Joahaz a Ijip nok to Neko-e kople pao, ilaxle chix a ikhato zi.

³⁵Ijip nok wanghome jukya ningle süitha alan angkya hanpakma Jehoiakim-e khünaknu ang süi, hwom ma tüikya tuina ma thütlaxle sai.

³⁶Judah nok wanghom ang achang pongma Jehoiakim a zanglao 25 changkya, ilaxle chixe Jerusalem ma zanglao 11 apün. Chix honu a Zebidah, Rumah tinglong angkya Pedaiah sacha changkya.

³⁷Hopu-hopa hwom man tole Jehoiakim-e JOWANPA zongto ochax lyen.