Read Wancho Naga 2 Wanghombu 3 Bible Online

2 Wanghombu 3 - Wancho Naga bible

2 Wanghombu 3

¹Judah nok wanghompa Jehusafat zanglao 18 nguipongma, Samaria makhange Israel nok thakma Ahap sasün Joram-e apün ang süt, ilaxle chixe zanglao 12 apünle hüi.

²JOWANPA tunthoma chixe ochax mok, ikoxlechu honu hia hopa nyi tukux tomtatale a chichang, chemthüikoxle chixe hopae zingle thomkya Bal chapa bele atsun.

³Ikoxlechu chix tho angkya wanghompa Jeroboam, Nabat sasün lailaile chixe chuwüi Israel khünakbu ang ochax lyenle chang ang tom üntoxle ochax füi chix ojao chiatsai.

⁴Athax Moab nok wanghompa Mesha, tuita chun tsomkya mix changkya; chixe Israel nok wanghom ang chun hosa 10000 ilaxle chun ola 10000, ibu füi tomle müimun chuwüi kox.

⁵Ikoxle chemtue wanghompa Ahap zile paopuix, Moab nok wanghompa a Israel nok zan to ka.

⁶Ipongma wanghompa Jeroboam Samaria angkya lai ilaxle Israel nok pangwüi sele asox.

⁷Chixe Judah nok wanghompa Jehusafat hato kaxho akatle thüi: “Moab wanghompa ku zan to kale changdaoa; nang füi tomle Moab nok zan to chika hia kaüi?” Chixe lan: “Ku kaüi; ku khünakbu hia manbu pangwüi achwonle tüile.

⁸Keme ojaja lomkua makhange singüi?” Joram-e lan: “Edom nok sak-hax lomnu makhange.”

⁹Ikhoma Israel nok wanghom hia Judah nok wanghom ilaxle Edom nok wanghom laile pao. Hwom nyix anüt nguile aham ilaxle süpahibu hia hwom füito azuile

¹⁰Wanghompa Joram-e akhong: “Kem a maxdaoa, büthüikoxle JOWANPAe kem a Moab nok wanghompa chak to koxdaoa!”

¹¹Wanghompa Jehusafat-e atüi: “Keme JOWANPA ma kaxtik-ngaoshole changtsuak angkya kem khama ajepa owawa tüicha?” Joram-e süpahi khama lompa tuitae ija kax to lan: “Shafat sasün Elisha ikhama tüile. Chix a ajepa Elija to fongle ngokya mix changpu.”

¹²Wanghompa Jehusafat-e thüi: “Chix a ajepa tsingtsing changpu.” Ikhoma wanghompa-e Elisha se ang apao.

¹³Elisha-e Israel nok wanghompa ang thüi: “Kue nang to chem hanpak ang fongüi? Hünnu hia hünpa hwome tik-tole ngokya ajepabu hato tikshole chang ang paolax.” Joram-e lan: “Ile münchangüi! Wanghom kwom azom bibi Moab nok wanghompa chak to koxkya a JOWANPA changpu.”

¹⁴Elisha-e lan: “Kue thotha-manzai ngokya JOWANPA mün ma kue tsaosaxle thüipu, kue Judah nok wanghompa Jehusafat to e-sekya chitüikoxba, kue hünzom füi mok angkya mwot chemchu chitüise.

¹⁵Athaxpi tsaipa tuita apüihüi.” Tsaipae chix thuaput-waxmaibu mütle changpongma, Elisha hato JOWANPA tsak-zong hüi.

¹⁶Elisha-e thüi: “Ija a JOWANPA kax changle: ‘Ija shuazan pangnu khato wüi tüküibu thole alaikox.

¹⁷Hünzome zangwatkya hia zangwin jepkya chingünkoxle chu, ija shuasa a tie awangle changüi, ilaxle hünzome, hünzom tsom-pombue ilaxlechu mama müibue lingle chang angkya hanpakma ti a okhonguile tüiüi.’”

¹⁸Elisha-e chizakle akax: “Ija ile mok angkya JOWANPA zongto mwottsakle münchang, chixe hünzom ang Moab nok to lüt angchu tomüi.

¹⁹Tüle osün amüile ziakople thomkya hwom tingnubu chuwüi hünzome lüt ang tomüi; hünzome hwom kux pünziak laimo komkaile dakle shaüi, tibu azopüi, ilaxle haxzao füikya hwom manzai haxtokbu ma long füi thuple amaüi.”

²⁰Ofüinop, ija a ozangjang to tö koxkya tu, Edom nok chikao tokhange ti jenle nguilaxle tie haxthün awang.

²¹Chemtue wanghom hwom azom hwom tingtak ang nguile ngokya Moab noke atatle laxpuix, changtwon asangsang pangwüi sele asox ilaxle longzipong ma athong.

²²Chemtue ofüinop hwom jipzole changpuix, ti tok to zanghan-chasae nyanle tüikya. Ija zanghan-chasa nyan to ti a aji lailaile khile ngün.

²³Hwome thüi: “Ija a aji changle! Wanghom hwom azom a lüile azanlaxle tata alangle changkya changüi! Hai, paohax üntoxle hwom thongnuibu to huhax!”

²⁴Ikoxle chemtue hwome ibu thongnui alople changpuix, Israel noke hwom to sing ilaxle hwom a jwonle achat. Israel noke chizakle hwom achuale le pao, ilaxle Moab nokbu langle awüt.

²⁵Hwom tingnubu tingtakle ama. Hwome haxzao füikya manzai haxtok akaile lekya zuma, ija haxtok ma longe awangle machang machangle Israel khünak noknusae ija haxtok ma long füi thup; hwome shuabu chuwüi züile azop ilaxle pünziak-laimo komkaile sha. Oshuk ma Kir Heres angkya pongwün tingnu tata ma akia. Longthup mixbue ija akhople kop ilaxle ija to sing.

²⁶Chemtue Moab nok wanghompa-e chix towüi anaokya changale awanle hüipuix, chix füi tomle changlo füikya süpahi 700 khünak zünle kop ilaxle zan mong hyet le lelaxle Siria nok wanghompa hato paole azang.

²⁷Ikhoma chixe chix sasün tüichongpa, owae chix man ma wanghom küntong mantswon angkya tüipuix, chix koplaxtoxle pao, ilaxle Moab nok baozang ang chix a tö tuita ang koxle pan angkya zün ma lang. Ija ngünlaxle Israel khünakbu tüle abüt-aban ikhoma hwom ija tingnu angkya anong laxle ma chaxwan to chat.