Read Wancho Naga 1 Pukax-Pangao 10 Bible Online

1 Pukax-Pangao 10 - Wancho Naga bible

1 Pukax-Pangao 10

¹Gilbua Haxnu ma Filistia nok Israel nok füi azan. Ikhama Israel khünakbu huanuma lang, ilaxle mamabu, wanghompa Sol hia chix sasün hwom chuwüi womle paole azang.

²Ikoxlechu Filistia nokbue achuale ziklaxle hwom kop, ilaxle Sol sasün Jonathan, Abinadab üntoxle Malkishua hwom bibi lang.

³Sol akhople azankya tüle khamkhitle changkya khoma, ilaxle chix to sanhap füi sütlaxle chisumüile maklax.

⁴Chix chang-pax kopmix ang tüikya naosün ang chixe thüi: “Nang changlo syetkox ilaxle ku lang kox, ile chichang thüiningle Zang chilax homtoxle ngokya Filistia nok ibue ku thajao-wünhaile changüi changa!” Ikoxlechu ija mixsüne ile mok ang khomtsi. Ija ngünlaxle Sol-e chix changlo alüile syetle alai ilaxle chix lualua to hukle zi.

⁵Ija naosüne Sol zikya ngünle lax, ikhoma chix chuwüi alüile ma changlo füi hukle zi.

⁶Ile Sol hia chix sasün azom, hwom pangwüi tomle mik max, ifüima hwom sixli owaechu apün-awangle chihüi.

⁷Chemtue Jezril haxsha ma ngokya Israel khünakbue hwom süpahibu fütle paokya hia Sol tamchu chix sasün hwom mik maxkya zing atatle changpuix, hwom a ma tingnunu dantoxlaxle pao ma süt. Ifüima Filistia nok nguilaxle ibu chaxwan kop.

⁸Azankya ofüi nyix wüi Filistia nokbu a Israel nok sax-tuabu ama ang pao, ikhato hwom thoma Sol hia chix sasün hwom mang Gilbua Haxnu ma bang.

⁹Hwome Sol khang düt, chix khyep-dibu sukle lax, ilaxle Filistia nok pangkha towüi, hwom chapabu hia khünaknu hato ija kaxho müikya khuapu ang mwottsan mixbu apao.

¹⁰Hwome chix chang-paxbu a, hwom baozang to shwomkya onui tuita ma dan ilaxle chix khang a hwom baozang Dragon to shwomnui ma asha.

¹¹Chemtue Gilid angkya Jabesh khünakbue, Filistia noke Sol to hwonkya otue atatpuix,

¹²mixtsak naomüibu pao ilaxle Sol hia chix sasün hwom mang a Jabesh to apüi. Ikhato hwome mang ibu zak püntong tong ma akhün ilaxle nyix anüt chisax chilingle atsao ngo.

¹³Chixe JOWANPA to mongong chithomkya khoma Sol mik max angkya atak. Chixe JOWANPA kaxtombu kax ma chilaxle tüi ilaxle lwompubu ma tsaitik-kaxshole chang.

¹⁴JOWANPA ma tsaitik-kaxshole changhaxkux tsyen to ile tüikya khoma JOWANPAe chix mik amüt ilaxle wangting apün angkya a Jesse sasün Dawid chak to kox.