Read Wancho Naga 2 Wanghombu 6 Bible Online

2 Wanghombu 6 - Wancho Naga bible

2 Wanghombu 6

¹Nyixta, chix mwot to hu ang ngokya ajebu othome Elisha to kaxthup-ngaotünle thüi: “Kwom ngokya onui a müimamale hixle!

²Kwom ngo ang ngwotnui zing angkya hanpakma, Jordan shuanu to kalaxle pün hidaole dakle chang angkya kwom danhüi.” Elisha-e lan: “Kalax, ile moklax.”

³Hwom kha angkya mixsün tuitae chix chuwüi hwom füi tomle ka angkya changpule ngang; ikoxle chixe, kalaxmile dan.

⁴Hwom pangwüi tomwüile laile pao. Chemtue hwom Jordan to nguipuix, hwom pangwüi mwot ma süt.

⁵Mixsün tuitae pün dakle anguakle ngopongma, chix wafax kua ti khato dütle sam. Chixe Elisha nyakle akhong: “Alixachong, athax kue chemle hwonüi? Ija a onox ma jule laxkya mixkux wafax changkya!”

⁶Elisha-e atüi: “Ija ojongwa ma düt?” Ija mixsüne wafax dütkya onui aho, ilaxle Elisha-e kiathox tuita sex, ija ti khato awüt ilaxle ija titok to fuale lai ang tom.

⁷Chixe thüi: “Ija kople alailax.” Ija mixsüne akulaxle ija kople alai.

⁸Siria nok wanghompa a Israel nok füi azanle tüikya. Chixe chix nguakax-wangkhobu füi tsaitik-kaxsho laxle chix pom zai angkya onui zünle kop.

⁹Ikoxlechu Elisha-e Israel nok wanghompa hato kaxho akatle ija onui hato chihüi angkya bama kaxkhün kox, chemthüikoxle ija hozui ma Siria noke chwon zailaxle tanle ngole.

¹⁰Ikhoma ikhama ngokya khünakbu ang Israel nok wanghompa-e kaxkhün kox, ilaxle hwom nyele ngo. Ija ile obithomthom ma hexle changle hüidaoa.

¹¹Ija bama Siria nok wanghompa ang tüle mongma; chixe chix nguakax-wangkhobu selaxle hwom ma atüi: “Hünzom khama Israel nok wanghompa chima sele ngokya opupuhex?”

¹²Hwom kha angkya mixsün tuitae lan: “Wanghompa, Owachu müntüi. Nange nui mongto zangwünle changkya ngaxchu ajepa Elisha-e Israel nok wanghompa hama janpüi ma wünle koxle.”

¹³Wanghompa-e kaxkoxle thüi: “Chix ojong ma tüipuix, ija awan hüi, kue chix kop angkya changle.” Chemtue chix hama Elisha a Dothan ma tüile le apuale koxpuix,

¹⁴chixe ikhato, mankho ma azankya hia man-kanlin füi azankya süpahibu huanuma kat. Hwome ija tinglong zangnak ma alop ilaxle ija akhople kop.

¹⁵Ngainop ningle swomsae Elisha dapa zolaxle hom angkya homtho to laile pao ilaxle man hia man-kanlinbu füi tinglong akhople ngokya Siria nok süpahibu ngünlelax. Chix Elisha hato chat ilaxle thüi: “Alixachong, kempi maxkya changa, chemle wünüi?”

¹⁶Elisha-e lan: “Taxza! Hwom chima chemtukux tüipuix ifüi süluile kem chima tüile ngole.”

¹⁷Ifüima chixe zangjop: “O JOWANPA, chix mik daple laxkox ilaxle chix ang ngün ang tomkox!” JOWANPAe chix zangjop to lan, ilaxle Elisha dapae angakle hukoxle haxhua chito awangle manbu ngün ilaxle Elisha akhople wün man-kanlinbu huanuma ngün ang kop.

¹⁸Chemtue Siria noke single hüipuix, Elisha-e zangjop: “O JOWANPA, khünak ibu ang mik apwom ang tomkox.” JOWANPAe chix zangjop to lan ilaxle hwom ang mik apwom ang tom.

¹⁹Ifüima Elisha hüi ilaxle hwom füi akaxle thüi: “Hünzom a othai lomto le le ngole; ija a hünzome lomle ngokya tinglong münchang. Ku füito hüilax. Hünzome lomle ngokya mixsün hato kue hünzom apüile toxfang.” Ilaxle chixe khünak ibu Samaria nok to paole tox.

²⁰Hwom tingnu to nguikya füi tomle Elisha-e zangjop: “O JOWANPA, hwom mikdap ang laxkox.” JOWANPAe chix zangjop to lan; chixe hwom ang chatle ngün ang tom, ilaxle hwome hwom a Samaria tingnu mongto tüikya changale ngünle lax.

²¹Chemtue Israel nok wanghompa-e Siria nokbu ngünle laxpuix, chixe Elisha ma atüi: “Kue hwom langüi hia? Alixachong, kue hwom langhax-o?”

²²Chixe lan: “Taxlang, zantam ma kople apüikya süpahi ngaxchu nange lang angkya oli münchang. Hwom ang hidaole sütling mix laxkox, ilaxle hwom a hwom wanghompa hato chat ang dankox.”

²³Ikhoma Israel nok wanghompa-e tüle fongkha laxle hwom tux; ilaxle hwome sax-lingle changkya füima, chixe hwom Siria nok wanghompa hato danle achat. Imakhange Siria noke Israel nok tingtakle ngokya zak.

²⁴Hanpak hidaole lekya füima Siria nok wanghompa Benhadad-e chix süpahi pangwüi Israel nok zan to akatle Samaria tingnu akhople kop ang tom.

²⁵Ile zane akhople kople thomkya khoma tingnu ma osüt-oling ma tüle tui-nole tüikya khoma mantsak khangza tuita ngaxchu khop ngunkhix 80 pong ang hang ilaxle jua-o dix 200 gram ma khop ngunkhix aga pong sax.

²⁶Israel nok wanghompa tingnu pankho to ngalaxle ahamle ngopongma mixnu tuita akhongle thüi: “Wanghompa, ku to asunhüi!”

²⁷Wanghompa-e lan: “Nang to JOWANPAe ngaxchu chifong tsuak, ikoxle kue tomning chemle fongtsuak angkya? Ku ma wonglai tsax hia grepti-ju tüile lehia?

²⁸Nang sikngün a chem changkya?” She-e lan: “Ikhama tüikya mixchae othonyix, ku naosa saxhax ifüima she sasün saxhaxle tsiale.

²⁹Ikhoma ku naosa a kwome songle saxdaoa. Ofüinyix kue she sasün saxhax thüikoxle, she-e chix a khomdaoa!”

³⁰Ija kaxzing atatlaxle wanghompa mongtsik ilaxle chix nyi akyet, ilaxle chix nyi fang to chixe nyikhwon apongle changkya katuk zui ma ngole tüikya khünakbue ngün ang kop.

³¹Chixe akhong: “Anyixkya zanghannu madüt tanto kue Elisha khang chidüt thüiningle Zang-e ku to chakmokle naxchang kox!”

³²Ilaxle chixe Elisha füi apong ang kaxhomix tsanle apao. Ipongma Elisha a hom ma, chix wai ang nguikya züizüi tüichong mixmüibu füi ngole asukya. Wanghompa-e ahüikya kaxhomix nguiüi thoto wüi, Elisha-e tüichong mixmüibu ang thüi: “Ija mix lang mix mixe owawa ku lang ang ahüile ngole! Chemtue chix ikhato nguile changüihex, kahakle tsyenkox, chix a homkha to dong ang taxtom. Wanghompa chix jaojao a ija mixsün füifüile azuile hüile.”

³³Chixe ija kaxchu ashukpu, wanghompa nguilaxle chix ang thüi: “Kem hato ija thama apüikya a JOWANPA chix jaoe apüikya changle! Chixe tütali mok angkya tha kue omalax ang tanngoüi hexmi?”