Read Wancho Naga 2 Wanghombu 24 Bible Online

2 Wanghombu 24 - Wancho Naga bible

2 Wanghombu 24

¹Wanghompa Jehoiakim tsün ma, Babilon nok wanghompa Nebukadnezar-e Judah nok tingtak; ilaxle zanglao azom hanpak ang Jehoiakim a chixe apünkya fang ma ngo ang atsang; ifüima chix alünle ajong.

²JOWANPAe, chang-hi-pax füi achwon laxle ngokya Babilon nok, Siria nok, Moab nok ilaxle Amon nok, ibu a Jehoiakim zan to akatle Judah nok tingsum ang tom. Chixe ile mok angkya changle le JOWANPAe chix da ajebu makhange kaxtaile thomdaokya.

³Wanghompa Manasseh-e mokdaokya ochax mwotbu khoma Judah khünaknu pangwüi chix miksho angkya amüt angkya kuxmale chixe ile chang ang tom;

⁴tamnüile chu chemngax chichangkya khünakbu chixe langle changkya khoma ile chang ang tom. JOWANPAe ija hanpakma Manasseh thaikya alak ang chitho.

⁵Jehoiakim-e mokkya mwot pangwüi Judah nok Wanghombu Pukax Laipex ma zale tüile.

⁶Jehoiakim a zile pao, ilaxle chix man ma chix sasün Jehoiakim wanghom ang achang.

⁷Eufrat shuanu makhange shuakuxchi Ijip nok longzipong alople, ami Ijip nok wanghom chak to tüikya haxtok pangwüi Babilon nok wanghompa chak to dongle tüikya khoma, Ijip nok wanghompa hia chix süpahibu otuechu Ijip nok angkya zan ka ang laile chipao.

⁸Judah nok wanghom ang achang pongma Jehoiakim a zanglao 18 changkya, ilaxle chixe Jerusalem ma lyetjang azom apün. Chix honu a Nehushtan, Jerusalem angkya Eluathan sacha changkya.

⁹Hopa mantole Jehoiakim-e JOWANPA zongto ochax lyen.

¹⁰Chixe apünle ngopongma, wanghompa Nebukadnezar nguakax wangkhobue azui laxle Babilon nok süpahibu Jerusalem zan to dong ilaxle ija akhople kop.

¹¹Ija akhople thomkya tuk ma Nebukadnezar, chix jao Jerusalem to ngui,

¹²ilaxle chix honu, chix sasün hwom, chix nguakax-wangkhobu, tamchu wanghom homlo ma okax-okhobu, ibu füi tomle wanghompa Jehoiakim-e Babilon nok chak to ma chak ajongle kox. Chixe apünkya zanglao 8 lükya to Nebukadnezar-e Jehoiakim a zanda ang laxlaxle pao,

¹³ilaxle Zangshwom-Hom hia wanghom homlo ma tüikya tuina pangwüi Babilon nok to pao. JOWANPA kax lailaile, Zangshwom-Hom ma lax ang Solomon-e zingkya hun tuina komkaile Nebukadnezar-e thuple ashix.

¹⁴Nebukadnezar-e Jerusalem angkya khünaknu, wanghom susa hwom, ilaxle lompa ang ngokyabu, pangwüi athüt koxle 10, 000 khünaknu zanda ang koplaxle pao. Chixe Judah haxtok ma mixshix-zasa toxlaxle, zingsa-jaosa mankya khünakbu hia jan thup mixbu komkaile pao.

¹⁵Nebukadnezar-e Jehoiakim a Babilon nok to koplaxle pao; chix füi tomle honu, chix kakonu, chix nguakax-wangkho hwom ilaxle Judah nok lompabu pangwüi pao.

¹⁶Nebukadnezar-e khünak laxlili pangwüi, athüt koxle 7000; hwom khama 1000 a zingpabu, ikhama janjao mixbu chuwüi womle, hwom pangwüi süpahi ang chang koxle asukyabu, Babilon nok to tsuile pao.

¹⁷Nebukadnezar-e, Jehoiakin hopasa Mattaniah a Judah nok ma wanghom ang achang ilaxle chix mün a Zedekiah le alüix.

¹⁸Chix Judah nok wanghom ang achang pongma Zedekiah a zanglao 21 changkya, ilaxle chixe Jerusalem ma zanglao 11 apün. Chix honu a Hamutal, Libnah tingnu angkya Jerimiah sacha changkya.

¹⁹Jehoiakim lailaile wanghompa Zedekiah-echu JOWANPA zongto ochax lyen.

²⁰Jerusalem hia Judah haxtok angkya khünaknu füi JOWANPA ang tüle mongma ilaxle chixe hwom chix miksho angkya max ang tom.