Read Wancho Naga 2 Wanghombu 9 Bible Online

2 Wanghombu 9 - Wancho Naga bible

2 Wanghombu 9

¹Ipongma ajepa Elisha-e naosün ajepa tuita se ilaxle chix ang thüi: “Gilid angkya Ramoth to pao ang achwonlax.

²Ilaxle chemtue nang ikha alople Nimshi hosu tamchu Jehusafat sasün Jehu lom ang sütüihex, nang füi tomle ija olip münga thua koplax. Chix a hozuibu füi atsaile süile tüikya nuilua tuita to paolax,

³chix khang ma ija münga füi li ilaxle thüikox, ‘JOWANPAe nang a Israel wanghompa ang kamdaoa’ le ngaikox. Ilaxle nange tsuakkya tukuxle momle ikha danle toxdao.”

⁴Ikhoma naosün ajepa Ramoth to pao.

⁵Ikhato chix süpahibu tu asoxkya atak. Chixe thüi: “Alixachong, ku ma nang füi akax angkya kaxho tuita tüile.” Jehu-e thüi: “Nange kwom opupu füi akaxpu?” Chixe lan: “Alixachong, nang füi akaxpu.”

⁶Ifüima hokhi a nuikha to dong, ilaxle naosün ajepae Jehu khang ma olip münga füi li üntoxle chix ang thüi: “JOWANPA, Israel nok Zang-e ngaile: ‘Kue nang a ku khünaknu Israel nok hanpak ang wanghom ang kampu.

⁷Nange, wanghompa Ahap sasün, nang hopupa ang ngokya wanghompa lang angkya changle, ikoxle tix, ku ajebu hia mama ku dabu langkya khoma kue Jezebel ang sikngün kox angkya opong atakle changüi.

⁸Ahap homkha pangwüi tamchu chix sixlibu a mik max angkya wüi changpu; chix homkha angkya lükaka pangwüi kue amüt angkya changle, naosom mixmüile münsüiüi.

⁹Israel nok wanghom Jeroboam hia Basha nyi homkha to hwonkya ningle kue chix homkha to chuwüi hwon angkya changle.

¹⁰Jezebel a akhün angkya münchang. Chix mang a Jezril haxtok ma hibue sax angkya changle.’” Ija kax akax tsuakkya füi tomle ija naosün ajepa ikha angkya nonokhaile ajongle pao.

¹¹Jehu a chix zuikhui nguakax-wangkhobu hato chat. Hwome chix ma atüi: “Pangnu müile wüile changlax ma? Ija naosün angapae nang füi chemthüisele thüipu?” Jehu-e lan: “Chixe lomkya hünzome awanle ngopu.”

¹²Hwome lan: “Münchang, kwome münawan. Chixe chem akaxpuix, kwom hama wünhu.” Jehu-e lan: “Ku a Israel nok wanghompa ang achang angkya, JOWANPAe ngaile changdaoa, le ija mixsüne akaxle.”

¹³Ifüi tomle Jehu hozui nguakax-wangkhobue Jehu ajong angkya hanpakma chifün ma hwom nyi nom, nyazong müt, ilaxle akhongle khuapu: “Jehu a wanghom changle!”

¹⁴Siria nok wanghompa Hazael füi Ramoth ma azanle changpongma maklax üntoxle ija mak amüi angkya hanpakma Jezril to ngole tüikya wanghompa Joram mik amüt angkya hanpakma Jehu-e mwottho tuita zing. Ikhoma Jehu-e hozui nguakax-wangkhobu ang thüi: “Hünzom ku füi jangtüi, Jezril angkya khünakbu hato kaxkhün kox ang hünzom Ramoth angkya owachu chipao angkya oli changpu.”

¹⁶Ifüima chix ma man-kanlin ma ngalaxle Jezril to ka ang lai. Joram a ipong kople kak mamüile tüikya, ilaxle Judah wanghom Ahaziah chix wai ang nguile ikhato tüikya.

¹⁷Jezril pan angkya chwon ma tüikya nyetmix tuitae Jehu hia chix khünakbu hüile ngokya ngünle lax ilaxle chix akhong: “Khünak züita mankho ma hüile ngokya kue ngün ang kople.” Joram-e lan: “Man süpahi tuita apaokox ilaxle hwom man hia mix man hex tsing ang tomkox.”

¹⁸Kaxho mix Jehu hato mankho ma hüi ilaxle chix ang thüi: “Nang nokmüi ma nguipia hia zan ang ngui puix, ija wanghompa-e awanse tsuputa?” Jehu-e lan: “Ija awan kop angkya nang mwot münchang. Nang a ku tokfüi to ngoün.” Sailya kho angkya nyetmixe kax koxle thüi: “Kaxho mix a othom ha alople nguidaoa, ikoxle chix chatle münchat.”

¹⁹Kaxhomix a mama chatle tam apao. Chixe chuwüi Jehu ma kax tuitata wüi atüi. Anaole Jehu-e thüi: “Ija tsing angkya nang mwot münchang. Nang a ku tokfüi to ngoün.”

²⁰Tamchatle chu zanhunui angkya nyetmixe kaxwün wang: “Ija kaxho mixe othom ha alopdaoa, ikoxle chix a chatle münchat.” Üntoxle chixe thüi: “Othom kha angkya lompa-e chix man-kanlin a angapa Jehu lailaile wüi zople.”

²¹Wanghompa Joram-e kax kox: “Ku man-kanlin achwonkox.” Ilaxle ija achwon, ilaxle Ahaziah hokhi ma man-kanlin ma lai, ilaxle Jehu füi apong. Hwom Naboth haxtok ma apong.

²²Joram-e atüi: “Nang nokmüi ma nguipia chemle nguipu?” Jehu-e lan: “Hünnu Jezebel-e opong alaile toxkya chajik-muashem hia chapa mwot pangwüi kwom füi tüile ngoünkya füima chemkha tokya tumüi?”

²³“Ija a khualopmix changle, Ahaziah!”, le Joram akhongle chix man-kanlin zople anguix ilaxle zikle pao.

²⁴Jehu-e chix hapnu alai, ilaxle chixe zong abakle kut laxle san füi haple Joram tok ma asüt ilaxle ijae chix khax to apüi. Joram a chix man-kanlin kho ma nguakle zi.

²⁵Ilaxle Jehu-e chix to fongpa Bidkar ang thüi: “Chix mang koplaxle Naboth haxtok ma awütdao. Joram hopa, wanghompa Ahap tokfüi ma künyi tomtomle mankho ma ahamle ngopongma Ahap hanpakma ma JOWANPAe akaxkya kax ibu texle ataklax:

²⁶‘Münyix kue Naboth sasün nyi langkya ngünle. Ilaxle kue nang ang ija haxtok ma wüi sikngün apong ang tom angkya tsaosaxle changdaoa.’ Idaile Joram mang kopkox. JOWANPA tsaotsüt changle ngai angkya hanpakma chix mang a Naboth haxtok ma awütkox,”, le Jehu-e kaxtom kox.

²⁷Wanghompa Ahaziah-e ibu ile changkya pangnu ngünlaxle, chix a man-kanlin ma Beth Hagan angkya tinglong to fütle paokya to Jehu-e achuale zik. Jehu-e chix khünakbu ang kaxkox: “Chixe chuwüi lang kox.” Chixe chix man-kanlin Gur nok to lekya lom to zople adün ngopongma, Ibleam tinglong zui ma hwome chix to mak-kha. Ikoxlechu Magiddo tingnu alople chix paole azang, ilaxle chix ikhato zi.

²⁸Chix nguakax-wangkhobue chix mang a man-kanlin ma Jerusalem to apüi ilaxle Dawid Tingnu ma wanghom hwom zukting ma akhün.

²⁹Ahap sasün Joram, Israel nok ma wanghompa ang achangkya zanglao bün ata lükya to Ahaziah a Judah nok ma wanghom ang achang.

³⁰Jehu a Jezril to chatle ngui, chempangle changdaopuix, ija atatlaxle Jezebel-e miklyet khan apüt, khoshit-nasaile chang, ilaxle wanghom homlo thangmik makhange tingjang lomnu chito hule ajong.

³¹Pan makhange Jehu nguile ngopongma, she-e nyakle akax: “Nang Zimri! Nang ito omakya?”

³²Jehu-e angakle hu ilaxle akhong: “Ku zui ma ija owa hex?” Chongwang Homlo ma alixachongbu anyi-azome chix to thangmik makhange asongle hu,

³³ilaxle Jehu-e hwom ang thüi: “She e adütdao.” Hwome she hax to tswonle awüt ilaxle she ajie katuk hia manbu to fule chwop. Jehu-e chix man hia man-kanlin she ding ma alyet,

³⁴wanghom homlo to nop ilaxle fong sax. Ile changkya füima tix chixe zangwünle thüi: “Ija chilaxli mixcha mang paodao ilaxle akhündao; tütale wüi changlax, she a wangchanu changle.”

³⁵Ikoxle she akhün ang paokya khünakbu thoma khangza boma cha hia chak za, ibu boma chemchu chibang.

³⁶Chemtue hwome ija kax Jehu hama akaxpuix, chixe thüi: “Chix dapa Elija makhange JOWANPAe akax pongma ile chang angkya hex-ole thüi: ‘Jezril haxtok ma Jezebel mang hibue saxüi.

³⁷She mang ota-otuabu müidixbu ningle chiaküi, ikhoma owaechu müifun ibu a ijongkha müifun changle le awanle lax ang münthoüi.’”