Read Wancho Naga 2 Wanghombu 7 Bible Online

2 Wanghombu 7 - Wancho Naga bible

2 Wanghombu 7

¹Elasha-e lan: “JOWANPAe akaxkya kax to apalax! Samaria ma ngainyix ipongkhae tsax müikya tuak azom chichangba tsaxsa tula tuak azok khop ngunkhix tuipong ang shak ang ataküi.”

²Wanghompa wangshem tüichonge Elisha ang thüi: “Zang, chix tomtatae tsaxjun thokle-thokle adütüi thüikoxngaxchu ile chang ang otuechu müntsuak!” Elisha-e lan: “Nange ile changkya ngün ang kopüi ikoxlechu nange ikha angkya süt funta sax ang münkopüi.”

³Samaria pan kai ma angwonbu hwom mixsün ali tüikya, ilaxle hwome tata füi zangwünle thüi: “Kem mazi-mazile keme ima tanle nui angkya mwot chem tüi? Tingnu mongto dongle ngo angkyachu kem ang mwot ojao müntüi, chemthüikoxle ikha tochu kem a

⁴woknuak ma zi angkya wüi changle; ikoxlechu kem ikhama jangngo thüikoxchu kem a zi angkya oshua; idaile kempi Siria nok thongnui to paohax; hwome oma mokpule kem to langle awütkya wüi chichangba mama chemchu müntüiüi, ikoxlechu owatsing hwome kem chilangle chuwüi dantox tüilax.”

⁵Ikhoma, zangnak ang sütkya füi shemle, hwom Siria nok thongnui to pao, ikoxle hwome ikha alople changpongma ikhama owachu chibang.

⁶JOWANPAe ozing chongkya alaile, Siria nokbu ang man hia man-kanlinbu füi tüle chongkya süpahi othom tuita hüile ngokya ningle atat ang tom ilaxle Siria noke, Israel noke hwom to sing ang Hit nok hia Ijip nok wanghombu hia hwom süpahibu shaklaxle nguikya changüi, le thüt ang tom.

⁷Ikhoma Siria nokbu a ma khangkhom ang paole azang. Hwome hwom nyihombu, manbu, mantsakbu, ibu pangwüi pom ma chemle ngopuix, ile dantoxlaxle kongdile chat.

⁸Chemtue ija mixsün ali hwom thongnui to nguipuix, hwom nyihom mongto dong, ikhama abang-bang pangwüi sax-lingle chang. Khop, hun hia nyi-za, ikhama abang-bang pangwüi hwople kop, ilaxle ibu tsuile paole khom. Anaole chatlaxle hwom mama nyihom to chuwüi dong, ilaxle ikha angkya tuinabu chuwüi tsuile pao.

⁹Ifüima hwome tata ang thüi: “Keme ile chimokse changle! Kem ma amüikya kaxho tüile idaile ibu a kem hanpak zaza ang pyenle chithomüi. Keme ija apua ang ngainopkya zangngai alopkya tanle jangngo, kem sikngün apong angkya atsingsho. Hai, kempi momle chat hax ilaxle nguakax-wangkhobu hama wünle koxhax!”

¹⁰Ikhoma hwome Siria nok pom danle tox, Samaria to chat ilaxle pan ma ngokya nyetmixbu selaxle thüi: “Kwom a Siria nok pom to paopu ikoxle khünak owa zingchu münatat tamchu owa sünchu ngün ang münkop; man hia mantsakbu a chifün homtoxle danle tüile, ilaxle nyihom a Siria noke chemle danle toxpuix ile tüile.”

¹¹Nyetmixbue ija kaxho apuk, ilaxle wanghom homlo to ija kax apua.

¹²Ipongma zangnak changkya, ikoxlechu wanghompa a chix lyakho angkya zo ilaxle chix nguakax-wangkhobu ang thüi: “Kue hünzom hama Siria nok atsingkya bama wünfang! Hwome ikha angkya otui-onuak awanle ngopu, ikhoma hwome hwom thongnui dantoxlaxle hozui-onam to chwon koplaxle ngotüi angpu. Keme süt lom ang tingnu tatok to laiüile hwome thütpu, üntoxle hwome kem a ozün ma koplaxle ija tingnu hwople kop angle atsingkya changpu.”

¹³Chix nguakax-wangkho khama tuitae akax: “Tütale wüi changlax, ija tingnu angkya khünakbu a, zidaokyabu thatha ma maxdaoa. Idaile ota tüikya man aga füi khünak züizüi, chempangle changpuix ija opaktik ang paole hunohax.”

¹⁴Hwome khünak züita zün, ilaxle wanghompa-e khünak ibu man-kanlin anyi ma, Siria nok süpahibu to chempangle changpuix, ija opaktik laxle anongle chat angkya adangle fakya kax füi pao ang tsan.

¹⁵Khünakbu Jordan shuanu alople le, lomjang fole nyi-za hia mama-mama chang-paxbu, hwom paoüima Siria noke dantoxkyabu atakle lax. Hwom chat ilaxle wanghompa hato ibu kaxwün wang.

¹⁶Samaria angkya khünakbu atinle ziklaxle Siria nok pom tsui. Ilaxle JOWANPAe akax daokya ningle, müikya wonglai tsax tuak azom chichangba tsaxsa tula tsax tuak azok a khop ngunkhix tuipong ang hang.

¹⁷Ipongkhae wanghompa-e tingnu pan nyekyabu to hu ang, chix wangshem tüichong ang ngokya nguakax wangkho tuita ija lompa hünlit koxle asu. Wanghompa-e chix füi apong ang nguile ngopongma, Elisha-e ajele akax daokya ningle, ija mixsün to khünaknue cha füi nakle tox ilaxle ikhama chix zi.

¹⁸Elisha-e Wanghompa füi ofüinyix ipongkhae Samaria ma müikya wonglai tsax tuak azom chichangba tsaxsa tula tuak azok khop ngunkhix tuipong ang hang angkya hex-ole akax pongma,

¹⁹ija nguakax-wangkhoe: “JOWANPAe thokle-thokle tsaxjun adütle changkoxle ngaxchu ile otuechu münchangüi”, le lankya. Ipongma Elisha-e chix kax to lan: “Nange ija ile changkya ngün ang kopüi, ikoxlechu nange ikha angkya chemchu sax ang münkopüi.”

²⁰Ija lailaile chix to ile chang: chix a tingnu pan ma khünaknu cha füi nakkyakya ma langle awüt.