Read Wancho Naga 2 Wanghombu 25 Bible Online

2 Wanghombu 25 - Wancho Naga bible

2 Wanghombu 25

¹Babilon nok wanghompa Nebukadnezar füi Zedekiah alünle ajong, ikhoma Zedekiah wanghom ang achangkya zanglao aku lükya lyetbün ma nyixbün lükya to Nebukadnezar, chix süpahibu pangwüi koplaxle nguile Jerusalem tingtak. Hwome tingnu tokna ma athongle pom zai, ija akhople zanhunuibu zai,

²ilaxle Zedekiah-e apünkya zanglao 11 nguikya kople ija ziakople thom.

³Ija zanglao lyetjang ali ma nyix aku to, chemtue khünaknu ang süt bakle otui-onuake alople hüipuix,

⁴tingnu zünbu daple dong. Babilon noke tingnu akhople kople thomkoxchu, süpahibu pangwüi zangnak ma paole azang. Hwom a wanghompa tsawat chikao makhange lai, ilaxle Jordan haxsha chito paole azwon.

⁵Ikoxlechu Babilon nok süpahibue wanghompa Zedekiah achuale zik; hwome chix a Jeriko zui angkya haxsha ma kop, ilaxle chix süpahibu noknusae chix a danle tox.

⁶Zedekiah a wanghompa Nebukadnezar hato apüi. Ipongma chix a Riblah tingnu ma tüikya; ikhato chixe Zedekiah bama kaxfün tsuak.

⁷Zedekiah-e hule ngopongma, sasün hwom mik amüt; ifüima Nebukadnezar-e Zedekiah mik lom, chix to janbüi füi khale thom, ilaxle chix a Babilon nok to pao.

⁸Babilon nok wanghompa Nebukadnezar-e apünkya zanglao 19 lükya to, lyetjang aga hanpak nyix anüt kha, wanghom wangsupa tamchu chix süpahi lompa Nebuzaradan a Jerusalem to ngui.

⁹Jerusalem angkya Zangshwom-Hom, wanghom homlo, ilaxle nguakax-wangkhobu hom pangwüi chixe wün füi zokle ashun.

¹⁰Chix süpahibue tingnu zün-katuk atsunle awüt.

¹¹Tingnu ma danle toxkya khünakbu Nebuzaradan-e Babilon nok to pao; hwom khama zingpabu ilaxle Babilon noke danle toxkyabu tüikya.

¹²Ikoxlechu, tingtok chemchu chitüikya mixshix-zasabu chixe Judah haxtok ma danle tox, üntoxle hwom ang grep haxtok hia mama manzai haxtokbu ma mwot amok.

¹³Zangshwom-Hom ma tüikya wi thongnubu hia müi ang alinkya zyenbu Babilon noke akhixle awüt. Wi tibom chongkya chuwüi hwome akhixle tox. Ibu angkya wi pangwüi hwome Babilon nok to pao.

¹⁴Tötsap hunle atsao ang twonkya haxhok khua ilaxle wündix athünkya khupbu, wüntikbu dan angkya lotsapbu, tö koxle changpongma ija angkya aji thale kop angkya khuatsumbu, sobu zok ang twonkya khuasabu üntoxle Zangshwom-Hom mwot to twonkya khop tuina pangwüi, ibu komkaile hwome tsuile pao.

¹⁵Hun hia khop füi zingkya tuina pangwüi laxlaxle pao; wünhandix okham hokle aham ang twonkya khuakhaosabu hia khupsabu to lünle tsuile pao.

¹⁶Zangshwom-Hom hanpakma Solomon-e zingkya khop-jan tuina, thongnu anyi, maihue linkya zyenbu üntoxle chongkya tibom, ibu a thüt ang chimüile lixkyabu changkya.

¹⁷Ija thongnu anyi a talailaikya nyi; pangnyi wüi fak ali pong tsuale tüikya. Pangnyi ma wüi, thongkho ma sok anyi su tuita tsuale, wi-jan füi pomegrenet pünziak noksabu zinglaxle chwople aza-apuale tüikya.

¹⁸Ibibi tok to chatle chu Nebuzaradan-e, süpahi khama akhokya mixsüne, Nguakho Seraiah, chix fang-fang angkya nguapa Zefaniah üntoxle mama alixachong hwom mixsün azom, hwom bibi zanda ang koplaxle pao.

¹⁹Tingnu angkya chixe: zankat mixbu thakma lompa ang thomkya, otui zingdaokya mixsün tuita, ipong kople tingnu ma tüile asukya wanghompa wangshem hwom mixsün aga, süpahi lompa to fongle, süpahibu mwot-süt lai ma zale chang ang thomkya mixsün, ilaxle mama alixachongbu hwom 60 khünak: ibibi pangwüinu koplaxle pao.

²⁰Nebuzaradan-e khünak ibu Babilon nok wanghompa hato apüi.

²¹Ipongma wanghompa a Hamath haxtok angkya tingnu Riblah ma tüikya. Ikhato wanghompa-e hwom to chakmok ilaxle langle awüt. Ile Judah angkya khünaknu a hwom haxtok angkya zanda ang tsuile pao.

²²Babilon nok wanghompa Nebukadnezar-e Ahikam sasün ilaxle Shafan zongto susün Gedaliah a Judah nok ma Gowarnor ang zing. Babilon nok to kople chipao homle dantoxkyabu to hume angkya mwot kox.

²³Chemtue Judah nok alixachongbu hia süpahibu, opange ma chak chiajong homle ngole tüipuix, ija zing atatle changkya zuma hwom a Mizpah ma Gedaliah füito athüt. Judah nok alixachong hwom a: Nethaniah sasün Ishmael, Kareah sasün Johanan, Tanhu-meth sasün Seraiah, hwombibi changkya. Hwom a Netofath hia Makah angkya Jezaniah tingnu angkyabu changkya.

²⁴Gedaliah-e hwom ang thüi: “Kue hünzom ang thüipu, athax hünzom Babilon nok alixachongbu thua zale ngo angkya müntüi. Ija haxtok ma tingtok kople ngolax ilaxle Babilon nok wanghompa thothale changlax; ile jangchang thüiningle pangnu müile ngoüi.”

²⁵Ikoxlechu ija zanglao lyetkua anüt towüi, Nethaniah sasün Ishmael, owa Elishama susün changkya hex, chix a mixsün bün lax üntoxle Mizpah to pao, ilaxle Gedaliah to single chix lang. Chixe ikhama asukya Israel khünaknu hia Babilon nokbu langle awüt.

²⁶Ifüima, Israel khünak, mixshix-zasa hia saxpu-luawang pangwüi, süpahi alixachongbu füi tomle, ikha dantoxlaxle Ijip nok to ka, chem ang thüikoxle hwom a Babilon nok thua za.

²⁷Babilon ma Ewilmerodak wanghom ang achangkya zanglao ma, chixe Judah nok wanghom Jehoiakin kunkha tokya danle, chix hato chingcha aho. Jehoiakin zanda ang kople kun ma shokya füima zanglao 37 ma lyetjang 12 ma nyixtsa anüt lükya to ija ile chang.

²⁸Ewilmerodak-e chix to chingchale hu, ilaxle chix füi tomle Babilon chaxwan to kople thomkya mama mixnok wanghombu to nüile achuak-achenle chang.

²⁹Ikhoma Jehoiakin ang kun to ngopongkya nyiwun lüile kox ilaxle chix mazi tanto wanghom tsap ma fongsaxle chang ang tom.

³⁰Chix mazi-mazile, chix hanpak laxli-twonli lax-twon angkya hanpak ang, nyixfokya to ngunsa-syensa muapong-muapong koxle hume ngo.