Read Wancho Naga 2 Wanghombu 5 Bible Online

2 Wanghombu 5 - Wancho Naga bible

2 Wanghombu 5

¹Naman, Siria nok süpahi lompa tuita, Siria nok wanghompa-e tüle achuak-achenle changkya mixsün tuita changkya. Naman makhange JOWANPAe Siria nok süpahibu ang zannokbu to anaole chang ang tomkya khoma wanghompa-e chix to onüi e-sele chang. Chix a süpahi khama lompa tuita, ikoxlechu ngwon kak makhange chix ang mongthangle ngo.

²Hwome Israel nok tingtakle changpongma, hanpak tuita ma, Siria nok süpahi tuitae Israel nok shekosa tuita tswonle apüi. She a Naman kakonu dacha ang ngo.

³Nyixta she-e ma honanu ang thüi: “Ku hopupa a Samaria ma tüikya ajepa hato tamkakoxle müise changale texle! Ija mixsüne chix kak amüile fase dai.”

⁴Chemtue Naman-e ija kax atat ang koppuix, chix wanghompa hato ngui ilaxle ija shekosa akaxkya kax chix hama wünle-kox.

⁵Wanghompa-e thüi: “Ku laiza koplaxle nang a Israel nok wanghompa hato kalax.” Ikhoma Naman achexle pao. Chixe chix füi tomle 30, 000 khop ngunkhix, 6000 hun ngunkhix, ilaxle nyimüi shembün, le koplaxle achex.

⁶Chixe kopkya laiza ma ile zale tüikya: “Ija laizae ku nguakax-wangkho tuita Naman süntsing münwan ang tompu. Nange chix kak amüile kox angkya ku mongtex changa.”

⁷Chemtue Israel nok wanghompa-e ija laiza e-laxpuix, chix mongtsik ilaxle chix nyi akyet laxle thüi: “Kue ija mixsün kak chemle amüile naxfale Siria nok wanghompa-e thütlaxpuix? Chixe ku a ozün hia omang thakma tsak-zong koplaxle ngokya Zang changpule thütlaxpihex? Ija a chixe ku füi hyet lomkya atsingsho!”

⁸Chemtue ile changkya ajepa Elisha-e atatle laxpuix, chixe wanghompa hato kax akat: “Nang ang büthüikoxle mongmapu? Ija mixsün a ku hato akat-hüi. Kue chix hama Israel nok ma ajepa tüile ngokya ahole faüi!”

⁹Ikhoma Naman, chix man hia man-kanlinbu füi nguilaxle Elisha homthoma ajong.

¹⁰Jordan shua ma othom anüt ma chix tsangtsa sole ti ajo angkya kaxho füi Elisha-e chix dapa ija mixsün hato apaole, ile jangmok thüiningle chix kak müi angkya kax kox ang tom.

¹¹Ikoxle Naman ang mongma, ilaxle hom to chatle thüi: “Chix ku hato laile apongüi, JOWANPA chix Zang to jopüi, ku makthün to jwomle ku kak amüile faüile texkya dai!

¹²Ibomachu, Damaska to chatlaxle chukhato Abana hia Farpar shuanubu, Israel haxtok ma tüikya shuajenbu füi sümüikyabu müntüile hia? Ibu ma solaxle chu ku müi kak müidaose!”

¹³Chix dapa chix hato donglaxle thüi: “Alixachong, ajepae nang ang mwot tsakkya tuita koxpuix thüikoxba nange mokdaose. Ikoxle athax chixe akaxkya lailaile ti ajo laxle nang chem ang chimüiünlaxpu?”

¹⁴Ikhoma Naman Jordan to ju, chix lailai to ti to othom anüt ma sing ilaxle Elisha kax jaojaole chix kak tsaothale müi. Chix tsangtsa khwon a naosa tsangtsa khwon lailaile adom wüi adomle müile hüi.

¹⁵Chixe ma khünakbu füi Elisha hato chat üntoxle thüi: “Athax kue mama baozangbu wüi achongkya münchang ikoxle Israel nok Zang wüi achongkya changpule awan ang kopdaoa; idaile alixachong, chingchajaja laxle nange pi ija ku hinghobu pongle shongkop-hüi.”

¹⁶Elisha-e lan: “Kue thotha-manzaile ngokya ozün ma tüikya JOWANPA mün ma kue tsaosaxle thüipu, kue nang hingho pongle münkopüi.” Naman-e shonglaxfale atsang, ikoxlechu chixe ija chilax.

¹⁷Ikhoma Naman-e thüi: “Nange ku hingho chilax thüiningle kue laxlaxtox angkya hanpakma man hün anyi hax man hün anyi hax ku ang fahüi, chemthüikoxle athax makhange JOWANPA ang koxkya boma mama baozang owa angchu kue zokle ashunle tö kox angkya oli münchang.

¹⁸Idaile kwom wanghom füi tomle Siria nok baozang Rimon shwomkya nui to paolaxle chix to shwomle changdaokya bama JOWANPAe ku ang thailak naxtüihüile ongpu!”

¹⁹Elisha-e thüi: “Mongmüi-pwonlale paokox.” Ifüima Naman ikha angkya achexle pao. Chixe ochu makopba wüi,

²⁰Elisha dapa Gehazi-e chix mongto zangwün: “Ku hopunue chem ngaxchu pongle chikop homtoxle Naman a achatdaoa! Ija Siria süne chixe pongle kopkoxba müihuse. Ozün ma tüikya JOWANPA mün ma ku azuile ziklaxle tütali thüingaxchu jule kop angkya changle.”

²¹Ikhoma chix a Naman füito azuile zik. Chemtue Naman-e chix füifüile azuile khünak tuita zikle hüikya ngünle laxpuix, chix a man-kanlin kho angkya thai ilaxle chix füi apong laxle atüi: “Tütali tsai-kax tüidaocha?”

²²Gehazi-e lan: “Tsaikaxle chemchu müntüi. Ikoxle athax ile Efraim haxhua tokya ajebu mixsün anyi nguile tüile, ikhoma nange hwom ang 3000 khop ngunkhix hia nyi-za shem anyi fakoxle müisele, ibu ju ang ku hopupae ku tsanle azikkya changpu.”

²³Naman-e lan: “6000 khop ngunkhix jaojao laxlax.” Chixe ija shonglaxfale atsang, ngunkhix a nyitsong anyi ma zing ilaxle nyi shem anyi le, chix dapa anyi ma koxlaxle Gehazi thoto achale alyet.

²⁴Chemtue hwome Elisha ngole tüikya haxhua aloppuix, Gehazi-e ija nyitsong anyi lax ilaxle hom to pao. Ifüima chixe Naman dapa nyi chat ang tom.

²⁵Chemtue chix hom to chatle homkha to noppuix, ipongma Elisha-e atüi: “Nang oma ngokya?” Chixe lan: “Alixachong, ku a ojongtochu münpao.”

²⁶Ikoxle Elisha-e thüi: “Ija mixsün nang füi apong ang man-kanlin kho tokya thaile changpongma chasa ma ku ikhama müntüikya hexmi? Ija a ngun, nyi-za olip-münga hia grep ziak, chun hia maihubu chichangba dabu pongle kop angkya hanpakma münchang!

²⁷Ikoxle athaxpi Naman kaklak pangwüi nang ma paxüi ilaxle nang tamchu nang sixlibu ma ija kak othuithuima ngoüi!” Chemtue Gehazi ikha angkya achexle paopuix, chix ma ija ngwon pax ilaxle tsangtsa khwon pangwüi a-te le thole pao.