Read Wancho Naga 2 Wanghombu 8 Bible Online

2 Wanghombu 8 - Wancho Naga bible

2 Wanghombu 8

¹Athax Elisha-e Shunem ma ngokya mixcha, owa sasün chatle azangle zo ang tomkya hex, she hama, JOWANPAe ija haxtok to tuinu-nuaknu ahüi angkya, ija a zanglao anüt ngo angkya, idaile she-e kako homkhabu koplaxle mama khato ngo ang pao angkya bama akax.

²She-e chixe adangle fakya kax ma lax, ilaxle kako homkhabu koplaxle zanglao anüt hanpak ang she a Filistia nok to pao.

³Zanglao anüt ashukle changkya zuma she a Israel nok to chat ilaxle wanghompa hato nguilaxle she ting-tok she ang wüi achatle faüile ju.

⁴She thoma wanghompa a Elisha dapa Gehazi füi kaxkaxle nui; wanghompa-e Elisha ohünotün mwot bama tsingsele tsu.

⁵Chemtue Gehazi-e wanghompa hama, Elisha-e zidaokya khünak chatle chemle azünpuix, ija mo wünle ngopongma, ija mixchae wanghompa hato nguilaxle akax, Gehazi-e chix ang thüi: “Wanghompa, Elisha-e zidaokya khünak chatle azangle zo ang tomkya mixcha sasün nyi a ija nyi changpu!”

⁶Wanghompa-e atüikya to kaxlan fale, she-e Gehazi zangwün a otsingtsing changle le ngai, ikhoma wanghompa-e chix nguakax-wangkho tuita selaxle, ija mixcha ang she kux pangwüi achatle kox angkya tamchu zanglao anüt she paole ngokya bama zaile saxdaokya haxtok manzai mün to lünle achatle kox angkya kax.

⁷Siria nok wanghompa Benhadad kakle ngopongma Elisha Damaska to pao. Chemtue wanghompa hama ikhato Elisha nguile tüikya wünle koxpuix,

⁸chixe chix nguakax-wangkho tuita Hazael füi akax: “Ajepa hato hingho koplaxle paokox, ilaxle ku kak chimüi hia müiüihex JOWANPA ma atüi ang tomkox.”

⁹Ikhoma Hazael a Damaska ma alaikya oli amüimüi saxli-lingli, ut 40 ma awangle hünzing laxle Elisha hato pao. Chemtue Hazael-e chix apongle changpuix, chixe thüi: “Nang dapa, Wanghompa Benhadad-e chix kak chix lak tamchatle chimüi hia müiüihex atüi ang ku tsanle ahüikya changa.”

¹⁰Elisha-e lan: “JOWANPAe ku hama ahole, chix a ziüi changa, ikoxlechu chix hama chix ang azangüi changale wünkox.”

¹¹Ifüima Elisha-e Hazael to, chix thuile kak ang achangle paokya kople mikma-thünmale hu. Allele Elisha ang mikfi jen.

¹²Hazael-e atüi: “Alixachong, nang a büthüikoxle soppu?” Elisha-e lan: “Chemthüikoxle nange Israel nok zongto chichang-chizangle hwon angkya kue awanle. Nange hwom zanhunuibu to wünlangüi, hwom chamüi-sünmüibu dingsomle changüi, hwom naosombu to nutle akhixle mik max ang tomüi, ilaxle hwom naowokbu oti-okuak amale awütüi.”

¹³Hazael-e atüi: “Ku chemngax chichangkya khünake ipongpongle mok ang ojong tokya tsak-zong tüiüi?” Elisha-e akax: “Nang Siria nok wanghompa ang achang angkya JOWANPAe ku hama ahole changdaoa.”

¹⁴Hazael a Benhadad hato chat. Chixe chix ma atüi: “Elisha-e chemle akaxpu?” Hazael-e lan: “Nang kak a müijao müiüile ku hama akaxdaoa.”

¹⁵Ikoxlechu ofüi nyix wüi Hazael-e nyikhwon lax, ija ti to som ilaxle ija füi wanghompa to thün ma huxle lang. Benhadad man ma Hazael a Siria nok ma wanghom ang achang.

¹⁶Ahap sasün Joram, Israel nok ma wanghompa ang apünkya zanglao aga lükya to, Jehusafat sasün Jehoram Judah nok ma wanghom ang achang.

¹⁷Chix a zanglao 32 tüipongma wanghom ang achang ilaxle Jerusalem ma zanglao achyet apün.

¹⁸Chix kakonu a Ahap sacha, ilaxle Ahap hwom homkhae mokle hüikya Israel nok wanghombue achaxkya ningle chixe chuwüi achax. Chixe JOWANPA zongto ochax lyen,

¹⁹ikoxlechu JOWANPAe Judah a amüt-sele chitsu, chemthüikoxle chix dapa Dawid füi, chix sixli hwome chizakle apün-awangle ngo angkya hex-ole tsaosaxkya chix tsaotsüt tüikya khoma chixe ile pan-dan.

²⁰Jehoram-e apünle ngokya thak ma Edom nok a Judah nok füi zan ang achang ilaxle pongwün wangting ang achang.

²¹Ikhoma, Edom nok süpahibue hwom akhople kople thomkya khato Jehoram a chix man-kanlinbu füi Zair to ka ang lai. Zangnak ma chix ilaxle chix man-kanlinbu chaoxle laile paole azang, ilaxle chix süpahibu mahom-hom to chiakle pao.

²²Imakhange Judah nok chak tokya Edom nok a pongwün wangting wangting tuita ang achangle hüi. Ipongma wüi Libnah tingnue chuwüi alünle ajong.

²³Jehoram-e chempang mokpuix ibu pangwüi Judah nok Wanghombu Pukax Laipex ma zale tüile.

²⁴Jehoram zikya man a Dawid tingnu angkya wanghombu zukting ma akhün, ilaxle chix sasün Ahaziah a chix man ma wanghom ang achang.

²⁵Israel nok wanghom sasün Joram-e apünkya zanglao 12 lükya to Jehoram sasün Ahaziah Judah ma wanghompa ang achang.

²⁶Chix wanghom ang zanglao 22 ma tüipongma achang ilaxle chixe Jerusalem ma zanglao tuita apün. Chix honu a Israel angkya wanghompa Omri sucha wanghom a Ahap sacha Athaliah changkya.

²⁷Atu-amaile changkya makhange Ahaziah a wanghompa Ahap füi chongnying ang achang. Ahap hwom homkha lailaile chixe chuwüi JOWANPA zongto ochax lyen.

²⁸Siria nok wanghompa Ahazael zan to ka ang wanghompa Ahaziah a Israel nok wanghom Joram füi asüi. Süpahibu Gilid angkya Ramoth ma apong, ilaxle ija zanhok ma Joram thomzünle lax.

²⁹Chixe thomzün mak müi angkya hanpakma chix Jezril tingnu to chat, ilaxle Ahaziah a ikhato chix wai ang ngui.